വില കേട്ടാൽ ഞെട്ടും! സാംസങ് ഗാലക്സി S25 അൾട്രക്ക് 40,000 രൂപയോളം കുറഞ്ഞു, അവസരം പാഴാക്കരുത്

പ്രീമിയം സ്മാർട്ട്‌ഫോൺ വാങ്ങാൻ ആഗ്രഹിക്കുന്നവർക്ക് ഇതാ ഒരു സുവർണ്ണാവസരം. സാംസങ്ങിന്റെ ഏറ്റവും മികച്ച ഫ്ലാഗ്ഷിപ്പ് ഫോണായ സാംസങ് ഗാലക്സി S25 അൾട്രക്ക് അതിന്റെ ലോഞ്ചിന് ശേഷമുള്ള ഏറ്റവും വലിയ വിലക്കുറവ് വരികയാണ്. വരാനിരിക്കുന്ന ആമസോൺ പ്രൈം ഡേ സെയിലിന്റെ (Amazon Prime Day Sale) ഭാഗമായാണ് ഈ വൻ ഓഫർ വരുന്നത്. ജൂലൈ 4 മുതൽ 6 വരെ നടക്കുന്ന പ്രൈം ഡേ സെയിലിൽ ഈ ഫോൺ 90,000 രൂപയിൽ താഴെ വിലയ്ക്ക് ലഭ്യമാകുമെന്ന് ആമസോൺ ഇന്ത്യയുടെ പ്രൊമോഷണൽ ബാനർ വ്യക്തമാക്കുന്നു.

വിലയിലെ ഞെട്ടിക്കുന്ന മാറ്റങ്ങൾ

സാംസങ് ഗാലക്സി S25 അൾട്രായുടെ അടിസ്ഥാന വേരിയന്റായ 12GB റാം, 256GB സ്റ്റോറേജ് മോഡലിനാണ് ഈ ഓഫർ ബാധകമാകുന്നത്. ഈ ഫോണിന്റെ യഥാർത്ഥ ലോഞ്ച് വില 1,29,999 രൂപയായിരുന്നു. എന്നാൽ ആമസോൺ പുറത്തുവിട്ട പ്രൊമോഷണൽ കാർഡിൽ ഫോണിന്റെ വില പൂർണ്ണമായി കാണിക്കാതെ '8_,__9' എന്ന സൂചനയാണ് നൽകിയിരിക്കുന്നത്. അതായത് ഫോണിന്റെ വില 90,000 രൂപയിൽ താഴെയായിരിക്കുമെന്ന് ഇത് വ്യക്തമാക്കുന്നു. ലോഞ്ച് വിലയിൽ നിന്നും ഏകദേശം 39,999 രൂപയുടെ വൻ കിഴിവാണ് ഉപഭോക്താക്കൾക്ക് ലഭിക്കാൻ പോകുന്നത്.

ഇന്ത്യയിൽ ഈ ഫോണിന് ലഭിക്കുന്ന ഏറ്റവും കുറഞ്ഞ നിരക്കാണിത്. ഇതിനുമുമ്പ് ആമസോൺ ഗ്രേറ്റ് സമ്മർ സെയിലിൽ ഈ ഫോൺ 99,999 രൂപയ്ക്ക് വിറ്റിരുന്നതാണ് ഏറ്റവും കുറഞ്ഞ റെക്കോർഡ്. ഇതിന് പുറമെ ആക്‌സിസ് ബാങ്ക്, എസ്ബിഐ ക്രെഡിറ്റ് കാർഡുകൾ ഉപയോഗിച്ച് പണം അടയ്ക്കുന്നവർക്ക് 10 ശതമാനം അധിക ഡിസ്കൗണ്ടും ലഭിക്കും. ഇതോടെ യോഗ്യരായ കാർഡ് ഉടമകൾക്ക് ഫോണിന്റെ ഫലപ്രദമായ വില ഇതിലും കുറയും.

ഗാലക്സി S25 അൾട്രായുടെ പ്രധാന സവിശേഷതകൾ

ആൻഡ്രോയിഡ് 15 അടിസ്ഥാനമാക്കിയുള്ള വൺ യുഐയിലാണ് ഈ ഫോൺ പ്രവർത്തിക്കുന്നത്. ഏറ്റവും പുതിയ സ്നാപ്ഡ്രാഗൺ 8 എലൈറ്റ് ചിപ്സെറ്റാണ് ഫോണിന് കരുത്ത് പകരുന്നത്. 120Hz റിഫ്രഷ് റേറ്റുള്ള 6.9 ഇഞ്ചിന്റെ ഭീമാകാരമായ LTPO അമോലെഡ് ഡിസ്‌പ്ലേയാണ് ഫോണിനുള്ളത്. പുറകിൽ ഏറ്റവും മികച്ച 200 മെഗാപിക്സലിന്റെ ക്വാഡ് ക്യാമറ സെറ്റപ്പും മുന്നിൽ 12 മെഗാപിക്സലിന്റെ സെൽഫി ക്യാമറയും നൽകിയിരിക്കുന്നു. 45W ഫാസ്റ്റ് ചാർജിംഗിനെ പിന്തുണയ്ക്കുന്ന 5,000mAh ബാറ്ററിയാണ് ഇതിലുള്ളത്. കമ്പനി അവകാശപ്പെടുന്നത് അനുസരിച്ച് 31 മണിക്കൂർ വരെ ബാറ്ററി ലൈഫ് ലഭിക്കും. കൂടാതെ വയർലെസ് ചാർജിംഗ് സൗകര്യവുമുണ്ട്.

ടൈറ്റാനിയം ഫിനിഷോട് കൂടിയ പ്രീമിയം ലുക്ക്, ഫോണിനൊപ്പം ഇൻ-ബിൽറ്റായി ലഭിക്കുന്ന എസ് പെൻ, ഐപി68 വാട്ടർ ആൻഡ് ഡസ്റ്റ് റെസിസ്റ്റൻസ്, ഇൻ-ഡിസ്‌പ്ലേ ഫിംഗർപ്രിന്റ് സെൻസർ, എൻഎഫ്സി പിന്തുണ. ഏറ്റവും ആകർഷകമായ കാര്യം, ഈ ഫോണിന് 7 വർഷത്തെ ഒഎസ് അപ്‌ഡേറ്റുകളും സെക്യൂരിറ്റി അപ്‌ഡേറ്റുകളും സാംസങ് വാഗ്ദാനം ചെയ്യുന്നുണ്ട് എന്നതാണ്. അതുകൊണ്ട് തന്നെ ദീർഘകാലം ഉപയോഗിക്കാൻ പറ്റിയ ഒരു പ്രീമിയം ആൻഡ്രോയിഡ് ഫോൺ തിരയുന്നവർക്ക് ഈ പ്രൈം ഡേ സെയിൽ മികച്ചൊരു അവസരമായിരിക്കും.