വയനാട് പരിസ്ഥിതി ലോല മേഖല: ജില്ലയിൽ യുഡിഎഫ് ഹർത്താൽ, കടകമ്പോളങ്ങൾ അടഞ്ഞ് കിടക്കുന്നു

Updated: Monday, February 8, 2021, 12:30 [IST]

കല്‍പ്പറ്റ: വയനാട് ജില്ലയില്‍ യുഡിഎഫ് ആഹ്വാനം ചെയ്ത ഹര്‍ത്താല്‍ പുരോഗമിക്കുന്നു. രാവിലെ 6 മണിക്ക് ആരംഭിച്ച ഹര്‍ത്താല്‍ വൈകിട്ട് 6 വരെയാണ്. വയനാട് വന്യജീവി സങ്കേതത്തിന് ചുറ്റുമുളള സ്ഥലം പരിസ്ഥിതി ലോല മേഖലയാക്കുന്നതിനുളള കേന്ദ്ര വനം-പരിസ്ഥിതി മന്ത്രാലയത്തിന്റെ കരട് വിജ്ഞാപനത്തിന് എതിരെയാണ് ഹര്‍ത്താല്‍. വ്യാപാരി വ്യവസായി ഏകോപന സമിതിയും ഹര്‍ത്താലിന് പിന്തുണ പ്രഖ്യാപിച്ചിട്ടുണ്ട്.

അതിനാല്‍ ജില്ലയില്‍ വ്യാപാര സ്ഥാപനങ്ങളെല്ലാം അടഞ്ഞ് കിടക്കുകയാണ്. വാഹന ഗതാഗതവും പൂര്‍ണമായി നിലച്ചിട്ടുണ്ട്. സ്വകാര്യ വാഹനങ്ങള്‍ മാത്രമാണ് നിരത്തിലിറങ്ങുന്നത്. അന്തര്‍ സംസ്ഥാന സര്‍വ്വീസുകളും തടസ്സപ്പെട്ടു. അതേസമയം അവശ്യ സര്‍വ്വീസുകളെ ഹര്‍ത്താലില്‍ നിന്നും ഒഴിവാക്കിയിട്ടുണ്ട്.

സെൽഫിയെടുത്തും കുശലം ചോദിച്ചും തിരുവനന്തപുരത്തെ ബീച്ചുകളിൽ ശശി തരൂർ- ചിത്രങ്ങൾ

പരിസ്ഥിതി ലോല പ്രദേശമാക്കുന്നതുമായി ബന്ധപ്പെട്ടുളള ജനങ്ങളുടെ ആശങ്ക കണക്കിലെടുത്ത് കരട് വിജ്ഞാപനം ഭേദഗതി ചെയ്യണം എന്നാവശ്യപ്പെട്ട് മുഖ്യമന്ത്രി പിണറായി വിജയന്‍ പ്രധാനമന്ത്രി നരേന്ദ്ര മോദിക്ക് കത്തയച്ചിട്ടുണ്ട്.പരിസ്ഥിതി ലോല മേഖലകൾ വിജ്ഞാപനം ചെയ്യുമ്പോൾ ജനങ്ങൾ തിങ്ങിപ്പാർക്കുന്ന പ്രദേശങ്ങൾ ഒഴിവാക്കണമെന്നാണ് സംസ്ഥാനത്തിൻ്റെ നിലപാട് എന്ന് മുഖ്യമന്ത്രി വ്യക്തമാക്കി. അതു കണക്കിലെടുത്ത് തോൽപ്പെട്ടി, കാട്ടിക്കുളം, പനവല്ലി , കുറുക്കൻമൂല, ചാലിഗഡ, കാപ്പിസ്റ്റോർ, ചീയാമ്പം, മൂടക്കൊല്ലി, ചീരാൽ എന്നീ പ്രദേശങ്ങൾ ഒഴിവാക്കണമെന്ന് അദ്ദേഹം ആവശ്യപ്പെട്ടു.

ജീവിക്കാൻ പ്രയാസപ്പെടുന്നവരാണ് ഈ മേഖലകളിൽ അധിവസിക്കുന്നതെന്ന് കൂടി കണക്കിലെടുത്ത് കരടു വിജ്ഞാപനത്തിൽ ആവശ്യമായ മാറ്റം വരുത്താൻ വനം - പരിസ്ഥിതി മന്ത്രാലയത്തോട് നിർദേശിക്കണമെന്നും മുഖ്യമന്ത്രി പ്രധാനമന്ത്രിയോട് ആവശ്യപ്പെട്ടു .വയനാട് വന്യജീവി സങ്കേതത്തിന് ചുറ്റുമായി 118.59 ചതുരശ്ര കി.മീറ്റർ സ്ഥലമാണ് പരിസ്ഥിതി ലോല മേഖലയാക്കുന്നതിനുള്ള നീക്കം. വിഷയത്തിൽ കോൺഗ്രസ് എംപി കെസി വേണുഗോപാൽ പാർലമെന്റിൽ ചോദ്യം ഉന്നയിച്ചു. സംസ്ഥാനത്തിന്റെയും പൊതുജനങ്ങളുടേയും അഭിപ്രായങ്ങൾ കൂടി കേൾക്കുമെന്ന് കേന്ദ്ര വനം പരിസ്ഥിതി വകുപ്പ് മന്ത്രി പ്രകാശ് ജാവദേക്കർ അറിയിച്ചു.