തെങ്ങുകയറ്റ തൊഴിലാളി ദുരൂഹ സാഹചര്യത്തിൽ മരിച്ച നിലയിൽ: സംഭവം തിരുവനന്തപുരത്ത്!

ചിറയിൻകീഴ്: തെങ്ങ്കയറ്റ തൊഴിലാളിയെ ബാറിന് സമീപം ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. കടയ്ക്കാവൂ‌ർ കൊച്ചുതിട്ട വയലിൽ സ്വദേശി ബിനുവിനെയാണ് (47) ചിറയിൻകീഴിലെ ബാറിന് സമീപത്തെ മുത്തൂറ്റ് ശാഖയ്ക്ക് സമീപത്ത് മരിച്ച നിലയിൽ കണ്ടെത്തിയത്. ഇന്ന് രാവിലെ വഴിയാത്രക്കാരാണ് മൃതദേഹം കണ്ട വിവരം പൊലീസിനെ അറിയിച്ചത്. മൃതദേഹത്തിലും സമീപത്തെ ആധാരം എഴുത്ത് ഓഫീസിലേക്കുള്ള ഇടവഴിയിലും രക്തം കാണപ്പെട്ടിട്ടുണ്ട്.

ശരീരത്ത് അങ്ങിങ്ങായി പരിക്കേറ്റ പാടുകളുണ്ട്. പരിക്കുകളുടെ സ്വഭാവവും സാഹചര്യങ്ങളും പരിശോധിച്ച പൊലീസിന് സംശയം തോന്നിയതിനാൽ ഡോഗ് സ്ക്വാഡ്, ഫിംഗർ പ്രിന്റ് വിദഗ്ദർ എന്നിവരുടെ സഹായം പൊലീസ് തേടിയിട്ടുണ്ട്. ഫോറൻസിക് വിദഗ്ദ്ധരെത്തി പരിശോധിച്ചശേഷം മൃതദേഹം പോസ്റ്റുമോർട്ടത്തിനായി മെഡിക്കൽ കോളേജ് ആശുപത്രിയിലേക്ക് മാറ്റും. മദ്യപാനിയായ ബിനുവും ചിലരുമായി വാക്കേറ്റമുണ്ടായതായ സൂചനകൾ പൊലീസിന് ലഭിച്ചിട്ടുണ്ട്.

ഇതേ തുടർന്നുള്ള ആക്രമണത്തിൽ ഇയാൾകൊല്ലപ്പെട്ടതാകാമെന്നാണ് പൊലീസിന്റെ നിഗമനം. സംഭവത്തെപ്പറ്റിയുള്ള അന്വേഷണത്തിന്റെ ഭാഗമായി ബാറിലേയും സമീപത്തെ ചില സ്ഥാപനങ്ങളിലേയും സി.സി.ടി.വി കാമറകൾ പൊലീസ് പരിശോധിക്കുന്നുണ്ട്. ഇയാൾക്കൊപ്പം മദ്യപിക്കാനെത്തിയവരെ കണ്ടെത്തുകയാണ് പൊലീസിന്റെ ലക്ഷ്യം. ബാർ ജീവനക്കാർ, സെക്യൂരിറ്റി, സമീപത്തെ വ്യാപാരികൾ എന്നിവരിൽ നിന്ന് പൊലീസ് വിവരങ്ങൾ ശേഖരിച്ചുവരികയാണ്.

English summary

labourer found dead in thiruvananthapuram