'നന്ദിയാൽ പാടുന്നു ദൈവമേ'; വീണ്ടും ഭക്തി​ഗാനം പാടി സുരേഷ് ​ഗോപി, വൈറലായി വീഡിയോ

തിരുവനന്തപുരം: സിസ്റ്റർമാരുടെ മുൻ‌പിൽ താൻ പാടിയ ക്രിസ്തീയ ഭക്തി ​ഗാനം വീണ്ടും പാടി കേന്ദ്രമന്ത്രി സുരേഷ് ​ഗോപി. തിരുവനന്തപുരം ഹോളി ഏയ്ഞ്ചൽസ് കോൺവെന്റിലെ സിസ്റ്റർമാരുടെ മുന്നിലാണ് അദ്ദേഹം പാട്ട് പാടിയത്. നന്ദിയാൽ പാടുന്നു ദൈവമേ എന്ന ഭക്തി ​ഗാനമാണ് അദ്ദേഹം പാടിയത്. ഭക്തി ​ഗാനം പാടിയ ശേഷം അദ്ദേഹം കുരിശ് വരച്ച് പ്രാർ‌ത്ഥിച്ചു. നേരത്തെ തൃശൂർ ലൂർദ് മാതാ പള്ളിയിൽ മാതാവിന് സ്വർണ കൊന്ത സമർപ്പിച്ചപ്പോൾ സുരേഷ് ​ഗോപി ഈ ​ഗാനം പാടിയിരുന്നു.

സുരേഷ് ​ഗോപിയും ഭാര്യ രാധികയും പാടിയ യേശുദേവന്റെ പീഡാനുഭവങ്ങൾ വിവരിക്കുന്ന ഈസ്റ്റർ ​ഗാനമാണ് നന്ദിയാൽ പാടുന്നു ദൈവമേ എന്ന ​ഗാനം. ദുഖവെള്ളിയുമായി ബന്ധപ്പെട്ട് ക്രിസ്തു ദേവന്റെ ത്യാ​ഗത്തെ ഓർമിപ്പിക്കുന്നതാണ് ​ഗാനിത്തിലെ വരികൾ. യേശു ദേവൻ മൂന്നാം നാൾ ഉയർത്തെഴുന്നേൽക്കുമ്പോൾ പാപമായ അന്ധകാരം മറഞ്ഞകന്നതും ആ ത്യാ​ഗ മനോഭാവത്തിന് മുന്നിൽ നമിക്കുന്നതുമാണ് ​ഗാനത്തിന്റെ അവസാന വരികൾ. ഫാദർ ഡോയ ജോയൽ പണ്ടാരപ്പറമ്പിലിന്റെ വരികൾക്ക് ജേക്സ് ബിജോയി ആണ് സം​ഗീതം നൽകിയത്.

തൃശിരിൽ മികച്ച വിജയമാണ് ബി ജെ പിക്ക് വേണ്ടി മത്സരിച്ച സുരേഷ് ​ഗോപി സ്വന്തമാക്കിയത്. സുരേഷ് ​ഗോപിയുടെ വിജയം ബി ജെ പിക്ക് വൻ നേട്ടമായിരുന്നു. വിജയത്തിന് പിന്നാലെയാണ് കഴിഞ്ഞ മാസം സുരേഷ് ​ഗോപി പള്ളിയിലെത്തി സ്വർണ കൊന്ത സമർപ്പിച്ചത്. ഇതിന് ശേഷം അദ്ദേഹം ഭക്തി ​ഗാനം മാതാവിന് മുന്നിൽ ആലപിച്ചു. തിരഞ്ഞെടുപ്പിലെ വിജയത്തിൽ നന്ദി അറിയിച്ച് കൊണ്ടായിരുന്നു സുരേഷ് ​ഗോപിയുടെ ലൂർദ് പള്ളിയിലെ സന്ദർശനം.

നന്ദി എന്ന് പറയുന്നത് ഹൃദയത്തിലാണ് ഉള്ളത് എന്നും അത് ഉൽപന്നങ്ങളിൽ അല്ലെന്നും ആണ് സ്വർണ കൊന്ത സമർപ്പിച്ചശേഷം സുരേഷ് ഗോപി പ്രതികരിച്ചത് . ഭക്തിപരമായ നിർവഹണത്തിൻറെ മുദ്രയാണ് സ്വർണ കൊന്ത എന്നും സുരേഷ് ഗോപി പറഞ്ഞിരുന്നു. കഴിഞ്ഞ ജനുവരിയിൽ മകളുടെ വിവാ​ഹത്തിന് മുൻപ് സുരേഷ് ​ഗോപി ലൂർ‌ദ് പള്ളിയി സ്വർണ കിരീടം സമർപ്പിച്ചിരുന്നു. ഭാര്യയ്ക്കും മകൾക്കും ഒപ്പമെത്തിയാണ് സമർപ്പിച്ചത്. എന്നാൽ ഇത് വിവാദം ആകുകയും ചെയ്‌തിരുന്നു. കിരീടത്തിന്റെ തൂക്കം സംബന്ധിച്ച് ആയിരുന്നു ആക്ഷേപം.