തോട് വൃത്തിയാക്കാനിറങ്ങിയ തൊഴിലാളിയെ കാണാതായ സംഭവം: മാലിന്യക്കൂമ്പാരത്തിൽ തിരച്ചിൽ

തിരുവനന്തപുരം: തിരുവനന്തപുരം റെയിൽ വേ സ്റ്റേഷന് സമീപത്തെ തോട് വൃത്തിയാക്കാൻ ഇറങ്ങിയ ആളെ കാണാതായിട്ട് മണിക്കൂറുകൾ പിന്നിടുമ്പോഴും കണ്ടെത്താൻ സാധിച്ചിട്ടില്ല. ഫയർ ഫോഴ്സ് എത്തിയിട്ടുണ്ടെങ്കിലും തൊഴിലാളിയെ ഇതുവരെ കണ്ടെത്താനായിട്ടില്ല. നിലവിൽ സ്കൂബ ഡൈവിം​ഗിൽ പരിശീലനം നേടിയ ഫയർഫോഴ്സ് അം​ഗങ്ങളാണ് തിരച്ചിൽ നടത്തുന്നത്. ഇവർ 200 മീറ്ററോളം അകത്തേക്ക് പോയിട്ടും തൊഴിലാളിയെ കണ്ടെത്താനായിട്ടില്ല. മാലിന്യം നീക്കിയ ശേഷമാണ് മുങ്ങൽ വിദ​ഗ്ധർ പരിശോധന നടത്തുന്നത്. ട്രാക്കിനിടിയിലെ മാൻഹോളിലും പരിശോധന നടത്താനുള്ള ശ്രമത്തിലാണ് സംഘം.

കാണാതായ സ്ഥലത്ത് തന്നെ വീണ്ടും പരിശോധിക്കാനുള്ള നീക്കം നടത്തുകയാണ്. വല കെട്ടി റോപ്പ് ചുറ്റി മാലിന്യം എടുത്ത് മാറ്റണം. ​ഗ്രീൻ നെറ്റ് മുറിച്ച് മാറ്റിയായിരിക്കും മാലിന്യം നീക്കം ചെയ്യുക. മാലിന്യക്കൂമ്പാരം രക്ഷാപ്രവർത്തിന് ബുദ്ധിമുട്ട് ആവുന്നുണ്ട്. ഇത് നീക്കം ചെയ്താൽ‌ മാത്രമെ രക്ഷാപ്രവർത്തനം നടത്താനാവൂ എന്നാണ് ഫയർ ഫോഴ്സ് പറയുന്നത്. മാലിന്യം മാറ്റാനുള്ള ശ്രമം ഒരു ഭാ​ഗത്ത് നടക്കുന്നുണ്ട്.

ആമയിഴ‍്ഞ്ചാൻ തോടിന് 12 കിലോ മീറ്റർ നീളമാണ് ഉള്ളത്. റെയിൽവേ ലൈൻ കടന്ന് പോകുന്ന വഴിയിൽ സ്റ്റേഷന് കുറുതെ തോട് കടന്നുപോകുന്നുണ്ട്. സ്റ്റേഷന് കുറുകെ ട്രാക്കിനടിയിൽ കൂടെ പോകുന്ന ഭാ​ഗത്തിന് വീതിയില്ല. ടണൽ പോലെയാണ് ഇവിടെ. ഇത് രക്ഷാ പ്രവർത്തനത്തിന് വെല്ലുവിളി ആവുന്നുണ്ട്. ആമയിഴ‍്ഞ്ചാൻ തോട് വൃത്തിയാക്കാൻ ഇറങ്ങിയ ആളെയാണ് കാണാതായത്.