മലയോര ഹൈവേ: വിതുരയിൽ യോഗം ചേർന്നു
വിതുര : വിതുര പഞ്ചായത്ത് പ്രദേശത്തു കൂടി കടന്ന് പോകുന്ന മലയോര ഹൈവേയുടെ നിർമ്മാണ പ്രവർത്തനങ്ങളുടെ മുന്നോടിയായി വിതുര പഞ്ചായത്ത് തല യോഗം ചേർന്നു. സ്ഥലം ഏറ്റെടുക്കൽ ഉൾപ്പടെയുള്ള കാര്യങ്ങൾ വേഗത്തിൽ പൂർത്തിയാക്കി മലയോര ഹൈവേ നിർമ്മാണം സുഗമമായി പൂർത്തിയാക്കുന്നതിനായാണ് കെ.എസ്.
ശബരീനാഥൻ എംഎൽഎയുടെ നേതൃത്വത്തിൽ യോഗം ചേർന്നത്. തെന്നൂർ തോട്ടംമുക്ക് മുതൽ മേലെ കൊപ്പം വരെയും വിതുര കലുങ്ക് ജംഗ്ഷൻ മുതൽ ഇരുത്തലമൂല വരെയുമാണ് മലയോര ഹൈവേ കടന്ന് പോകുന്ന പ്രദേശങ്ങൾ. ഇതിൽ പലയിടത്തും സ്ഥലം ഏറ്റെടുക്കേണ്ടതായുണ്ട്. ഇതിന് ത്രിതല പഞ്ചായത്തുകളുടെയും രാഷ്ട്രീയ കക്ഷി നേതാക്കളുടെയും നാട്ടുകാരുടെയും എല്ലാവിധ സഹകരണവും ഉണ്ടാകണമെന്ന് എംഎൽഎ ആവശ്യപ്പെട്ടു.
വിതുര പൊതുമരാമത്ത് റസ്റ്റ് ഹൗസിൽ നടന്ന യോഗത്തിൽ എംഎൽഎയെ കൂടാതെ പൊതുമരാമത്ത് അസിസ്റ്റൻറ് എക്സിക്യൂട്ടീവ് എൻജിനീയർ ടി.എസ് ജയരാജ്, അസിസ്റ്റന്റ് എൻജിനീയർ ആനന്ദ് വി.എസ്, വിതുര പഞ്ചായത്ത് പ്രസിഡന്റ് എസ്.എൽ. കൃഷ്ണകുമാരി, ബ്ലോക്ക് പഞ്ചായത്ത് മെമ്പർ എൽ.വി.വിപിൻ, ഗ്രാമ പഞ്ചായത്ത് അംഗങ്ങൾ, രാഷ്ട്രീയ കക്ഷി നേതാക്കൾ,വ്യാപാരി വ്യവസായി പ്രതിനിധികൾ, റസിഡന്റ് അസോസിയേഷൻ നേതാക്കൾ തുടങ്ങിയവർ പങ്കെടുത്തു.
Comments
English summary
Hilly area highways; Meeting in vithura,