തൃശൂരിൽ മരിച്ച പോസ്റ്റ് വുമണിന്റെ മരണ കാരണം പേവിഷബാധയല്ല...

തൃശൂർ: തൃശൂരിൽ തെരുവു നായയുടെ കടിയേറ്റ് ചികിത്സയിലായിരുന്ന പോസ്റ്റ് വുമൺ ഷീലയുടെ മരണം പേവിഷബാധയേറ്റല്ലെന്ന് സ്ഥിരീകരിച്ചു. പാലോട് സ്റ്റേറ്റ് ഇൻസ്റ്റിറ്റ്യൂട്ട് ഓഫ് അനിമൽ ഡിസീസിൽ നടത്തിയ പരിശോധനയിലാണ് ഇക്കാര്യത്തിൽ വ്യക്തത ലഭിച്ചത്. കണ്ടാണിശ്ശേരിയിലെ പോസ്റ്റ് വുമണായ ഷീല കഴിഞ്ഞ 19നാണ് മരിച്ചത്.

കഴിഞ്ഞ 14ന് വീടിനു സമീപത്തുവച്ചാണ് ഷീലയെ തെരുവ് നായ കടിച്ചത്.നായയുടെ കടിയേറ്റ ഷീല ആശുപത്രിയിലെത്തി ഇഞ്ചക്ഷൻ എടുത്തിരുന്നു. രണ്ടാമത്തെ ഇഞ്ചക്ഷൻ എടുത്ത് ഒരു ദിവസം കഴിഞ്ഞപ്പോൾ ദേഹാസ്വാസ്ഥ്യം ഉണ്ടായിരുന്നു.

ആശുപത്രിയിൽ എത്തിക്കും മുമ്പേ മരണം സംഭവിക്കുകയുമായിരുന്നു. മരണ കാരണം പേവിഷബാധയേറ്റല്ലെന്ന് സ്ഥിരീകരിച്ചതോടെ, ആന്തരികാവയവങ്ങളുടെ പരിശോധനാ ഫലം ലഭിച്ചാൽ മാത്രമേ മരണ കാരണം സ്ഥിരീകരിക്കാൻ കഴിയൂ.

കണ്ടാണശേരി പോസ്റ്റ് ഓഫിസിലെ താൽക്കാലിക പോസ്റ്റുവുമണായിരുന്നു ഷീല. ഒറ്റയ്ക്ക് താമസിച്ചിരുന്ന ഷീല രാത്രി സഹോദരിയുടെ വീട്ടിലാണ് ഉറങ്ങിയിരുന്നത്. സഹോദരിയുടെ വീട്ടിൽ നിന്നും മടങ്ങുന്നതിനിടെയാണ് തെരുവുനായയുടെ കടിയേറ്റത്.രാവിലെ മുറിവ് ഡ്രസ് ചെയ്യാന്‍ എത്തിയപ്പോള്‍ ഇവര്‍ക്ക് ദേഹാസ്വാസ്ഥ്യം അനുഭവപ്പെട്ടിരുന്നു.

English summary

The cause of death of the post woman who died in Thrissur was not rabies