വനിത പ്രവര്‍ത്തകയോട് മോശമായി പെരുമാറി; ഡിവൈഎഫ്‌ഐ നേതാവ് അഭിജിത്തിന് സസ്‌പെന്‍ഷന്‍

തിരുവനന്തപുരം: വനിത പ്രവര്‍ത്തകയോട് മോശമായി പെരുമാറിയെന്ന പരാതിയില്‍ ഡി വൈ എഫ് ഐ നേതാവ് ജെ ജെ അഭിജിത്തിനെ പാര്‍ട്ടി പ്രാഥമിക അംഗത്വത്തില്‍ നിന്ന് സസ്‌പെന്‍ഡ് ചെയ്തു. നേരത്തെ വനിത പ്രവര്‍ത്തകയുടെ പരാതിയില്‍ ബ്രാഞ്ച് കമ്മിറ്റിയിലേക്ക് തരം താഴ്ത്തിയിരുന്നു.

അതേസമയം , അഭിജിത്തിന്റെ പേരില്‍ നേരത്തെ മറ്റൊരു വിവാദവും പുറത്തുവന്നിരുന്നു. എസ് എഫ് ഐ ജില്ലാ സെക്രട്ടറിയാകുന്നതിന് വേണ്ടി അഭിജിത്ത് പ്രായം കുറച്ചുകാട്ടിയെന്ന ആരോപണമാണ് ഉയര്‍ന്നത്. സി പി എം ജില്ലാ സെക്രട്ടറി ആനവൂര്‍ നാഗപ്പന്റെ നിര്‍ദ്ദേശ പ്രകാരമാണ് താന്‍ പ്രായം കുറച്ചതെന്നാണ് അഭിജിത്തിന്റെ പേരില്‍ പുറത്തുവന്ന ശബ്ദ രേഖയില്‍ പറയുന്നത് .

തന്റെ യതാര്‍ത്ഥ പ്രായം 30 ആണെന്നും പല പ്രായത്തിനുള്ള സര്‍ട്ടിഫിക്കറ്റ് തന്റെ കയ്യിലുണ്ടെന്നും ശബ്ദ സംഭാഷണത്തില്‍ പറയുന്നു. പ്രായം മാറി മാറി പറയുന്നതിന് വേണ്ടിയാണ് ഇത്തരം സര്‍ട്ടിഫിക്കറ്റ് ഉണ്ടാക്കിയതെന്നും പറയുന്നു. കൂടാതെ പാര്‍ട്ടിയിലിപ്പോള്‍ തനിക്ക് വെട്ടാന്‍ ആരുമില്ലെന്നും വെട്ടിക്കളിക്കാന്‍ ആരെങ്കിലുമൊക്കെ വേണമെന്നും ഇയാള്‍ ശബ്ദ രേഖയില്‍ പറയുന്നുണ്ട്. ലഹരി വിരുദ്ധ ക്യാമ്പയിനില്‍ പങ്കെടുത്തിന് ശേഷം ബാറിലെത്തി മദ്യപിച്ചെന്ന് കാണിച്ച് അഭിജിത്തിനെതിരെ പാര്‍ട്ടി നടപടി എടുത്തിരുന്നു. ഇതിന് പിന്നാലെയാണ് ഇപ്പോള്‍ സസ്‌പെന്‍ഷന്‍.

നേരത്തെ പുറത്തുവന്ന അഭിജിത്തിന്റെ ശബ്ദ രേഖ

എനിക്കിപ്പോ എന്താ , മുപ്പത് . എന്റെ ഒറിജിനല്‍ പ്രായമാണ് ഞാന്‍ പറഞ്ഞത് . ഞാന്‍ പറത്ത് പറയണ പ്രായമല്ല. ഈ സംഘടനയില്‍ ഞാന്‍ നിന്നത് അതുകൊണ്ടാണ് . 26 വരയേ എസ് എഫ് ഐയില്‍ നില്‍ക്കാന്‍ പറ്റുള്ളൂ. ഈ വര്‍ഷം 30 ആയി. ഞാന്‍ ' 92 ആണ്. എന്റെ കയ്യില്‍ ' 92 ഉണ്ട്, '94 ഉണ്ട്, 95 ഉണ്ട് , സര്‍ട്ടിഫിക്കറ്റുകളേ. എന്നോട് നാഗപ്പന്‍ സാറ് പറഞ്ഞതാണ് ആര് ചോദിച്ചാലും ഇങ്ങനെ പറഞ്ഞാല്‍ മതിയെന്ന്. പ്രദീപ് സാറും എന്നോട് പറഞ്ഞു. എനിക്ക് ആര് ഇരിക്കുന്നു ഇവിടെ വെട്ടാന്‍. പണ്ടത്തെ പോലെ വെട്ടാന്‍ ആരും ഇല്ലാത്തതുകൊണ്ട് ഭയങ്കര സുഖം. ആരേലും വേണം വെട്ടിക്കളിക്കാനൊക്കെ .

English summary

DYFI leader JJ Abhijit has been suspended from the party's primary membership