വിവാഹപൂര്വ്വ ലൈംഗികബന്ധം;കോടതിയില് കല്യാണം
അബുദാബി: വിവാഹപൂര്വ്വ ലൈംഗിക ബന്ധത്തിന്റെ ശിക്ഷയില് നിന്ന് മോചിതരാകുന്നതിന് വേണ്ടി കമിതാക്കള് വിവാഹിതരാകാന് അനുമതി തേടി. അബുദാബി കോടതിയിലാണ് കുറ്റക്കാരായ യുവാവും യുവതിയും വിവാഹം കഴിയ്ക്കാനുള്ള അനുമതി തേടിയത്. ഇവരുടെ ആവശ്യം കോടതി അംഗീകരിയ്ക്കുകയായിരുന്നു. അല് ബയാന് പത്രമാണ് വാര്ത്ത റിപ്പോര്ട്ട് ചെയ്തത്
മൊറോക്കന് യുവതിയാണ് അബുദാബി പൗരനെതിരെ പരാതിയുമായി രംഗത്തെത്തിയത്. താന് എട്ട് മാസം ഗര്ഭിണിയാണെന്നും തന്നെ വിവാഹം കഴിയ്ക്കാന് അറബി കൂട്ടാക്കുന്നില്ലെന്നും സ്ത്രീ പരാതിപ്പെട്ടു.
തുടര്ന്ന് കേസ് കോടതിയുടെ പരിഗണനയില് എത്തിയപ്പോഴാണ് ശിക്ഷയില് നിന്നും ഒഴിവാകുന്നതിനായി വിവാഹം കഴിയ്ക്കാമെന്ന നിലപാടില് ഇവര് എത്തുന്നത്. കോടതിയില് വച്ച് തനിയ്ക്ക് പെണ്കുട്ടിയുമായി അടുപ്പമുണ്ടെന്നും തന്റെ കുഞ്ഞിനെയാണ് യുവതി ഗര്ഭം ധരിച്ചതെന്നും അറബി പറഞ്ഞു. സ്ത്രീയെ വിവാഹം കഴിയ്ക്കാന് അനുമതി തരണമെന്ന് യുവാവ് കോടതിയോട് അപേക്ഷിച്ചു.
ഇരുവരും വിവാഹിതരാകാമെന്ന ധാരണയില് എത്തിയതിനെത്തുടര്ന്ന് സ്ത്രീയോട് രാജ്യം വിട്ട് പോകരുതെന്ന് കോടതി ആവശ്യപ്പെട്ടു. എത്രയും വേഗം യുവതിയുടേയും യുവാവിന്റേയും വിവാഹം നടത്തണമെന്ന് കോടതി പൊലീസിനോടും പ്രോസിക്യൂട്ടറോടും ആവശ്യപ്പെട്ടു.