അണ്‍സ്റ്റോപ്പബ്ള്‍!! തുടരെ 15ാം ജയം സിറ്റിക്ക് റെക്കോര്‍ഡ്, യുനൈറ്റഡ് വിജയവഴിയില്‍

ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോളില്‍ മുന്‍ ചാംപ്യന്‍മാരായ മാഞ്ചസ്റ്റര്‍ സിറ്റിയുടെ വിജയക്കുതിപ്പ് തുടരുന്നു. തുടര്‍ച്ചയായി 15ാമത്തെ കളിയിലും ജയം കൊയ്ത് സിറ്റി പുതിയ റെക്കോര്‍ഡിടുകയും ചെയ്തു. അതേസമയം, മറ്റൊരു കളിയില്‍ ജയത്തോടെ മുന്‍ ജേതാക്കളായ മാഞ്ചസ്റ്റര്‍ യുനൈറ്റഡ് കിരീടപ്പോരില്‍ പങ്കാളിയാവുകയും ചെയ്തു.

എവേ മല്‍സരത്തില്‍ സ്വാന്‍സിയാണ് സിറ്റിയുടെ വിജയക്കുതിപ്പിനു മുന്നില്‍ തകര്‍ന്നടിഞ്ഞത്. എതിരില്ലാത്ത നാലു ഗോളുകള്‍ക്കായിരുന്നു സിറ്റിയുടെ വിജയം. ഡേവിഡ് സില്‍വ ഇരട്ടഗോളോടെ സിറ്റിടെ ഹീറോയായി. കെവിന്‍ ഡി ബ്രൂയ്‌നും സെര്‍ജിയോ അഗ്വേറോയുമാണ് മറ്റു സ്‌കോറര്‍മാര്‍. ഈ വിജയത്തോടെ ലീഗിലെ ഒന്നാംസ്ഥാനം സിറ്റി ഭദ്രമാക്കുകയും ചെയ്തു. തലപ്പത്തു നില്‍ക്കുന്ന സിറ്റിക്ക് 11 പോയിന്റിന്റെ വ്യക്തമായ ലീഡുണ്ട്.

എന്നാല്‍ കഴിഞ്ഞ കളിയില്‍ സിറ്റിയോട് തോറ്റ യുനൈറ്റഡ് ബോണ്‍മൗത്തിനെയാണ് എതിരില്ലാത്ത ഒരു ഗോളിനു മറികടന്നത്. റൊമേലു ലുക്കാക്കുവിന്റെ വകയായിരുന്നു ഡെവിള്‍സിന്റെ വിജയഗോള്‍. മറ്റു മല്‍സരങ്ങളില്‍ എവര്‍ട്ടന്‍ 1-0ന് ന്യൂകാസിലിനെയും ലെസ്റ്റര്‍ 4-1ന് സതാംപ്റ്റനെയും ടോട്ടനം 2-0ന് ബ്രൈറ്റണിനെയും തോല്‍പ്പിച്ചു. ആഴ്‌സനല്‍-വെസ്റ്റ്ഹാം മല്‍സരം ഗോള്‍രഹിതമായി പിരിയുകയായിരുന്നു.

ജര്‍മന്‍ ലീഗ് ഫുട്‌ബോളില്‍ നിലവിലെ ജേതാക്കളും പോയിന്റ് പട്ടികയിലെ ഒന്നാംസ്ഥാനക്കാരുമായ ബയേണ്‍ മ്യൂണിക്ക് 1-0ന് കൊളോണിനെ പരാജയപ്പെടുത്തി.