മാക്ബുക്കിനും ഐപാഡിനും വില കുത്തനെ കൂട്ടി ആപ്പിൾ; ഐഫോണിന്റെ വിലയിലും ട്വിസ്റ്റ്

ഇന്ത്യയിലെ ആപ്പിൾ ആരാധകരെ ഒന്നടങ്കം നിരാശരാക്കുന്ന വാർത്തയാണ് ഇപ്പോൾ പുറത്തുവരുന്നത്. ആപ്പിളിന്റെ മാക്ബുക്ക്, ഐപാഡ്, ഹോംപോഡ് എന്നിവയുടെ വില ഇപ്പോൾ കുത്തനെ വർദ്ധിപ്പിച്ചു. വിപണിയിലെ പുതിയ റിപ്പോർട്ടുകൾ പ്രകാരം വിവിധ മോഡലുകൾക്ക് 5,000 രൂപ മുതൽ 50,000 രൂപ വരെയാണ് വില കൂടിയിരിക്കുന്നത്. ചില പ്രീമിയം ഹൈ-എൻഡ് മോഡലുകൾക്ക് ഇതിലും വലിയ തുകയുടെ വർദ്ധനവ് ഉണ്ടായിട്ടുണ്ട്. ഐഫോണുകളുടെ വിലയും വരും ദിവസങ്ങളിൽ വർധിച്ചേക്കും.

ഉപകരണങ്ങൾ നിർമ്മിക്കാനാവശ്യമായ ഘടകങ്ങളുടെ വിലയിലുണ്ടായ വർദ്ധനവും, ആർട്ടിഫിഷ്യൽ ഇന്റലിജൻസ് സാങ്കേതികവിദ്യ കൈകാര്യം ചെയ്യാൻ ശേഷിയുള്ള ഡിവൈസുകൾക്ക് വിപണിയിൽ പ്രിയമേറിയതുമാണ് ഈ പെട്ടെന്നുള്ള വിലക്കയറ്റത്തിന് കാരണമായി കമ്പനി ചൂണ്ടിക്കാണിക്കുന്നത്. ആപ്പിൾ ഉൽപ്പന്നങ്ങളുടെ പുതുക്കിയ വിലവിവരങ്ങൾ താഴെ നൽകുന്നു.

മാക്ബുക്ക് മോഡലുകളുടെ പുതിയ വില

മാക്ബുക്ക് സീരീസിലെ എയർ, പ്രോ മോഡലുകൾക്കെല്ലാം വലിയ രീതിയിലുള്ള വില വ്യത്യാസമാണ് വന്നിരിക്കുന്നത്.

മാക്ബുക്ക് എയർ (512GB): മുൻപ് 1,19,000 രൂപയുണ്ടായിരുന്ന ഈ മോഡലിന് ഇപ്പോൾ 30,000 രൂപ വർദ്ധിച്ച് 1,49,000 രൂപയായി മാറി.

മാക്ബുക്ക് നിയോ: ഇതിന്റെ പഴയ വില 69,900 രൂപയായിരുന്നു. എന്നാൽ ഇപ്പോൾ 10,000 രൂപയുടെ വർദ്ധനവോടെ 79,900 രൂപയ്ക്ക് മാത്രമേ ഇത് സ്വന്തമാക്കാൻ സാധിക്കൂ.

മാക്ബുക്ക് പ്രോ: ഏറ്റവും കൂടുതൽ വില കൂടിയത് പ്രോ മോഡലിനാണ്. 1,89,000 രൂപയുണ്ടായിരുന്ന മാക്ബുക്ക് പ്രോയ്ക്ക് ഒറ്റയടിക്ക് 50,000 രൂപയാണ് കമ്പനി കൂട്ടിയിരിക്കുന്നത്. നിലവിലെ പുതിയ വില 2,39,000 രൂപയാണ്.

ഐപാഡ്, ഹോംപോഡ് നിരക്കുകളിലും മാറ്റം

പഠനാവശ്യങ്ങൾക്കും പ്രൊഫഷണൽ ആവശ്യങ്ങൾക്കും ആളുകൾ ഏറെ ആശ്രയിക്കുന്ന ഐപാഡുകൾക്കും ഇനി മുതൽ കൂടുതൽ പണം മുടക്കേണ്ടി വരും.

ഐപാഡ് എയർ (M4): ആപ്പിളിന്റെ കരുത്തുറ്റ M4 ചിപ്പോട് കൂടിയ ഐപാഡ് എയറിന് 25,000 രൂപയാണ് വർദ്ധിച്ചത്. പഴയ വിലയായ 64,900 രൂപയിൽ നിന്നും ഇത് 89,900 രൂപയിലെത്തി.

ഐപാഡ് പ്രോ: മുൻപ് 99,900 രൂപയ്ക്ക് ലഭിച്ചിരുന്ന ഐപാഡ് പ്രോ മോഡലിന് ഇപ്പോൾ 39,100 രൂപ കൂടി പുതിയ വില 1,39,000 രൂപയായി ഉയർന്നു.

ഹോംപോഡ്: ആപ്പിളിന്റെ സ്മാർട്ട് സ്പീക്കറായ ഹോംപോഡിന്റെ വില 32,900 രൂപയിൽ നിന്നും 12,000 രൂപ വർദ്ധിച്ച് 44,900 രൂപയായി.

ഹോംപോഡ് മിനി: സാധാരണക്കാർക്ക് ബഡ്ജറ്റ് ഫ്രണ്ട്ലിയായിരുന്ന ഹോംപോഡ് മിനിക്കും 5,000 രൂപ കൂടിയിട്ടുണ്ട്. പഴയ വിലയായ 10,900 രൂപയിൽ നിന്നും ഇത് 15,900 രൂപയായി മാറി.

എന്തുകൊണ്ടാണ് ഈ വിലക്കയറ്റം?

ആർട്ടിഫിഷ്യൽ ഇന്റലിജൻസ് ഫീച്ചറുകൾ പ്രവർത്തിക്കാൻ ഉയർന്ന റാമും കൂടുതൽ സ്റ്റോറേജ് കപ്പാസിറ്റിയും ആവശ്യമാണ്. ഇത്തരം അഡ്വാൻസ്ഡ് മെമ്മറി ചിപ്പുകൾക്ക് ആഗോളതലത്തിൽ വലിയ ഡിമാൻഡ് ഉള്ളതുകൊണ്ട് തന്നെ ഇവയുടെ നിർമ്മാണച്ചെലവ് ക്രമാതീതമായി ഉയർന്നു. ഇതാണ് ഉൽപ്പന്നങ്ങളുടെ വില കൂട്ടാൻ ആപ്പിളിനെ പ്രേരിപ്പിച്ച പ്രധാന ഘടകം.

ഇതിന് പുറമെ, ഇന്ത്യൻ രൂപയുടെ മൂല്യത്തിലുണ്ടാകുന്ന ഇടിവ്, ഉയർന്ന ഇറക്കുമതി തീരുവ നികുതികൾ എന്നിവയും വില വർദ്ധനവിന് കാരണമായിട്ടുണ്ട്. വരും ദിവസങ്ങളിൽ പുറത്തിറങ്ങാനിരിക്കുന്ന ഐഫോൺ 18 പ്രോ 18 പ്രോ മാക്സ് ഉൾപ്പെടെയുള്ള ആപ്പിളിന്റെ പ്രീമിയം ഫോണുകളുടെ വിലയും കുത്തനെ ഉയർത്തിയേക്കും.