Neyyar Water Level Today | നെയ്യാർ ഡാം ജലനിരപ്പ് ഇന്ന്

നെയ്യാര്‍ ഡാമിന്റെ ചരിത്രം

1958 ല്‍ ആണ് നെയ്യാര്‍ ഡാം നിര്‍മിക്കുന്നത്. തിരുവനന്തപുരം ജില്ലയിലെ കാട്ടാക്കടയിലാണ് ഡാം സ്ഥിതി ചെയ്യുന്നത്. കേരളത്തിന്റെ ഏറ്റവും തെക്കേ അറ്റത്തുള്ള ഡാമുകളില്‍ ഒന്നാണ് നെയ്യാര്‍ ഡാം. നെയ്യാര്‍ ജലസേചന പദ്ധതിയുടെ ഭാഗമാണിത്.

നെയ്യാര്‍ നദിയില്‍ നിര്‍മിച്ച അണക്കെട്ട് ആയതിനാല്‍ ആണ് നെയ്യാര്‍ ഡാം എന്ന പേര് ലഭിച്ചത്. പ്രകൃതിരമണീയ ഈ മേഖല കേരളത്തിലെ പ്രധാന വിനോദ സഞ്ചാര കേന്ദ്രം കൂടിയാണ്. അണക്കെട്ടിനോട് ചേന്നാണ് നെയ്യാര്‍ വന്യജീവി സങ്കേതവും.

ഒരുകാലത്ത് വാര്‍ത്തകളില്‍ ഏറെ നിറഞ്ഞുനിന്നിരുന്നു നെയ്യാര്‍. സ്ഥിരമായി ചീങ്കണ്ണി ആക്രമണം ഇവിടെ റിപ്പോര്‍ട്ട് ചെയ്യപ്പെട്ടിരുന്നു.

നെയ്യാർ ഡാം സ്ഥിതി ചെയ്യുന്ന സ്ഥലം

തിരുവനന്തപുരം ജില്ലയിലെ കാട്ടാക്കട താലൂക്കില്‍ കള്ളിക്കാട് ഗ്രാമപ്പഞ്ചായത്തിലാണ് നെയ്യാര്‍ ഡാം സ്ഥിതി ചെയ്യുന്നത്. തിരുവനന്തപുരം നഗരത്തില്‍ നിന്ന് 32 കിലോമീറ്റര്‍ സഞ്ചരിച്ചാല്‍ ഇവിടെയെത്താം. തമ്പാനൂര്‍ ബസ് സ്റ്റാന്‍ഡില്‍ നിന്ന് നെയ്യാര്‍ ഡാമിലേക്ക് ബസ് സര്‍വ്വീസ് ഉണ്ട്.

നെയ്യാർ ഡാമിന്റെ സംഭരണ ശേഷി

കേരളത്തിലെ ഭൂഗുരുത്വ ഡാമുകളില്‍ ഒന്നാണ് നെയ്യാര്‍ ഡാം. 56 മീറ്റര്‍ (184 അടി) ആണ് ഡാമിന്റെ ഉയരം. 295 മീറ്റര്‍ (968 അടി) നീളവും ഉണ്ട് നെയ്യാര്‍ ഡാമിന്. ഡാമിന്റെ റിസര്‍വോയറിന്റെ സമ്പൂര്‍ണശേഷി 106.2 ദശലക്ഷം ഘനമീറ്റര്‍ ആണ്. ഉപയോഗശേഷി 101 ദശലക്ഷം ഘടനമീറ്ററും. 92 ചതുരശ്ര കിലോമീറ്റര്‍ വിസ്തൃതിയില്‍ ആണ് റിസര്‍വോയര്‍ പരന്നുകിടക്കുന്നത്.

നെയ്യാർ ഡാമിനോട് ചേർന്നുള്ള വിനോദ സഞ്ചാര കേന്ദ്രങ്ങള്‍

നെയ്യാര്‍ ഡാം തന്നെ കേരളത്തിലെ പ്രധാന വിനോദസഞ്ചാര കേന്ദ്രങ്ങളില്‍ ഒന്നാണ്. ഇവിടത്തെ ലയണ്‍ സഫാരി ഏറെ പ്രസിദ്ധമാണ്. സിംഹങ്ങള്‍ പുറത്തും കാഴ്ചക്കാര്‍ വാഹനത്തിന് അകത്തും എന്ന രീതിയില്‍ ആണ് ഇവിടെ ഒരു ദ്വീപില്‍ ലയണ്‍ സഫാരി ഒരുക്കിയിട്ടുള്ളത്. ഇത്തരത്തിലുള്ള കേരളത്തിലെ ഏക സഫാരി പാര്‍ക്കാണിത്.

ബോട്ടിങ്ങും മാന്‍ പാര്‍ക്കും എല്ലാം ഇവിടത്തെ ആകര്‍ഷണങ്ങളാണ്. സ്റ്റീവ് ഇര്‍വിന്‍ സ്മാരക മുതലവളര്‍ത്തുകേന്ദ്രമാണ് നെയ്യാര്‍ ഡാമിന്റെ മറ്റൊരു പ്രധാന ആകര്‍ഷണം. ചെറിയ വന്യജീവി സങ്കേതവും ലേക്ക് ഗാര്‍ഡനും നീന്തല്‍ കുളവും വാച്ച് ടവറും എല്ലാം ഇവിടേക്ക് കാഴ്ചക്കാരെ ആകര്‍ഷിക്കുന്നു.

കേരളത്തിലെ ആദ്യത്തെ തുറന്ന ജയിലും നെയ്യാര്‍ ഡാമിന് അടുത്താണ്. കാളിപാറ ക്ഷേത്രവും യോഗപഠനകേന്ദ്രമായ ശിവാനന്ദ ആശ്രമവും അധികം ദൂരെയല്ല.

സന്ദര്‍ശന സമയം, പ്രവേശന ഫീസ്

നെയ്യാര്‍ ഡാമിലേക്കുള്ള പ്രവേശ സമയം രാവിലെ 8 മണി മുതല്‍ വൈകുന്നേരം 7 മണി വരെയാണ്. ഇന്ത്യന്‍ പൗരന്‍മാര്‍ക്ക് 10 രൂപയാണ് പ്രവേശന ഫീസ്. വിദേശികള്‍ക്ക് 100 രൂപയും

ലയണ്‍ സഫാരിയ്ക്കുള്ള എന്‍ട്രി ഫീസ് മുതിര്‍ന്നവര്‍ക്ക് 250 രൂപയും കുട്ടികള്‍ക്ക് 125 രൂപയും ആണ്. സഫാരി ബോട്ടിങ്ങിന് 400 രൂപയും സ്പീഡ് ബോട്ടിന് 250 രൂപയും ആണ് ഫീസ്.

English summary

Neyyar Water Level Today