തൃശൂരിൽ കഴിഞ്ഞ തവണത്തെ വോട്ട് പോലും സുരേഷ് ഗോപിക്ക് ലഭിക്കില്ല; വിഎസ് സുനിൽ കുമാർ

തൃശൂരിൽ കഴിഞ്ഞ തവണത്തെ വോട്ട് പോലും സുരേഷ് ഗോപിക്ക് കിട്ടില്ലെന്ന് എൽ ഡി എഫ് സ്ഥാനാർത്ഥി വി എസ് സുനിൽ കുമാർ. കേരളത്തിൽ ബിജെപി രണ്ടക്കം കടക്കുമെന്ന പ്രധാനമന്ത്രി നരേന്ദ്രമോദിയുടെ അവകാശവാദമൊക്കെ മണ്ടത്തരമെന്നേ പറയാൻ സാധിക്കൂ. ഇവിടെ ബി ജെ പിക്ക് 10 സീറ്റ് പോയിട്ട് ഒരു സീറ്റ് പോലും ‌ലഭിക്കില്ല. ദക്ഷിണേന്ത്യയിൽ പോലും വിജയിക്കാൻ അവർക്കാകില്ല. ഇതൊക്കെ വെറും അവകാശവാദങ്ങൾ മാത്രമാണെന്നും അദ്ദേഹം പറഞ്ഞു. ട്രൂ കോപ്പി തിങ്കിന് നൽകിയ അഭിമുഖത്തിലാണ് അദ്ദേഹത്തിന്റെ പ്രതികരണം.

'തൃശൂരിൽ എൻ ഡി എ സ്ഥാനാർത്ഥിയെ അവതരിപ്പിക്കാൻ വേണ്ടി മീഡിയകളുടെ അടക്കം പിൻബലം ബി ജെ പിക്ക് ഉണ്ടായിട്ടുണ്ട്. എന്തോ സംഭവമാണെന്ന രീതിയിൽ വാർത്തകൾ കൊണ്ടുവരാൻ ശ്രമിച്ചിട്ടുണ്ട്. സോഷ്യൽ മീഡിയ കാമ്പെയ്നുകളും ആ നിലയ്ക്കാണ് നടത്തിയിട്ടുള്ളത്. പ്രധാനമന്ത്രിയടക്കം എത്തി ദേശീയ തലത്തിൽ തന്നെ തൃശൂർ ബി ജെ പിയുടെ പ്രധാന മണ്ഡലം ആണെന്ന തലത്തിലൊരു പ്രതീതി സൃഷ്ടിക്കാൻ ശ്രമിച്ചിട്ടുണ്ടെന്നത് വസ്തുതയാണ്. എന്നാൽ അതുകൊണ്ട് മാത്രം അവർക്ക് വിജയിക്കാനാകില്ല.

ആത്യന്തികമായി ജനങ്ങളെ വിശ്വസിച്ചുകൊണ്ടാണ് ഞങ്ങൾ പ്രചരണം നടത്തുന്നത്. അതുകൊണ്ട് അവരുടെ പ്രചരണ രീതികളൊന്നും ഞങ്ങളെ ഭയപ്പെടുത്തുന്നില്ല. അതേസമയം അധികാരം അവർക്കുണ്ട്. അതുകൊണ്ട് തന്നെ എന്തും അവർ ചെയ്തേക്കും.

ബി ജെ പിയുടെ നേതൃത്വത്തിലുള്ള എൻ ഡി എ പ്രവർത്തനത്തെക്കാൾ കൂടുതൽ മാധ്യമങ്ങൾ കൂടുതലായൊരു കവറേജ് അവർക്ക് കൊടുക്കുന്നുവെന്ന തോന്നൽ ഉണ്ട്. കലാകാരൻ എന്നതിലുപരി രാഷ്ട്രീയത്തിലെത്തിയാൽ എല്ലാവരും പൊതുപ്രവർത്തകരാണ്. എന്നാൽ തുല്യമായ പരിഗണന മാധ്യമങ്ങൾ നൽകുന്നില്ല. അനാവശ്യമായ രീതിയിലുള്ള വിധേയത്വമാണ് ചില മാധ്യമങ്ങൾ കാണിക്കുന്നത്. ഇതിനെയെല്ലാം മറികടക്കാൻ കഴിയുന്ന പ്രവർത്തനങ്ങളാണ് നമ്മൾ ഗ്രൗണ്ടിൽ നടത്തുന്നത്. വളരെ ഓർഗാനിക്കായി തന്നെയാണ് ഇക്കാര്യങ്ങൾ ചെയ്യുന്നത്.

നരേന്ദ്ര മോദി സർക്കാർ എന്നത് കോർപറേറ്റ്-ആർഎസ്എസ് കൂട്ടുകെട്ടാണ്. പ്രത്യയശാസ്ത്രപരമായി മതരാഷ്ട്ര സ്ഥാപനത്തിന് വേണ്ടിയുള്ള പ്രവർത്തനമാണ് ഇവർ നടത്തുന്നത്. സാമ്പത്തിക ആവശ്യത്തിനുള്ള നയം കോർപറേറ്റുകൾക്ക് കീഴ്പ്പെട്ടിട്ടുള്ളതാണ്. ഈ കൂട്ടുകെട്ടാണ് നമ്മൾ നേരിടുന്നത്. ഹിന്ദു രാഷ്ട്രത്തിനൊപ്പം ഒരു കോർപറേറ്റ് രാഷ്ട്രമാണ് അവർ ഉദ്ദേശിക്കുന്നത്. ബിജെപി വീണ്ടും അധികാരത്തിൽ വന്നാൽ ഹിന്ദു രാഷ്ട്രമായി ഇന്ത്യ മാറും. അതിന്റെ ദുരന്തങ്ങൾ വിവരണാതീതമായിരിക്കും', അദ്ദേഹം പറഞ്ഞു.

English summary

Suresh Gopi won't even get the last vote in Thrissur; VS Sunil Kumar