മോട്ടോ ജി77 പവർ ഇന്ത്യയിലെത്തി; 24,000 രൂപ ബഡ്ജറ്റിൽ ഇതിലും മികച്ച ഫോൺ സ്വപ്നങ്ങളിൽ മാത്രം

ഇന്ത്യൻ ബഡ്ജറ്റ് സ്മാർട്ട്ഫോൺ വിപണിയിലേക്ക് പുത്തൻ മോഡൽ പുറത്തിറക്കി മോട്ടറോള. മോട്ടോ ജി77 പവർ (Moto G77 Power) എന്ന് പേരിട്ടിരിക്കുന്ന ഈ സ്മാർട്ട്ഫോൺ അതിന്റെ കരുത്തുറ്റ ബാറ്ററിയും ഈടുനിൽക്കുന്ന ഡിസൈനും കൊണ്ട് ലോഞ്ചിന് മുൻപ് തന്നെ വലിയ ശ്രദ്ധ നേടിയിരുന്നു. മികച്ച ഡിസ്പ്ലേയും മിലിട്ടറി ഗ്രേഡ് സുരക്ഷിതത്വവും ഉറപ്പുനൽകുന്ന ഈ ഫോൺ ഇടത്തരം ബഡ്ജറ്റിൽ സ്മാർട്ട്ഫോൺ തിരയുന്നവർക്ക് ഒരു മികച്ച ഓപ്ഷനാണ്.

ആകർഷകമായ വില

ഇന്ത്യയിൽ ഒരൊറ്റ വേരിയന്റിൽ മാത്രമാണ് ഈ ഫോൺ ലഭ്യമാകുക. 8GB റാമും 128GB സ്റ്റോറേജുമുള്ള മോഡലിന് 23,999 രൂപയാണ് കമ്പനി വിലയിട്ടിരിക്കുന്നത്. പ്രശസ്തമായ പന്റോൺ കമ്പനി ക്യൂറേറ്റ് ചെയ്ത 'പന്റോൺ ഫ്യൂഷിയ റെഡ്', 'പന്റോൺ നോട്ടിക്കൽ ബ്ലൂ', 'പന്റോൺ ഇംപെനെട്രബിൾ' എന്നീ മൂന്ന് മനോഹരമായ നിറങ്ങളിലാണ് ഫോൺ വാങ്ങാൻ സാധിക്കുക. വിഗൻ ലെതർ ഫിനിഷിലും പിഎംഎംഎ ഫിനിഷിലും ഇതിന്റെ ബാക്ക് പാനൽ ലഭ്യമാണ്. 2026 ജൂലൈ 13 മുതൽ ഓൺലൈൻ ഷോപ്പിംഗ് സൈറ്റായ ഫ്ലിപ്കാർട്ട്, മോട്ടോറോളയുടെ ഔദ്യോഗിക വെബ്സൈറ്റ്, കൂടാതെ രാജ്യത്തുടനീളമുള്ള പ്രമുഖ റീട്ടെയിൽ സ്റ്റോറുകൾ എന്നിവ വഴി ഫോൺ വിൽപ്പനയ്‌ക്കെത്തും.

ഇതിനൊപ്പം ആകർഷകമായ ടെലികോം ഓഫറുകളും മോട്ടോറോള പ്രഖ്യാപിച്ചിട്ടുണ്ട്. ജിയോ സിം ഉപയോഗിക്കുന്ന ഉപഭോക്താക്കൾക്കായി പ്രത്യേക ആനുകൂല്യങ്ങൾ ഫോണിനൊപ്പം ലഭിക്കും. വെറും 200 രൂപയുടെ പ്രതിമാസ ചിലവിൽ 15 പ്രീമിയം ആപ്പുകൾ അടങ്ങുന്ന ഒടിടി പാസ്സ് ഈ ഓഫറിലൂടെ സ്വന്തമാക്കാം. യഥാർത്ഥത്തിൽ 1500 രൂപയോളം വിലവരുന്ന ഈ പാസ്സ് വളരെ കുറഞ്ഞ നിരക്കിൽ ലഭിക്കുന്നത് ഉപഭോക്താക്കൾക്ക് വലിയൊരു ലാഭമായിരിക്കും.

7000mAh ബാറ്ററിയും 30W ടർബോ ചാർജിംഗും

ഈ ഫോണിന്റെ ഏറ്റവും വലിയ സവിശേഷത ഇതിൽ ഉൾപ്പെടുത്തിയിരിക്കുന്ന വമ്പൻ 7000mAh ബാറ്ററിയാണ്. ഒറ്റത്തവണ പൂർണ്ണമായി ചാർജ് ചെയ്താൽ മൂന്ന് ദിവസം വരെ ബാറ്ററി ലൈഫ് ലഭിക്കുമെന്നാണ് കമ്പനി അവകാശപ്പെടുന്നത്. തുടർച്ചയായി ഫോൺ ഉപയോഗിക്കുന്നവർക്കും യാത്ര ചെയ്യുന്നവർക്കും ചാർജർ കൂടെക്കരുതാതെ തന്നെ ധൈര്യമായി ഈ ഫോൺ ഉപയോഗിക്കാം. ഈ വലിയ ബാറ്ററിയെ വേഗത്തിൽ ചാർജ് ചെയ്യാൻ 30W ടർബോപവർ ചാർജിംഗ് സാങ്കേതികവിദ്യയും ഫോണിലുണ്ട്. ഇതിന് പുറമെ 6W വയേർഡ് റിവേഴ്സ് ചാർജിംഗ് സംവിധാനവും ഇതിലുണ്ട്. അതായത്, ആവശ്യമെങ്കിൽ ഒരു പവർ ബാങ്ക് പോലെ ഈ ഫോൺ ഉപയോഗിച്ച് മറ്റ് ചെറിയ ഡിവൈസുകൾ ചാർജ് ചെയ്യാൻ സാധിക്കും. ഫോണിനൊപ്പം ബോക്സിൽ 33W ചാർജറും യുഎസ്ബി ടൈപ്പ്-സി കേബിളും ലഭിക്കുന്നതാണ്.

അത്യാധുനിക ഡിസ്പ്ലേയും വാട്ടർ ടച്ച് സാങ്കേതികവിദ്യയും

മോട്ടോ ജി77 പവർ സ്മാർട്ട്ഫോണിൽ 6.72 ഇഞ്ച് ഫുൾ എച്ച്ഡി പ്ലസ് (FHD+) എൽസിഡി ഡിസ്പ്ലേയാണ് നൽകിയിരിക്കുന്നത്. സുഗമമായ ഉപയോഗത്തിന് 120Hz റീഫ്രഷ് റേറ്റും ഇതിനുണ്ട്. കടുത്ത വെയിലിൽ പോലും സ്ക്രീനിലെ ദൃശ്യങ്ങൾ വ്യക്തമായി കാണാൻ സഹായിക്കുന്ന 1050 നിറ്റ്സ് ബ്രൈറ്റ്നസ്സും ഡിസ്പ്ലേ കളർ ബൂസ്റ്റ് സാങ്കേതികവിദ്യയും ഈ ഫോണിന്റെ പ്രത്യേകതയാണ്. സുരക്ഷയ്ക്കായി കോർണിംഗ് ഗൊറില്ല ഗ്ലാസ് 7i സംരക്ഷണവും ഇതിനുണ്ട്. ഫോണിന്റെ മറ്റൊരു പ്രധാന ആകർഷണം ഇതിലെ സ്മാർട്ട് വാട്ടർ ടച്ച് സാങ്കേതികവിദ്യയാണ്. കൈകളിൽ വെള്ളം നനഞ്ഞിരിക്കുമ്പോൾ പോലും ഫോണിന്റെ ടച്ച് സ്ക്രീൻ കൃത്യമായും തടസ്സമില്ലാതെയും പ്രവർത്തിക്കാൻ ഇത് സഹായിക്കും. കഠിനമായ സാഹചര്യങ്ങളെ അതിജീവിക്കാൻ സാധിക്കുന്ന MIL-STD-810H മിലിട്ടറി ഗ്രേഡ് ഡ്യൂറബിലിറ്റിയും ഇതിനുണ്ട്. കൂടാതെ പൊടിയെയും വെള്ളത്തെയും ചെറുക്കാൻ IP64 റേറ്റിംഗും ഈ ഫോൺ ഉറപ്പുനൽകുന്നു. ഫോണിന്റെ ഭാരം 215 ഗ്രാം ആണ്.

മീഡിയടെക് ഡിമെൻസിറ്റി 6400 പ്രൊസസ്സറാണ് ഈ ഫോണിന് കരുത്ത് പകരുന്നത്. ഇതിന്റെ 8GB റാം 'റാം ബൂസ്റ്റ്' ഫീച്ചർ വഴി 24GB വരെ വർദ്ധിപ്പിക്കാൻ സാധിക്കും. 128GB ഇൻബിൽറ്റ് സ്റ്റോറേജാണ് ഫോണിലുള്ളതെങ്കിലും മൈക്രോ എസ്ഡി കാർഡ് ഉപയോഗിച്ച് സ്റ്റോറേജ് 1TB വരെ കൂട്ടാം. ലേറ്റസ്റ്റ് ആൻഡ്രോയിഡ് 16 ഒപ്പറേറ്റിംഗ് സിസ്റ്റത്തിലാണ് ഫോൺ പ്രവർത്തിക്കുന്നത്. ഫോണിന് ആൻഡ്രോയിഡ് 17 ലേക്കുള്ള അപ്‌ഗ്രേഡും 3 വർഷത്തെ സുരക്ഷാ അപ്‌ഡേറ്റുകളും കമ്പനി വാഗ്ദാനം ചെയ്യുന്നുണ്ട്. വോയ്‌സ് കൺട്രോളിനായി ഗൂഗിൾ ജെമിനി സപ്പോർട്ടും ഇതിലുണ്ട്.

ഫോട്ടോഗ്രഫി ഇഷ്ടപ്പെടുന്നവർക്കായി 50 മെഗാപിക്സൽ മെയിൻ ക്യാമറയാണ് ഇതിലുള്ളത്. സോണിയുടെ അത്യാധുനിക ലിറ്റിയ 600 സെൻസറാണ് ഇതിൽ ഉപയോഗിച്ചിരിക്കുന്നത്. ഇതിനൊപ്പം 8 മെഗാപിക്സലിന്റെ അൾട്രാ വൈഡ് ആംഗിൾ ക്യാമറയും (2-in-1 ലൈറ്റ് സെൻസർ സഹിതം) പിന്നിലുണ്ട്. നൈറ്റ് വിഷൻ, പോർട്രെയ്റ്റ്, പ്രോ മോഡ്, ഗൂഗിൾ ഫോട്ടോസ് മാജിക് ഇറേസർ, ഫോട്ടോ അൺബ്ലർ തുടങ്ങിയ മികച്ച ക്യാമറ ഫീച്ചറുകൾ ഇതിലുണ്ട്. സെൽഫികൾക്കായി മുന്നിൽ 32 മെഗാപിക്സൽ ക്യാമറയും നൽകിയിട്ടുണ്ട്. മെയിൻ ക്യാമറ വഴി 2K വീഡിയോകൾ റെക്കോർഡ് ചെയ്യാം. ഡിജിറ്റൽ സിഗ്നൽ മികച്ചതാക്കാൻ ഇലക്ട്രോണിക് ഇമേജ് സ്റ്റെബിലൈസേഷൻ സംവിധാനവുമുണ്ട്. 25,000 രൂപയിൽ താഴെ ബഡ്ജറ്റ് ഉള്ളവർക്ക് ധൈര്യമായി പരിഗണിക്കാവുന്ന മോഡലാണ് മോട്ടോ ജി77 പവർ.