രണ്ടു സ്ത്രീകള് ഉള്പ്പെടെ തൃശൂരില് മൂന്ന് പേര്ക്ക് കൊറോണ; 144 പേര് ആശുപത്രികളില്
തൃശൂര്: ജില്ലയില് മൂന്ന് പേര്ക്ക് കൂടി കോവിഡ് സ്ഥിരീകരിച്ചു. ജൂണ് 12 ന് കുവൈറ്റില് നിന്ന് വന്ന വെള്ളറക്കാട് സ്വദേശിയായ നാല്പത്തിയാറുകാരന്, ചൂലിശ്ശേരി സ്വദേശികളായ 45, 25 പ്രായമുളള രണ്ട് സ്ത്രീകള് എന്നിവരടക്കം മൂന്ന് പേര്ക്കാണ് രോഗം സ്ഥിരീകരിച്ചിട്ടുള്ളത്. ജില്ലയില് കോവിഡ് 19 സ്ഥിരീകരിച്ച 144 പേരാണ് ആശുപത്രികളില് ചികിത്സയില് കഴിയുന്നത്. തൃശൂര് സ്വദേശികളായ 10 പേര് മറ്റു ജില്ലകളില് രോഗം സ്ഥിരീകരിച്ച് ആശുപത്രികളില് കഴിയുന്നുണ്ട്.
കോവിഡ് പ്രതിരോധത്തിന്റെ ഭാഗമായി ജില്ലയില് വീടുകളില് 12208 പേരും ആശുപത്രികളില് 201 പേരും ഉള്പ്പെടെ ആകെ 12409 പേരാണ് നിരീക്ഷണത്തിലുളളത്. തിങ്കളാഴ്ച നിരീക്ഷണത്തിന്റെ ഭാഗമായി 18 പേരെ ആശുപത്രിയില് പ്രവേശിപ്പിച്ചു. 10 പേരെ ഡിസ്ചാര്ജ്ജ് ചെയ്തു.
നിരീക്ഷണത്തില് കഴിയുന്നവരുടെ പട്ടികയില് 946 പേരെയാണ് പുതുതായി ചേര്ത്തിട്ടുളളത്. 1311 പേരെ നിരീക്ഷണ കാലഘട്ടം പൂര്ത്തീകരിച്ചതിനെത്തുടര്ന്ന് പട്ടികയില് നിന്നും വിടുതല് ചെയ്തു.
തിങ്കളാഴ്ച അയച്ച 220 സാമ്പിളുകള് ഉള്പ്പെടെ ഇതു വരെ 5829 സാമ്പിളുകള് പരിശോധനയ്ക്ക് അയച്ചു. അതില് 4577 സാമ്പിളുകളുടെ ഫലം വന്നിട്ടുണ്ട്. 1252 എണ്ണത്തിന്റെ ഫലം ലഭിക്കാനുണ്ട്. വിവിധ മേഖലയിലുളള 2090 ആളുകളുടെ സാമ്പിളുകള് പരിശോധനയ്ക്ക് അയച്ചു.
605ഫോണ്കോളുകള് ജില്ലാ കണ്ട്രോള് സെല്ലില് ലഭിച്ചു. ഇതുവരെ ആകെ 37662 ഫോണ് വിളികളാണ് ജില്ലാ കണ്ട്രോള് സെല്ലിലേക്ക് വന്നത്. നിരീക്ഷണത്തിലുളളവര്ക്ക് മാനസിക പിന്തുണയേകുന്നതിനായി സൈക്കോ-സോഷ്യല് കൗണ്സിലര്മാരുടെ സേവനം തുടരുന്നുണ്ട്. ഇന്ന് 120 പേര്ക്ക് കൗണ്സലിംഗ് നല്കി. റെയില്വേ സ്റ്റേഷനുകളിലും ബസ് സ്റ്റാന്ഡുകളിലുമായി 529 പേരെ സ്ക്രീന് ചെയ്തു.
Click it and Unblock the Notifications
Sign in with Google