ടയര് പഞ്ചറെന്ന് പറഞ്ഞ് വാഹനം നിര്ത്തിച്ച് കൊള്ള; ഏഷ്യന് യുവാക്കള് അബുദാബിയില് അറസ്റ്റില്
ടയര് പഞ്ചറാണെന്ന് തെറ്റിദ്ധരിപ്പിച്ച് വാഹനം നിര്ത്തിച്ച ശേഷം പണമടങ്ങിയ ബാഗ് മോഷ്ടിച്ച് രക്ഷപ്പെടുന്ന മൂന്നംഗ ഏഷ്യന് കൊള്ള സംഘത്തെ അബുദാബി പോലിസ് അറസ്റ്റ് ചെയ്തു. ബാങ്കില് നിന്നോ എ.ടി.എമ്മില് നിന്
അബുദാബി: ടയര് പഞ്ചറാണെന്ന് തെറ്റിദ്ധരിപ്പിച്ച് വാഹനം നിര്ത്തിച്ച ശേഷം പണമടങ്ങിയ ബാഗ് മോഷ്ടിച്ച് രക്ഷപ്പെടുന്ന മൂന്നംഗ ഏഷ്യന് കൊള്ള സംഘത്തെ അബുദാബി പോലിസ് അറസ്റ്റ് ചെയ്തു. ബാങ്കില് നിന്നോ എ.ടി.എമ്മില് നിന്നോ പണം പിന്വലിച്ചിറങ്ങുന്നവരെ ലക്ഷ്യമിട്ടാണ് തട്ടിപ്പ്. ഇവര് വാഹനത്തില് കയറി അല്പം ദൂരം പിന്നിട്ടാല് പിന്നാലെ വരുന്ന വാഹനത്തിലുള്ളവര് കാറിന്റെ ടയര് പഞ്ചാറാണെന്നു തെറ്റിദ്ധരിപ്പിച്ച് വാഹനം നിര്ത്തിക്കുന്നതാണ് രീതി. ടയര് പരിശോധിക്കാന് ആള് പുകയാണ് ചെയ്യുന്നത്. രണ്ട് അറബ് സ്ത്രീകളുടെ പരാതിയെ തുടര്ന്ന് പോലിസ് നടത്തിയ അന്വേഷണത്തിലാണ് 23നും 38നും ഇടയില് പ്രായമുള്ള മൂന്ന് യുവാക്കളെ അബുദാബി പോലിസ് പിടികൂടിയത്.
രണ്ട് കവര്ച്ചകളിലും ഒരേ രീതി തന്നെയാണ് സംഘം ഉപയോഗിച്ചതെന്ന് കാപിറ്റല് പോലിസ് ഡയരക്ടറേറ്റ് മേധാവി ബ്രിഗേഡിയര് അഹ്മദ് സെയ്ഫ് ബിന് സൈത്തൂന് അല് മുഹൈരി പറഞ്ഞു. ഇവര് ഉപയോഗിച്ച വാഹനം പിന്തുടര്ന്നാണ് കവര്ച്ചക്കാരെ പിടികൂടിയത്. ഇവരിലൊരാളെ അജ്മാനില് നിന്നാണ് അറസ്റ്റ് ചെയ്തതെന്നും അല് മുഹൈരി പറഞ്ഞു.
ആഗസ്ത് ആദ്യത്തില് ബാങ്കില് നിന്നിറങ്ങിയ രണ്ട് പേരെ സമാനമായി കൊള്ളയടിച്ച സംഭവങ്ങളില് രണ്ട് പേരെ അറസ്റ്റ് ചെയ്തിരുന്നു. ബാങ്കില് നിന്നിറങ്ങിയ 64കാരന്റെ കീശയിലുണ്ടായിരുന്ന 20,000 ദിര്ഹം അടങ്ങിയ കവര് മോഷണം പോവുകയായിരുന്നു. മറ്റൊരു സംഭവത്തില് 48കാരിയായ അറബ് വനിതയായിരുന്നു കവര്ച്ച ചെയ്യപ്പെട്ടത്.
തനിച്ച് യാത്ര ചെയ്യുന്നവരാണ് ഇത്തരം അക്രമങ്ങള്ക്കിരയാവുന്നതെന്ന് പോലിസ് അറിയിച്ചു. ബാങ്കില് നിന്നും എ.ടി.എമ്മില് നിന്നും മറ്റും ഇറങ്ങുന്നവര് തട്ടിപ്പുകള്ക്കിരയാവാതിരിക്കാന് ജാഗ്രത പാലിക്കണം. ടയര് പഞ്ചറായെന്ന സംശയത്താലോ മറ്റ് ആവശ്യങ്ങള്ക്കോ വാഹനത്തില് നിന്നിറങ്ങുമ്പോള് ഡോര് ലോക്ക് ചെയ്യാന് ശ്രദ്ധിക്കണമെന്നും പോലിസ് നിര്ദേശം നല്കി.