ജില്ലയിലെ അണക്കെട്ടുകള്‍ ജലസമൃദ്ധിയില്‍; ബാണാസുര സാഗര്‍ ഡാമിന്റെ ഷട്ടറുകള്‍ തുറന്നേക്കും; അതീവജാഗ്രതാ നിര്‍ദേശം

കല്‍പ്പറ്റ: കാലവര്‍ഷത്തില്‍ ജില്ലയിലെ അണക്കെട്ടുകള്‍ ഒരുകാലത്തുമില്ലാത്ത വിധം ജലസമൃദ്ധിയില്‍. വയനാട്ടില്‍ മഴ അതിശക്തമായി തുടരുന്ന സാഹചര്യത്തില്‍ വീണ്ടും ജലനിരപ്പ് ഉയര്‍ന്നാല്‍ അണക്കെട്ടുകളിലെ സംഭരണ ശേഷിയിലെത്തും. ഇതോടെ ജില്ലയിലെ അണക്കെട്ടുകളുടെ ഷട്ടറുകള്‍ തുറക്കാനുള്ള സാധ്യതയേറി. നേരത്തെ ജലനിരപ്പ് ഉയര്‍ന്നതിനെ തുടര്‍ന്ന് കാരാപ്പുഴ അണക്കെട്ടിലെ ഷട്ടറുകള്‍ തുറന്നുവിട്ടിരുന്നു. കാരാപ്പുഴയില്‍ നിലവിലെ ജലനിരപ്പ് 758.2 എം.എസ്.എല്‍ ആണ്. ഇനിയും ജലനിരപ്പുയര്‍ന്നാല്‍ വീണ്ടും ഷര്‍ട്ടറുകള്‍ തുറന്നേക്കും. അതേസമയം, ബാണാസുര സാഗര്‍ അണക്കെട്ടിലെ ജലനിരപ്പ് 774.6 എം എസ് എല്‍ ആയി ഉയര്‍ന്നിട്ടുണ്ട്.

അണക്കെട്ടിലെ ജലനിരപ്പ് 775.5 എം എസ് എല്‍ ആയി ഉയര്‍ന്നാല്‍ ഷട്ടറുകളിലൂടെ വെള്ളം തുറന്നുവിടേണ്ടി വരും. അണക്കെട്ടിന്റെ വൃഷ്ടിപ്രദേശത്ത് കനത്ത മഴ തുടരുകയാണെങ്കില്‍ അടുത്ത 24 മണിക്കൂറിനുള്ളില്‍ തന്നെ വെള്ളം തുറന്ന് വിടേണ്ടി വരുമെന്ന് എക്‌സിക്യൂട്ടിവ് എഞ്ചിനീയര്‍ അറിയിച്ചു. ഡാമിന്റെ ഷട്ടറുകള്‍ വഴി കരമാന്‍ തോടിലൂടെ പനമരം പുഴയിലേക്കാണ് വെള്ളം തുറന്ന് വിടുക. ഈ ജലപാതയുടെ കരകളില്‍ താമസിക്കുന്നവര്‍ പ്രത്യേക ജാഗ്രത പുലര്‍ത്തണമെന്നും ഈ പ്രദേശത്തെ ജലനിരപ്പ് പെട്ടെന്ന് ഉയരാനിടയുള്ളതിനാല്‍ പ്രദേശവാസികള്‍ ശ്രദ്ധിക്കണമെന്നും അദ്ദേഹം അഭ്യര്‍ത്ഥിച്ചു.

കനത്ത മഴ തുടരുന്നതിനാല്‍ ബാണാസുര സാഗര്‍ ഡാം സംഭരണ പരിധിയില്‍ എത്താറായ സ്ഥിതിയിലാണുള്ളത്. ഈ സാഹചര്യത്തില്‍ ഇരു കരകളിലും താമസിക്കുന്നവര്‍ അതീവ ജാഗ്രത പുലര്‍ത്തേണ്ടതാണെന്നും, ബന്ധപ്പെട്ട ഉദ്യോഗസ്ഥരുടെ നിര്‍ദ്ദേശങ്ങള്‍ കര്‍ശനമായി പാലിക്കേണ്ടതാണെന്നും ജില്ലാഭരണകൂടവും നിര്‍ദ്ദേശം നല്‍കിയിട്ടുണ്ട്. നേരത്തെ ഷട്ടര്‍ തുറക്കുമ്പോള്‍ മീന്‍ പിടിക്കുന്നത് പതിവായിരുന്നെങ്കിലും ആളപയാങ്ങളുണ്ടായതിനെ തുടര്‍ന്ന് ബാണാസുര ഡാമിന്റെ പരിസരത്ത് മത്സ്യബന്ധനം നിരോധിച്ചിരിക്കുകയാണ്.

English summary

banasura dam' shutter will open soon