ഫുജൈറ: നീന്തല്ക്കുളത്തില് വീണ് പെണ്കുട്ടി മരിച്ചു, മരണം കാല്വഴുതി വീണ്!!
ശനിയാഴ്ച ഉച്ച കഴിഞ്ഞ് ബാത്നാ റഡിസന്ഷ്യല് ഏരിയയിലായിരുന്നു സംഭവം
ഫുജൈറ: ഫുജൈറയില് അപ്പാര്ട്ട്മെന്റിലെ നീന്തല്ക്കുളത്തില് വീണ പെണ്കുട്ടി മരിച്ചു. രണ്ടുവയസ്സുകാരിയായ എമിറാത്തി പെണ്കുട്ടിയാണ് മരിച്ചത്. ശനിയാഴ്ച ഉച്ച കഴിഞ്ഞ് ബാത്നാ റഡിസന്ഷ്യല് ഏരിയയിലായിരുന്നു സംഭവം.
സംഭവം നടന്ന് ഉടന് ആശുപത്രിയിലെത്തിച്ചെങ്കിലും കുഞ്ഞിന്റെ ജീവന് രക്ഷിക്കാന് കഴിഞ്ഞില്ല. ഫുജൈറ പൊലീസ് കമാന്ഡര് ഇന് ചീഫ് ബ്രിഗേഡിയര് മുഹമ്മദ് ബിന് ഖാനിം അല് കാബിയാണ് ഇക്കാര്യം വ്യക്തമാക്കിയത്. ഉച്ചകഴിഞ്ഞ് 2.30ഓടെയാണ് അപ്പാര്ട്ട്മെന്റിലെ നീന്തല്ക്കുളത്തില് അബോധാവസ്ഥയിലായ നിലയിലായിരുന്നു കുഞ്ഞിനെ കണ്ടെത്തിയത്. ഉടന് തന്നെ പൊലീസും ആംബുലന്സും സ്ഥലത്തെത്തി കുഞ്ഞിനെ ആശുപത്രിയിലെത്തിക്കുകയായിരുന്നു.
സംഭവത്തെ തുടര്ന്ന് പെണ്കുട്ടിയുടെ മാതാപിതാക്കളെ ചോദ്യം ചെയ്തെങ്കിലും തെറ്റുകാരല്ലെന്ന് കണ്ട് വിട്ടയ്ക്കുകയായിരുന്നു. കുഞ്ഞിന്റെ സംസ്കാര ചടങ്ങുകള് മഗ് രിബ് പ്രാര്ത്ഥനകള്ക്ക് ശേഷം ഖിഡ്ഫയിലെ അല് റഖബാനി പള്ളിയില് നടക്കും. സംഭവത്തോടെ കുട്ടികളുടെ സുരക്ഷ ഉറപ്പുവരുത്തണമെന്ന് പൊലീസ് നിര്ദേശം നല്കിയിട്ടുണ്ട്.