വനിതാ സഹായിയെ പീഡിപ്പിച്ച സ്കൂള് വാന് ഡ്രൈവര് അറസ്റ്റില്
ബാംഗ്ലൂര്: പെണ്കുട്ടികള്ക്കു നേരെയുള്ള അതിക്രമം തടയുന്നതിനുവേണ്ടിയാണ് സ്കൂള് ബസ്സുകളിലും വാനുകളിലും വനിതാ സഹായി വേണമെന്ന നിയമം ബാംഗ്ലൂരില് നിര്ബന്ധമായി നടപ്പാക്കി തുടങ്ങിയത്. എന്നാല് പുതുതായി വന്ന പരാതി പോലിസ് ഉദ്യോഗസ്ഥരെ ഞെട്ടിയ്ക്കുകയാണ്.
എസ്എസ്എം സ്കൂളിന്റെ വാനില് സഹായിയായി പ്രവര്ത്തിക്കുന്ന 28കാരിയായ കവിതയാണ് പരാതിയുമായി പോലിസിനു മുന്നിലെത്തിയത്. റൂട്ട് നമ്പര് നാലിലാണ് സ്ഥിരമായി പോകാറുള്ളത്. ബലരാമ എന്ന ഡ്രൈവറാണ് വില്ലന്. അതില് 37 കുട്ടികളാണുള്ളത്. 30വയസ്സുകാരനായ ഡ്രൈവര് കുട്ടികളോടും അമ്മമാരോടും തീര്ത്തും മോശമായാണ് പെരുമാറുന്നത്.
കുട്ടികള്ക്കു മുന്നില് വെച്ച് അസഭ്യമായി സംസാരിക്കരുതെന്ന് നിരവധി തവണ അയാളോട് പറഞ്ഞിരുന്നു. കഴിഞ്ഞ ഒമ്പതാം തിയ്യതി കുട്ടികള്ക്കു മുന്നില് വെച്ച് അയാള് എന്നെ പച്ചത്തെറിയാണ് വിളിച്ചത്. അതേ ദിവസം തന്നെ ഇയാള് ഇയാള് ഒരു ഇരുച്ചക്ര വാഹനക്കാരനെ ഇടിച്ചിടുകയും ചെയ്തു. ഇക്കാര്യം മാനേജ് മെന്റില് റിപ്പോര്ട്ട് ചെയ്യുകയും ചെയ്തിരുന്നു.
തൊട്ടടുത്ത ദിവസം ഇയാള് സ്കൂളിലെത്തിയത് ഭാര്യയോടും അമ്മായിയമ്മയോടും ഒപ്പമാണ്. അസഭ്യം വിളിച്ചതിനുശേഷം പാഠം പഠിപ്പിക്കാന് വീട്ടിലേക്ക് വരുന്നുണ്ടെന്ന് ഭീഷണിപ്പെടുത്തുകയും ചെയ്തു. ഇതോടെയാണ് യുവതി പരാതിയുമായി പോലിസ് സ്റ്റേഷനിലെത്തിയത്. ത്യാഗരാജനഗര് പോലിസ് ബലരാമിനെ അറസ്റ്റ് ചെയ്തിട്ടുണ്ട്.