വികസനത്തിന്‌ ജനം വോട്ട്‌ ചെയ്യും; ഇടതുപക്ഷം മികച്ച വിജയം നേടുമെന്ന് എ വിജയരാഘവൻ, യുഡിഎഫിന് വിമർശനം!!

തൃശ്ശൂർ: തദ്ദേശ തിരഞ്ഞെടുപ്പിൽ ഇടത് മുന്നണി മികച്ച വിജയം നേടുമെന്ന് സിപിഎം സംസ്ഥാന സെക്രട്ടറിയും ഇടത് മുന്നണി കൺവീനറുമായ എ വിജയരാഘവൻ. സർക്കാരിന്റെ വികസനം ജനങ്ങൾക്ക് ആത്മവിശ്വാസം നൽകിയിട്ടുണ്ട്. വികസനത്തിന് ജനം വോട്ട് ചെയ്യും വലിയ തിരഞ്ഞെടുപ്പ് വിജയമാണ് എൽഡിഎഫിന് ഇത്തവണയുണ്ടാകുക.

യുഡിഎഫ് അപവാദങ്ങൾ പ്രചരിപ്പിക്കുന്നതിനായി തിരഞ്ഞെടുപ്പ് പ്രചാരണത്തെ വേദിയാക്കുകയാണെന്നും അദ്ദേഹം പറഞ്ഞു. തദ്ദേശ തിരഞ്ഞെടുപ്പിൽ തൃശ്ശൂർ കേരള വർമ കോളേജിൽ വോട്ട് രേഖപ്പെടുത്തിയ ശേഷം സംസാരിക്കുകയായിരുന്നു അദ്ദേഹം.

മുഖ്യമന്ത്രിയെ വ്യക്തിഹത്യ നടത്തി, ഒറ്റതിരിഞ്ഞ് മുഖ്യമന്ത്രിയെ ആക്രമിച്ചു, കൊല്ലത്ത് സിപിഎം പ്രവർത്തകനെ കൊലപ്പെടുത്തി, തിരഞ്ഞെടുപ്പ് കാലത്ത് സമാധാന അന്തരീക്ഷം തകർക്കാനും ശ്രമം നടത്തി. ബിജെപി മുതൽ ജമാഅത്തെ ഇസ്ലാമി വരെയുള്ള കൂട്ട് യുഡിഎഫും ഉണ്ടാക്കി. മതനിരപേക്ഷ മൂല്യങ്ങൾ ഉയർത്തിപ്പിടിച്ച് എൽഡിഎഫിന് ജനങ്ങൾ വോട്ട് ചെയ്യുമെന്നും കെ എം മാണിയെ പിന്നിൽ നിന്ന് ചതിച്ചത് ആരാണെന്ന് ജനങ്ങൾക്ക് അറിയാമെന്നും വിജയരാഘവൻ കൂട്ടിച്ചേർത്തു.

English summary

Kerala Local Body election: A Vijayaraghavan shares hopes on LDF's victory in poll