സ്മാർട്ട്ഫോൺ ലോകത്തെ മാറ്റിമറിക്കാൻ വൺപ്ലസ് 15T! ഫീച്ചേഴ്സ് കണ്ടാൽ കിളി പറക്കും

സ്മാർട്ട്‌ഫോൺ ലോകം ഏറെ ആകാംക്ഷയോടെ കാത്തിരിക്കുന്ന വൺപ്ലസ് 15T (OnePlus 15T) മാർച്ച് 24-ന് ചൈനയിൽ ഔദ്യോഗികമായി പുറത്തിറങ്ങും. ഇന്ത്യയുൾപ്പെടെയുള്ള ആഗോള വിപണികളിൽ വൺപ്ലസ് 15s (OnePlus 15s) എന്ന പേരിലാകും ഈ മോഡൽ എത്തുകയെന്നാണ് സൂചനകൾ. കോംപാക്ട് ഡിസൈനിൽ കരുത്തുറ്റ പെർഫോമൻസ് വാഗ്ദാനം ചെയ്യുന്ന ഈ ഫോൺ, പ്രധാനമായും ഗെയിമിംഗ് ആരാധകരെ ലക്ഷ്യം വെച്ചാണ് കമ്പനി രൂപകൽപ്പന ചെയ്തിരിക്കുന്നത്.

ഗെയിമിംഗിനായി 'ഇ-സ്‌പോർട്‌സ് ട്രിപ്പിൾ കോർ'

വൺപ്ലസ് 15T-യുടെ ഏറ്റവും വലിയ പ്രത്യേകത അതിലെ 'ഇ-സ്‌പോർട്‌സ് ട്രിപ്പിൾ കോർ' (Esports Triple-Core) സംവിധാനമാണ്. 3nm പ്രോസസ്സിൽ നിർമ്മിച്ച ക്വാൽകോം സ്നാപ്ഡ്രാഗൺ 8 എലൈറ്റ് ജെൻ 5 (Snapdragon 8 Elite Gen 5) ചിപ്‌സെറ്റാണ് ഇതിന് കരുത്ത് പകരുന്നത്. ഇതിനൊപ്പം ഗെയിമിംഗിലെ ടച്ച് റെസ്പോൺസ് മെച്ചപ്പെടുത്തുന്ന 'ലിങ്‌സി' (Lingxi) ടച്ച് ചിപ്പും, തടസ്സമില്ലാത്ത വൈഫൈ കണക്റ്റിവിറ്റിക്കായി G2 ചിപ്പും ഉൾപ്പെടുത്തിയിട്ടുണ്ട്. 'വിൻഡ് ചേസർ ഗെയിമിംഗ് കേർണൽ' (Wind Chaser Gaming Kernel) വഴി 1.5K റെസല്യൂഷനിൽ 165fps വരെ ഗെയിമിംഗ് വേഗത കൈവരിക്കാൻ ഈ ഫോണിന് സാധിക്കുമെന്ന് കമ്പനി അവകാശപ്പെടുന്നു.

കരുത്തുറ്റ ബാറ്ററിയും അതിവേഗ ചാർജിംഗും

ബാറ്ററി ലൈഫിന്റെ കാര്യത്തിൽ വൺപ്ലസ് 15T പുതിയ റെക്കോർഡുകൾ കുറിക്കും. 7,500mAh ശേഷിയുള്ള വമ്പൻ 'ഗ്ലേഷ്യർ ബാറ്ററി'യാണ് (Glacier Battery) ഇതിലുള്ളത്. ഇത് ഏകദേശം 10.3 മണിക്കൂർ വരെ തുടർച്ചയായി ഗെയിം കളിക്കാനും 22.8 മണിക്കൂർ വീഡിയോ പ്ലേബാക്കിനും സഹായിക്കും. 100W സൂപ്പർ വൂക് (SuperVOOC) വയർഡ് ചാർജിംഗും 50W വയർലെസ് ചാർജിംഗും ഇതിൽ ലഭ്യമാണ്. കൂടാതെ, ഗെയിം കളിക്കുമ്പോൾ ഫോൺ ചൂടാകുന്നത് ഒഴിവാക്കാൻ 'ബൈപാസ് ചാർജിംഗ്' (Bypass Charging) സൗകര്യവും നൽകിയിട്ടുണ്ട്.

ഡിസ്‌പ്ലേയും ക്യാമറയും

6.32 ഇഞ്ച് വലിപ്പമുള്ള ഫ്ലാറ്റ് OLED ഡിസ്‌പ്ലേയാണ് ഫോണിനുള്ളത്. 165Hz റിഫ്രഷ് റേറ്റും 1.5K റെസല്യൂഷനും മികച്ച ദൃശ്യാനുഭവം നൽകും. വെറും 1.1mm മാത്രമുള്ള നേർത്ത ബെസലുകൾ ഫോണിന് കൂടുതൽ പ്രീമിയം ലുക്ക് നൽകുന്നു. ക്യാമറയുടെ കാര്യത്തിലും വലിയ അപ്ഡേറ്റുകളുണ്ട്. 50 മെഗാപിക്സൽ സോണി അൾട്രാ വിഷൻ മെയിൻ ക്യാമറയും, 3.5x ഒപ്റ്റിക്കൽ സൂം നൽകുന്ന 50 മെഗാപിക്സൽ പെരിസ്കോപ്പ് ടെലിഫോട്ടോ ലെൻസും പിന്നിലുണ്ടാകും. LUMO ഇമേജിംഗ് സിസ്റ്റം ഉപയോഗിക്കുന്നതിനാൽ പ്രൊഫഷണൽ നിലവാരമുള്ള ചിത്രങ്ങൾ പകർത്താൻ സാധിക്കും.

മറ്റ് സവിശേഷതകൾ

അൾട്രാസോണിക് ഇൻ-ഡിസ്‌പ്ലേ ഫിംഗർപ്രിന്റ് സെൻസർ, IP66, IP68, IP69 റേറ്റിംഗുകളോടു കൂടിയ വാട്ടർ ആൻഡ് ഡസ്റ്റ് റെസിസ്റ്റൻസ് എന്നിവയും വൺപ്ലസ് 15T-യിലുണ്ട്. 12GB/16GB റാം വകഭേദങ്ങളിലും 256GB മുതൽ 1TB വരെയുള്ള സ്റ്റോറേജ് ഓപ്ഷനുകളിലും ഫോൺ ലഭ്യമാകും. പ്യുവർ കൊക്കോ (Pure Cocoa), റിലാക്സിംഗ് മാച്ച (Relaxing Matcha), ഹീലിംഗ് വൈറ്റ് ചോക്ലേറ്റ് (Healing White Chocolate) എന്നീ മൂന്ന് ആകർഷകമായ നിറങ്ങളിലാണ് ഫോൺ എത്തുന്നത്. മാഗ്നറ്റിക് കൂളിംഗ് ഫാൻ ഉൾപ്പെടെയുള്ള പ്രത്യേക ആക്സസറികളും ഇതിനൊപ്പം വൺപ്ലസ് അവതരിപ്പിക്കുന്നുണ്ട്.