​മഴയ്ക്ക് താൽക്കാലിക ശമനം, വരും ദിവസങ്ങളിൽ കൂടുതൽ മഴ പ്രതീക്ഷിക്കാമെന്ന് കാലാവസ്ഥാ വകുപ്പിന്റെ മുന്നറിയിപ്പ്

​തിരുവനന്തപുരം : സംസ്ഥാനത്ത് ഇന്നും ഒറ്റപ്പെട്ടയിടങ്ങളിൽ മഴയ്ക്കുള്ള സാധ്യത പ്രവചിച്ച് കേന്ദ്ര കാലാവസ്ഥാ വകുപ്പ്. അതേ സമയം ഒരു ജില്ലയിലും പ്രത്യേക മഴ മുന്നറിയിപ്പ് നൽകിയിട്ടില്ല. എന്നാൽ മലയോര മേഖലകളിലും മറ്റും താമസിക്കുന്നവർ ഈ മേഖലകളിൽ ജാ​ഗ്രത തുടരേണ്ടതാണ്. വരും മണിക്കൂറുകളിൽ അറബിക്കടലിൽ ചക്രവാതച്ചുഴി ന്യൂനമർദ്ദമായി മാറുമെന്നാണ് കേന്ദ്ര കാലാവസ്ഥാ വകുപ്പ് അറിയിക്കുന്നത്. എന്നാൽ പിന്നീട് ഇവയ്ക്ക് ശക്തി കൂടി തീവ്ര ന്യൂന മർദ്ദമായി മാറും. മധ്യ ബം​ഗാൾ ഉൾക്കടലിലും കൂടി ശനിയാഴ്ച്ചയോടെ ന്യൂനമർദ്ദം രൂപപ്പെടുമെന്നാണ് കണക്കു കൂട്ടുന്നത്.

ഇതിന്റെയൊക്കെ ഫലമായി സംസ്ഥാനത്ത് വരും ദിവസങ്ങളിൽ കൂടുതൽ മഴ പ്രതീക്ഷിയ്ക്കാമെന്നാണ് കേന്ദ്ര കാലാവസ്ഥാ വകുപ്പ് അറിയിക്കുന്നത്. അതേ സമയം അടുത്ത 3 മണിക്കൂറിൽ കേരളത്തിലെ തിരുവനന്തപുരം, കൊല്ലം, പത്തനംത്തിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

ഇന്നലെ രണ്ട് ഘട്ടങ്ങളിലായി അടുത്ത 3 മണിക്കൂറിൽ കേരളത്തിലെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ നേരിയതോ മിതമായതോ ആയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിരുന്നു. എന്നാൽ ഈ യെല്ലോ അലേർട്ട് 3 മണിക്കൂറുകളിലേക്ക് മാത്രം സാധുതയുള്ളതായിരുന്നു. പിന്നീട് ഇത് പിൻവലിച്ചു.

ഇക്കഴിഞ്ഞ 3 ദിവസങ്ങളിലായി ശക്തി പ്രാപിച്ച മഴ ചെറിയ തോതിൽ തിരുവനന്തപുരത്ത് ഇപ്പോഴും തുടരുന്ന അവസ്ഥയാണ്. ഒക്ടോബർ 17 രാത്രി തിരുവനന്തപുരം ന​ഗരത്തിൽ മഴ പെയ്തിരുന്നു. ഇന്നും അന്തരീക്ഷം മേഘാവൃതമാണ്. അതേ സമയം ടെക്നോപാർക്കിലും കഴക്കൂട്ടത്തും ടെക്നോപാർക്കിലും മഴക്കെടുതിയിലുണ്ടായ വെള്ളക്കെട്ട് ഇറങ്ങിത്തുടങ്ങി. വൈദ്യുത തടസവും മറ്റു സാങ്കേതിക പ്രശ്നങ്ങളും പരിഹരിച്ചതായി അധികൃതർ അറിയിച്ചിരുന്നു.

English summary

Kerala Rain Alerts : IMD Forecasts Rain will continue after some days