തിരുവനന്തപുരത്ത് കടലാക്രമണം; ആറ് വീടുകൾ പൂർണമായും തകർന്നു, 37 കുടുംബങ്ങളെ മാറ്റിപ്പാർപ്പിച്ചു

Updated: Tuesday, June 13, 2023, 2:13 [IST]

തിരുവനന്തപുരം: തിരുവനന്തപുരത്ത് തീരദേശ മേഖലയിൽ കടലാക്രമണം. പൊഴിയൂരിൽ തിരയടിച്ച് ആറ് വീടുകൾ പൂർണമായും നാല് വീടുകൾ ഭാഗികമായും തകർന്നു. കടൽ പ്രക്ഷുബ്ദ്ധമായി തുടരുന്നതിനാൽ കടലെടുക്കാൻ സാധ്യതയുള്ള വീടുകളിലെ 37 കുടുംബങ്ങളെ മാറ്റി താമസിപ്പിച്ചു.

ഇവരെ ബന്ധുവീടുകളിലും ക്യാംപുകളിലേയ്ക്കും ആണ് മാറ്റിയത്. ഏഴ് കുടുംബങ്ങളാണ് നിലവിൽ ക്യാംപിൽ ഉള്ളത്. കൂടുതൽ പേരെ പ്രദേശത്ത് നിന്ന് ഒഴിപ്പിക്കാനാണ് സാധ്യതക. കൊല്ലംകോട് നിന്നും തമിഴ്നാട് നീരോടിലേയ്ക്ക് പോകുന്ന റോഡിന്റെ ഒരു കിലോമീറ്ററോളം ഭാഗം പൂർണമായും കടലെടുത്തു.

പ്രതീകാത്മക ചിത്രം

ബുധനാഴ്ച വരെ തെക്കൻ ജില്ലകളിൽ ഒറ്റപ്പെട്ട ശക്തമായ മഴ ലഭിക്കും എന്നാണ് കാലാവസ്ഥ വകുപ്പ് നൽകുന്ന സൂചന. മധ്യ കിഴക്കൻ അറബിക്കടലിന്‌ മുകളിൽ ബിപോർജോയ് ചുഴലിക്കാറ്റ് അതിശക്തമായ ചുഴലിക്കാറ്റായി രൂപം പ്രാപിച്ചിരിക്കുകയാണ് .

ബിപോർജോയ് 14 വരെ വടക്ക് ദിശയിലാണ് സഞ്ചരിക്കുന്നത്. സംസ്ഥാനത്ത് വരുംദിവസങ്ങളിലും ശക്തമായ മഴയ്ക്കും കടലാക്രമണത്തിനും സാധ്യതയുള്ളതായാണ് സമുദ്രസ്ഥിതി പഠന ഗവേഷണ കേന്ദ്രം നൽകുന്ന മുന്നറിയിപ്പ്.

ബിപോർജോയ് ചുഴലിക്കാറ്റ്‌ മധ്യകിഴക്കൻ അറബികടലിന് മുകളിൽ സ്ഥിതി ചെയ്യുന്നതിനാൽ കേരളത്തിൽ അടുത്ത ദിവസങ്ങളിൽ അതിശക്തമായ മഴ ലഭിക്കാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.

അടുത്ത 5 ദിവസങ്ങളിൽ വ്യാപകമായി ഇടിയോടു കൂടിയ മഴയ്ക്ക് സാധ്യതയുണ്ടെന്നുമാണ് അറിയിപ്പ്. മഴ പ്രവചനത്തിന്റെ സാഹചര്യത്തിൽ ഇന്നും നാളെയും വിവിധ ജില്ലകളിൽ മഞ്ഞ അലർട്ട് പ്രഖ്യാപിച്ചിട്ടുണ്ട്.

കേരളത്തിൽ അടുത്ത ദിവസങ്ങളിൽ മഴ കനക്കുമെന്നും പൊതുജനങ്ങൾ ജാഗ്രത പാലിക്കണമെന്നും മുഖ്യമന്ത്രിയുടെ ഓഫീസ് അറിയിച്ചിരുന്നു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, കോഴിക്കോട് ജില്ലകളിൽ കഴിഞ്ഞ ദിവസം അലേർട്ട് പ്രഖ്യാപിച്ചിരുന്നു.

ആലപ്പുഴ, എറണാകുളം, തൃശ്ശൂർ, കോഴിക്കോട്, കണ്ണൂർ ജില്ലകളിൽ ചൊവ്വാഴ്ചയാണ് മഞ്ഞ അലർട്ട് പ്രഖ്യാപിച്ചിരിക്കുന്നത്. അടുത്ത 4 ദിവസം കേരളതീരത്ത് കാറ്റിന്റെ ശക്തി മണിക്കൂറിൽ 40 മുതൽ 45 കിലോമീറ്റർ വേഗതയിലാകാനും കടൽ പ്രക്ഷുബ്ദ്ധമാകാനും സാധ്യതയുണ്ട്.

മത്സ്യത്തൊഴിലാളികൾ യാതൊരു കാരണവശാലും കടലിൽ പോകാൻ പാടുള്ളതല്ല. മഴയോടൊപ്പം ഇടിമിന്നലും കാറ്റിനും സാധ്യതയുള്ളതിനാൽ പൊതുജനങ്ങൾ അതീവ ശ്രദ്ധ പാലിക്കേണ്ടതുണ്ടെന്നും മുനു്നറിയിപ്പ് നൽകുന്നു.