വയനാട്ടിൽ മാവോയിസ്റ്റും തണ്ടർബോൾട്ടും തമ്മിൽ ഏറ്റുമുട്ടൽ,വെടിവയ്പ്പിൽ ഒരു മാവോയിസ്റ്റ് കൊല്ലപ്പെട്ടു

മാനന്തവാടി: വയനാട്ടില്‍ മാവോയിസ്റ്റ് വെടിവയ്പ്പ്. മീന്‍മുട്ടി വാളാരം കുന്നിലാണ് വെടിവയ്പ്പ്. ഒരു മാവോയിസ്റ്റിന് വെടിയേറ്റെന്നും ഇയാള്‍ കൊല്ലപ്പെട്ടെന്നും പൊലീസ് സ്ഥിരീകരിക്കുന്നുണ്ട്. അതേസമയം, കൊല്ലപ്പെട്ട മാവോയിസ്റ്റ് ആരാണെന്ന് സംബന്ധിച്ച് വിവരങ്ങള്‍ പുറത്തുവന്നിട്ടില്ല. പടിഞ്ഞാറത്തറയില്‍ പൊലീസും മാവോയിസ്റ്റും തമ്മില്‍ ഏറ്റുമുട്ടൽ അൽപസമയം തുടർന്നെന്നും വിവരമുണ്ട്.

തണ്ടര്‍ബോള്‍ട്ട് സംഘത്തെ മാവോയിസ്റ്റുകള്‍ ആക്രമിച്ചെന്നും പിന്നാലെ നടത്തിയ പ്രത്യാക്രമണത്തിലാണ് മാവോയിസ്റ്റ് കൊല്ലപ്പെട്ടതെന്നാണ് പുറത്തുവരുന്ന വിവരം. തണ്ടര്‍ബോള്‍ട്ട് സംഘത്തിലെ ആര്‍ക്കെങ്കിലും പരിക്കേറ്റോ എന്നു സംബന്ധിച്ചുള്ള വിവരവും പുറത്തുവന്നിട്ടില്ല. ഇന്ന് രാവിലെ പ്രദേശത്ത് തമ്പടിച്ചിരുന്ന മാവോയിസ്റ്റ സംഘത്തെ തണ്ടര്‍ബോള്‍ട്ട് കണ്ടെത്തുകയും തുടര്‍ന്ന് മാവോയിസ്റ്റുകള്‍ വെടിവച്ചതിനെ തുടര്‍ന്ന് ഏറ്റുമുട്ടല്‍ ആരംഭിക്കുകയും ചെയ്തുവെന്നാണ് പൊലീസ് ആസ്ഥാനത്ത് നിന്ന് ലഭിക്കുന്ന വിവരം.

രാവിലെ ആരംഭിച്ച ഏറ്റുമുട്ടല്‍ അല്‍പസമയം തുര്‍ന്നുവെന്നാണ് പൊലീസ് നല്‍കുന്ന വിവരം. വെടിവയ്പ്പില്‍ ഗുരുതരമായി പരിക്കേറ്റ മാവോയിസ്റ്റാണ് കൊല്ലപ്പെട്ടത്. ഏറ്റുമുട്ടല്‍ നടന്ന മേഖലയില്‍ പൊലീസ് ഇതുവരെ ആരെയും കയറ്റിവിട്ടിട്ടില്ല. മേഖലയില്‍ മൊബൈല്‍ റേഞ്ചില്ലെന്നും സാറ്റ്‌ലൈറ്റ് ഫോണ്‍വഴി പൊലീസ് ആസ്ഥാനത്ത് നിന്ന് തണ്ടര്‍ബോള്‍ട്ട് സംഘവുമായി ആശയവിനിമയം നടത്തുന്നുണ്ടെന്നാണ് സൂചന.

English summary

Maoists clash with police in Wayanad, A Maoist was shot