Wayanad Land Slide|'അക്കരെ നിൽക്കുന്നവരെ ഞങ്ങൾക്ക് കാണാം, അങ്ങോട്ടെത്താൻ സാധിക്കുന്നില്ല'

Updated: Tuesday, July 30, 2024, 10:52 [IST]

മേപ്പാടി: വയനാട് ഉരുൾപ്പൊട്ടലിൽപ്പെട്ടവരെ രക്ഷിക്കാനുള്ള ശ്രമം തുടരുകയാണ്. മുണ്ടക്കൈ പ്രദേശം ഒറ്റപ്പെട്ട അവസ്ഥയിലാണ്. മുണ്ടക്കൈ പ്രദേശത്തേക്ക് ഇപ്പോഴും എത്താൻ സാധച്ചിട്ടില്ലെന്ന് മുണ്ടക്കൈ വാർഡ് 11 മെമ്പർ കെ ബാബു വൺഇന്ത്യ മലയാളത്തോട് പറഞ്ഞു.

അതിസാഹസികസമായി രണ്ട് പുഴ മുറിച്ചുകടന്നു, മൂന്നാമത്തെ പുഴ കടന്നാൽ മാത്രമെ അങ്ങോട്ട് എത്താൻ കഴിയുള്ളൂവെന്നും ബാബു പറയുന്നു. ചെറുതായി മണ്ണിടിച്ചിൽ സംഭവിക്കുന്നുണ്ടെന്നും പുഴ കലങ്ങിമറിഞ്ഞ അവസ്ഥയിലാണെന്നും ബാബു കൂട്ടിച്ചേർത്തു. വളരെ ശക്തിയിലാണ് പുഴ ഒഴുകുന്നതെന്നും അദ്ദേഹം പറയുന്നു.

'പ്രദേശം ഒറ്റപ്പെട്ടു, അക്കരെ നിൽക്കുന്നവരെ ഞങ്ങൾക്ക് കാണാം. മരിച്ചവരുടെ ബോഡി അവർ അങ്ങോട്ടുംഇങ്ങോട്ടും മാറ്റുന്നത് കാണാം. ഒരാൾ ചളിയിൽ പൂണ്ടുകിടക്കുന്നുണ്ട്. അങ്ങോട്ട് എത്താൻ ഞങ്ങൾക്ക് സാധിക്കുന്നില്ല. പുഴ കടന്നാൽ മാത്രമെ അതിന് സാധിക്കൂ. പക്ഷേ പുഴ മുറിച്ച് കടക്കാൻ സാധിക്കുന്നില്ല.

‌‌ഉരുൾപൊട്ടലിൽ കുട്ടികളടക്കം 36 പേരുടെ മരണം നിലവിൽ സ്ഥിരീകരിച്ചിട്ടുണ്ട്. പാലം തകർന്നത് രക്ഷാപ്രവർത്തനത്തെ ബാധിക്കുന്നുണ്ട്. ചൂരൽ മലയോട് ചേർന്നുള്ള പ്രദേശത്താണ് നിലവിൽ രക്ഷാപ്രവർത്തനം നടക്കുന്നത്. അതേ സമയം വയനാട്ടിലെ ഉരുൾപൊട്ടലിൽ പ്രധാനമന്ത്രി സഹായം പ്രഖ്യാപിച്ചു. പ്രധാനമന്ത്രി മോദി മുഖ്യമന്ത്രിയുമായി പിണറായി വിജയനുമായി സഹായിച്ചു. ഉരുൾപൊട്ടലിൽ മരിച്ചവരുടെ കുടുംബത്തിന് രണ്ട് ലക്ഷം രൂപയും പരിക്കേറ്റവർക്ക് 50000 രൂപയും പ്രധാനമന്ത്രിയുടെ ദുരിതാശ്വാസ നിധിയില്‍നിന്ന് നല്‍കുമെന്ന് പ്രധാനമന്ത്രിയുടെ ഓഫിസ് അറിയിച്ചു.

അതേ സമയം കേരളത്തിൽ അടുത്ത 5 ദിവസവും ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. ഇതുപ്രകാരം വിവിധ ജില്ലകളിൽ റെഡ്, ഓറഞ്ച്, മഞ്ഞ അലർട്ട് പ്രഖ്യാപിച്ചിട്ടുണ്ട്. മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിലാണ് റെഡ് അലർട്ട് പ്രഖ്യാപിച്ചിരിക്കുന്നത്. ഇടുക്കി, എറണാകുളം, തൃശ്ശൂർ, പാലക്കാട് ജില്ലകളിൽ ഓറഞ്ച് അലർട്ടാണുള്ളത്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിൽ യെല്ലോ അലർട്ടും പ്രഖ്യാപിച്ചിരിക്കുന്നു.
ശക്തമായ മഴ ലഭിച്ചു കൊണ്ടിരിക്കുന്ന മലയോര മേഖലയിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിലുള്ളവർ സുരക്ഷിതമായ സ്ഥലത്തേക്ക് മാറി താമസിക്കേണ്ടതാണ്. പകൽ സമയത്ത് തന്നെ മാറി താമസിക്കാൻ ആളുകൾ തയ്യാറാവണമെന്ന് അറിയിപ്പുണ്ട്.