യോനീ നാളത്തില്‍ കുടുങ്ങിയ യുവാവിന്റെ ചിത്രം വൈറലായി

ട്യൂബിങ്: യോനീ നാളത്തില്‍ വലിഞ്ഞുകയറിയ യുവാവിന്റെ രസകരമായ ചിത്രം സോഷ്യല്‍ സൈറ്റുകളില്‍ വൈറലായി. ജര്‍മനിയിലെ ട്യൂബിങ് സര്‍വകലാശാലാ വളപ്പില്‍ സ്ഥാപിച്ചിരുന്ന യോനിയുടെ ആകൃതിയിലുള്ള പ്രതിമയിലായിരുന്നു യുവാവിന്റെ നുഴഞ്ഞുകയറ്റം. യുഎസ് എക്‌സ്‌ചേഞ്ച് വിദ്യാര്‍ത്ഥിയായ യുവാവ് ഒരു കൗതുകത്തിനുവേണ്ടിയായിരുന്നു പ്രതിമയിയ്ക്കുള്ളിലേക്ക് കയറിയത്. എന്നാല്‍ കാല്‍മുട്ടിന് താഴെയുള്ളഭാഗം ഉള്ളില്‍ കുടുങ്ങിയ യുവാവ് ശരിക്കും പെട്ടുപോയി.

കാഴ്ച കണ്ടുനിന്നവര്‍ക്ക് സംഭവം ആദ്യം രസകരമായി തോന്നിയെങ്കിലും യുവാവിന്റെ പരാക്രമം കണ്ടതോടെ ഓടിയെത്തി രക്ഷിക്കാനുള്ള ശ്രമമായി. എന്നാല്‍ കാലുകള്‍ പ്രതിമയ്ക്കുള്ളിലെ അറയില്‍ കുടുങ്ങിയത് യുവാവിന്റെ അവസ്ഥ കൂടുതല്‍ പരിതാപകരമാക്കി. ഇതോടെ, യൂണിവേഴ്‌സിറ്റി അധികൃതര്‍ അഗ്നിശമന സേനയെ വിവരം അറിയിച്ചു.

ആദ്യമെത്തിയ അഗ്നിശമന സേനാഗംങ്ങള്‍ യുവാവിന്റെ കാലുകള്‍ പുറത്തെത്തിക്കാന്‍ പഠിച്ച പണി പതിനെട്ടും നോക്കിയിട്ടും ശ്രമം വിജയിച്ചില്ല. ഇതോടെ കൂടുതല്‍ രക്ഷാപ്രവര്‍ത്തകര്‍ രംഗത്തെത്തി. അഞ്ച് അത്യാഹിത വാഹനങ്ങളിലായെത്തിയ 22ഓളം അഗ്നിശമന സേനാംഗങ്ങളുടെ പരിശ്രമത്തിനൊടുവില്‍ വിദ്യാര്‍ത്ഥിയെ ഒടുവില്‍ മോചിപ്പിക്കുകയായിരുന്നു.

യോനിനാളത്തിന്റെ പ്രതിമയ്ക്കിടയില്‍ നിന്നുകൊണ്ടുള്ള ഫോട്ടോ എടുക്കണമെന്ന യുവാവിന്റെ ആഗ്രഹമാണ് അത്യാഹിതത്തില്‍ കലാശിച്ചതെന്ന് ജര്‍മന്‍ ഫോട്ടോഗ്രാഫറായ എറിക്ക് ഗുസ്മാന്‍ പിന്നീട് വിശദീകരിച്ചു. യുവാവ് പ്രതിമയ്ക്കുള്ളില്‍ കുടുങ്ങിയ ചിത്രം സുഹൃത്ത് പുറത്തുവിട്ടതോടെ അവ സോഷ്യല്‍ സൈറ്റുകളില്‍ പ്രചരിക്കുകയാണ്.

English summary

student stuck inside giant stone vagina sculpture at German university