അടിയന്തര വിദഗ്ധ ചികിത്സ ഉറപ്പാക്കുക ലക്ഷ്യം; പുതിയ സംവിധാനം ഏര്പ്പെടുത്തി വീണാ ജോര്ജ്
തിരുവനന്തപുരം: തിരുവനന്തപുരം മെഡിക്കല് കോളേജില് അത്യാഹിത വിഭാഗത്തിൽ എത്തുന്നവര്ക്ക് കാല താമസം ഇല്ലാതെ അടിയന്തര വിദഗ്ധ ചികിത്സ ഉറപ്പാക്കാന് പുതിയ സംവിധാനം ഏര്പ്പെടുത്തുന്നു. ആരോഗ്യ വകുപ്പ് മന്ത്രി വീണാ ജോര്ജിന്റെ നിരന്തര ഇടപെലുകളെ തുടര്ന്നാണ് പുതിയ സംവിധാനം വരുന്നത്.
മെഡിക്കല് കോളേജിന്റെ സേവനം മെച്ചപ്പെടുത്തുന്നതിന് ഒരു വിദഗ്ധ കമ്മിറ്റി രൂപീകരിച്ചിരുന്നു. ഈ കമ്മിറ്റി അത്യാഹിത വിഭാഗത്തില് ചികിത്സയ്ക്കെത്തുന്നവര്ക്ക് സമയം ഒട്ടും വൈകാതെ എങ്ങനെ ഫലപ്രദമായി ചികിത്സ ലഭ്യമാക്കാം എന്ന് പഠനം നടത്തി.
ഇതിന്റെ അടിസ്ഥാനത്തിൽ ആണ് പുതിയ സംവിധാനം ഏര്പ്പെടുത്തിയത്. അപകടത്തില്പെട്ട് വരുന്ന രോഗികള്ക്കും മറ്റ് രോഗങ്ങളുമായി വരുന്നവര്ക്കും ഈ സേവനം ലഭ്യമാകും. ഇവര്ക്കുള്ള സര്ജറി, തീവ്രപരിചരണം എന്നിവ ഒട്ടും കാലതാമസം വരുത്താതിരിക്കാനാണ് പുതിയ സംവിധാനം.
മന്ത്രിയുടെ കര്ശന നിര്ദേശത്തെ തുടര്ന്ന് അത്യാഹിത വിഭാഗത്തില് 24 മണിക്കൂറും സീനിയര് ഡോക്ടര്മാരുടെ സേവനം ഉറപ്പ് വരുത്തിയിട്ടുണ്ട്. ഇതുകൂടാതെയാണ് പുതിയ സംവിധാനം വരുന്നത്. മെഡിക്കല് കോളേജില് ചെസ്റ്റ് പെയിന് ക്ലിനിക് ആരംഭിക്കുന്നതാണ്. നെഞ്ച് വേദനയുമായും മറ്റ് ഹൃദസംബന്ധമായ അസുഖങ്ങളുമായും വരുന്നവര്ക്ക് ഉടനടി ചികിത്സ ലഭ്യമാക്കുകയാണ് ലക്ഷ്യം. ഇവരെ പെട്ടന്ന് കാര്ഡിയോളജി വിഭാഗത്തിലേക്ക് മാറ്റി അടിയന്തര ചികിത്സ നല്കും. കാലതാമസമില്ലാതെ ആവശ്യമായവര്ക്ക് ഐ.സി.യു, ആന്ജിയോഗ്രാം, ആന്ജിയോപ്ലാസ്റ്റി ചികിത്സകള് നല്കും.
ഇത് കൂടാതെ അപകടങ്ങളില്പ്പെട്ട് അതീവ ഗുരുതരാവസ്ഥയില് എത്തുന്ന രോഗികള്ക്ക് ചികിത്സ ഒട്ടും വൈകാതിരിക്കാന് ചുവപ്പ് ടാഗ് നല്കും. ചുവപ്പ് ടാഗ് ഉള്ളവര്ക്ക് എക്സ്റേ, സ്കാന് തുടങ്ങിയ പരിശോധനകള്ക്കുള്പ്പെടെ ക്യൂ ഇല്ലാതെ ആദ്യ പരിഗണന നല്കും. സര്ജറി വിഭാഗത്തിന് കീഴില് മറ്റ് വിഭാഗങ്ങളുടെ സഹകരണത്തോടെ ഉടനടി വിദഗ്ധ ചികിത്സ ഉറപ്പാക്കും. ശസ്ത്രക്രിയ വേണ്ടവര്ക്ക് അടിയന്തരമായി ശസ്ത്രക്രിയയും നടത്തും.
അതേസമയം, മെഡിക്കല് കോളേജില് കാരുണ്യ ഫാര്മസിയില് മരുന്നുകള് ലഭ്യമല്ലാത്ത കാരണത്താല് കാരുണ്യ ഡിപ്പോ മാനേജറെ അന്വേഷണ വിധേയമായി ആരോഗ്യമന്ത്രി വീണാ ജോർജ് സസ്പെന്ഡ് ചെയ്തിരുന്നു. കഴിഞ്ഞ ദിവസമാണ് സംഭവം നടന്നത്. ആരോഗ്യമന്ത്രി കാരുണ്യ ഫാര്മസി സന്ദര്ശിച്ചിരുന്നു. രോഗിയുടെ കുറിപ്പിലുണ്ടായിരുന്ന ഒരു മരുന്നും കാരുണ്യ ഫാര്മസിൽ ഇല്ലായിരുന്നു.
ഫാര്മസിയ്ക്ക് അകത്ത് കയറി കമ്പ്യൂട്ടറിലെ മരുന്നുകളുടെ ലിസ്റ്റ് പരിശോധിച്ചിരുന്നു. അത്യാവശ്യ മരുന്നുകള് കൃത്യമായി സ്റ്റോക്ക് ചെയ്യാന് വീഴ്ച വരുത്തിയ ഉദ്യോഗസ്ഥര്ക്കെതിരെ കര്ശന നടപടിയെടുക്കാന് കെ.എം.എസ്.സി.എല്.നോട് മന്ത്രി നിര്ദേശം നല്കുകയായിരുന്നു. ഇതിന് പിന്നാലെ ഡിപ്പോ മാനേജറെ സസ്പെന്ഡ് ചെയ്തിരുന്നു.
Click it and Unblock the Notifications
Sign in with Google