സൈബർ തട്ടിപ്പുകളിൽ നിന്നും എങ്ങനെ രക്ഷപെടാം? പേടിവേണ്ട തടയാൻ 'ചക്ഷു' കൂടെയുണ്ട്

ഇന്നത്തെ ഡിജിറ്റൽ യുഗത്തിൽ സാങ്കേതികവിദ്യ വളരുന്നതിനോടൊപ്പം തന്നെ സൈബർ തട്ടിപ്പുകളും വർദ്ധിച്ചുവരികയാണ്. വ്യാജ ഫോൺ കോളുകൾ, എസ്എംഎസുകൾ, വാട്സ്ആപ്പ് സന്ദേശങ്ങൾ എന്നിവ വഴി നിരപരാധികളായ ആളുകളെ കബളിപ്പിക്കുന്നത് നിത്യസംഭവമായി മാറിയിരിക്കുന്നു. ഇത്തരത്തിലുള്ള സൈബർ കുറ്റകൃത്യങ്ങൾ തടയുന്നതിനായി കേന്ദ്ര വാർത്താവിനിമയ മന്ത്രാലയം (DoT) ആവിഷ്കരിച്ച പ്രധാനപ്പെട്ട ഒരു പദ്ധതിയാണ് 'സഞ്ചാർ സാഥി'. ഈ പോർട്ടലിന് കീഴിലുള്ള 'ചക്ഷു' (chakshu facility) എന്ന സംവിധാനം വഴി തട്ടിപ്പ് ലക്ഷ്യമിട്ടുള്ള ആശയവിനിമയങ്ങൾ റിപ്പോർട്ട് ചെയ്യാൻ പൊതുജനങ്ങൾക്ക് സാധിക്കുമെന്ന് സർക്കാർ പാർലമെന്റിൽ അറിയിച്ചു.

എന്താണ് ചക്ഷു (Chakshu)?

സഞ്ചാർ സാഥി പോർട്ടലിലെ ഒരു പൗരകേന്ദ്രീകൃത സംവിധാനമാണ് ചക്ഷു. തട്ടിപ്പ് ലക്ഷ്യമിട്ട് നിങ്ങളെ തേടിയെത്തുന്ന സംശയാസ്പദമായ കോളുകൾ, എസ്എംഎസുകൾ, അല്ലെങ്കിൽ സോഷ്യൽ മീഡിയ സന്ദേശങ്ങൾ (ഉദാഹരണത്തിന് വാട്സ്ആപ്പ്) എന്നിവയെക്കുറിച്ച് സർക്കാരിലേക്ക് നേരിട്ട് വിവരം നൽകാൻ ഇത് സഹായിക്കുന്നു. ബാങ്ക് അക്കൗണ്ട് അപ്ഡേറ്റ്, കെവൈസി (KYC) പുതുക്കൽ, ലോട്ടറി അടിച്ചു എന്ന വ്യാജ സന്ദേശം, ജോലി വാഗ്ദാനം തുടങ്ങിയവയെല്ലാം ഇതിലൂടെ റിപ്പോർട്ട് ചെയ്യാം.

സർക്കാർ നടപടികൾ ശക്തം

രാജ്യസഭയിൽ ഉയർന്ന ചോദ്യത്തിന് മറുപടിയായി വാർത്താവിനിമയ സഹമന്ത്രി പെമ്മസാനി ചന്ദ്രശേഖർ നൽകിയ കണക്കുകൾ പ്രകാരം, ചക്ഷു വഴി ലഭിച്ച വിവരങ്ങളുടെ അടിസ്ഥാനത്തിൽ സർക്കാർ വലിയ നടപടികളാണ് സ്വീകരിച്ചിരിക്കുന്നത്. ഏകദേശം 39.43 ലക്ഷം മൊബൈൽ കണക്ഷനുകൾ ഇതുവരെ വിച്ഛേദിച്ചു. കൂടാതെ, കുറ്റകൃത്യങ്ങൾക്കായി ഉപയോഗിച്ച 2.27 ലക്ഷം മൊബൈൽ ഹാൻഡ്‌സെറ്റുകൾ ബ്ലാക്ക്‌ലിസ്റ്റ് ചെയ്യുകയും, 1.31 ലക്ഷം എസ്എംഎസ് ടെംപ്ലേറ്റുകൾ ബ്ലോക്ക് ചെയ്യുകയും ചെയ്തു.

ചക്ഷു പ്ലാറ്റ്‌ഫോമിൽ പ്രധാനമായും താഴെ പറയുന്ന വിഭാഗങ്ങളിലുള്ള തട്ടിപ്പുകൾ റിപ്പോർട്ട് ചെയ്യാവുന്നതാണ്.

വ്യാജ കസ്റ്റമർ കെയർ നമ്പറുകളിൽ നിന്നുള്ള കോളുകൾ.

സർക്കാർ ഉദ്യോഗസ്ഥരെന്ന വ്യാജേനയുള്ള ആൾമാറാട്ടം.

ഫിഷിംഗ് ലിങ്കുകൾ അടങ്ങിയ സന്ദേശങ്ങൾ.

നിക്ഷേപ തട്ടിപ്പുകൾ

ലോട്ടറി, ജോലി വാഗ്ദാനങ്ങൾ നൽകിയുള്ള കബളിപ്പിക്കൽ.

ചക്ഷു സൗകര്യം പ്രധാനമായും 'തട്ടിപ്പ് ശ്രമങ്ങൾ' റിപ്പോർട്ട് ചെയ്യാനാണ്. അതായത്, നിങ്ങൾക്ക് ഒരു വ്യാജ സന്ദേശം ലഭിച്ചു, എന്നാൽ നിങ്ങൾ പണം നഷ്ടപ്പെടുത്തിയിട്ടില്ല എങ്കിൽ അത് ചക്ഷു വഴി അറിയിക്കാം. എന്നാൽ, നിങ്ങൾക്ക് പണം നഷ്ടപ്പെടുകയോ സാമ്പത്തിക തട്ടിപ്പിന് ഇരയാവുകയോ ചെയ്തിട്ടുണ്ടെങ്കിൽ, ആഭ്യന്തര മന്ത്രാലയത്തിന് കീഴിലുള്ള 'ഇന്ത്യൻ സൈബർ ക്രൈം കോർഡിനേഷൻ സെന്റർ' (I4C) വഴിയോ 1930 എന്ന ഹെൽപ്പ് ലൈൻ നമ്പറിലോ ആണ് പരാതിപ്പെടേണ്ടത്.

ഡിജിറ്റൽ ഇന്റലിജൻസ് പ്ലാറ്റ്‌ഫോം (DIP) തട്ടിപ്പുകൾ തടയാനായി ടെലികോം വകുപ്പ് 'ഡിജിറ്റൽ ഇന്റലിജൻസ് പ്ലാറ്റ്‌ഫോം' എന്ന പേരിൽ ഒരു സുരക്ഷിത സംവിധാനവും ഒരുക്കിയിട്ടുണ്ട്. ഇതിൽ ബാങ്കുകൾ, ടെലികോം സേവനദാതാക്കൾ, യുപിഐ ആപ്പുകൾ, വാട്സ്ആപ്പ് തുടങ്ങിയ 1200-ലധികം സ്ഥാപനങ്ങൾ അംഗങ്ങളാണ്. ഈ സംവിധാനത്തിലൂടെ ലഭിച്ച വിവരങ്ങൾ ഉപയോഗിച്ച് ഇതുവരെ 1000 കോടിയിലധികം രൂപയുടെ സാമ്പത്തിക തട്ടിപ്പുകൾ ഒഴിവാക്കാൻ സാധിച്ചു എന്നത് വലിയ നേട്ടമാണ്. ഡിജിറ്റൽ സുരക്ഷ ഉറപ്പാക്കാൻ ഏവരും ജാഗ്രത പാലിക്കേണ്ടത് അത്യാവശ്യമാണ്.