ഇന്ത്യയെ കണ്ടെത്താൻ ഗ്രാമങ്ങളിലേക്ക് പോകാം, രാജ്യത്തെ ഏറ്റവും മനോഹരമായ 6 ഗ്രാമങ്ങൾ ഇവയാണ്
തിരക്കുകൾക്കിടയിൽ ആരും ശ്രദ്ധിക്കാതെ പോയ വലിയ ചരിത്രവും ഭംഗിയുമുള്ള നിരവധി ഗ്രാമങ്ങൾ നമ്മുടെ രാജ്യത്തുണ്ട്. ഹൈവേകളിൽ നിന്ന് മാറി ഇടുങ്ങിയ മലമ്പാതകൾ തുടങ്ങുന്ന, മൊബൈൽ റേഞ്ച് ഇല്ലാതാകുന്ന പ്രകൃതിയോട് ഇണങ്ങി ജീവിക്കുന്ന യഥാർത്ഥ ഇന്ത്യയെ ഇത്തരം ഗ്രാമങ്ങളിൽ കാണാൻ സാധിക്കും.
ഇവ തിരക്കില്ലാത്ത വെറും സ്ഥലങ്ങൾ മാത്രമല്ല, മറിച്ച് നൂറ്റാണ്ടുകൾ പഴക്കമുള്ള സംസ്കാരവും മനോഹരമായ പ്രകൃതിദൃശ്യങ്ങളും കൂടിയുളള ഇടങ്ങളാണ്. മഞ്ഞുമൂടിയ മലനിരകൾക്ക് നടുവിലെ താഴ്വരകൾ മുതൽ ദ്വീപുകൾ വരെ ഇക്കൂട്ടത്തിലുണ്ട്.യാത്ര ചെയ്യാൻ ഇഷ്ടപ്പെടുന്നവരാണ് നിങ്ങളെങ്കിൽ ഇവിടങ്ങളിൽ നിർബന്ധമായും പോയിരിക്കണം.
1. മേചുക, അരുണാചൽ പ്രദേശ്
ഇന്ത്യ-ചൈന അതിർത്തിയോട് ചേർന്നു കിടക്കുന്ന മേചുക എന്ന ഗ്രാമത്തിന്റെ ഭംഗി നിങ്ങളെ അത്ഭുതപ്പെടുത്തും. മഞ്ഞുമൂടിയ മലനിരകൾക്ക് താഴെയായി പരന്നുകിടക്കുന്ന പച്ചപ്പുനിറഞ്ഞ താഴ്വരകളും അതിലൂടെ ഒഴുകുന്ന നദികളും പുൽമേടുകളും പരമ്പരാഗത വീടുകളും ഇവിടുത്തെ പ്രത്യേകതയാണ്. വാണിജ്യവൽക്കരണം ഒട്ടും ബാധിക്കാത്ത ഈ പ്രദേശം വടക്കുകിഴക്കൻ ഇന്ത്യയിൽ ഏറ്റവും കുറവ് ആളുകൾ സന്ദർശിച്ച ഇടങ്ങളിൽ ഒന്നാണ്. മെമ്പ ഗോത്രവർഗ്ഗക്കാരുടെ താമസസ്ഥലമായ ഇവിടെ നൂറ്റാണ്ടുകൾ പഴക്കമുള്ള ബുദ്ധമത ആശ്രമങ്ങളും കാണാം.
2. കൽപ, ഹിമാചൽ പ്രദേശ്
സഞ്ചാരികൾ എല്ലാ വർഷവും മണാലിയിലേക്കും ഷിംലയിലേക്കും ഓടുമ്പോൾ, ഹിമാചൽ പ്രദേശിലെ കിന്നൗർ ജില്ലയിൽ വളരെ ശാന്തമായി ഒളിഞ്ഞിരിക്കുന്ന ഗ്രാമമാണ് കൽപ. ഇന്ത്യയിലെ ഏറ്റവും മനോഹരമായ മലനിരകളുടെ ദൃശ്യങ്ങൾ സമ്മാനിക്കുന്ന ഒന്നാണ് ഈ പ്രദേശം. ആപ്പിൾ തോട്ടങ്ങൾക്കും പാരമ്പര്യ തടി വീടുകൾക്കും പുറമെ കിന്നർ കൈലാഷ് മലനിരകളുടെ മനോഹരമായ കാഴ്ചയും ഇവിടെനിന്ന് ആസ്വദിക്കാം. പ്രശസ്തമായ ഹിൽ സ്റ്റേഷനുകളിൽ നിന്ന് വ്യത്യസ്തമായി കൽപ നിങ്ങൾക്ക് സമ്മാനിക്കുന്നത് ശാന്തമായ ഒരു സമാധാന അന്തരീക്ഷമാണ്.
3. മാവ്ലിനോങ്, മേഘാലയ
ഏഷ്യയിലെ ഏറ്റവും വൃത്തിയുള്ള ഗ്രാമമെന്ന നിലയിൽ മാവ്ലിനോങ് അന്താരാഷ്ട്ര തലത്തിൽ തന്നെ പ്രശസ്തമാണ്. എന്നാൽ വെറുമൊരു വൃത്തിയുടെ പേരിൽ മാത്രമല്ല ഈ ഗ്രാമം ശ്രദ്ധേയമാകുന്നത്. പച്ചപ്പുനിറഞ്ഞ പ്രകൃതിയാൽ ചുറ്റപ്പെട്ട ഈ ഗ്രാമത്തിൽ മുളകൊണ്ട് നിർമ്മിച്ച സ്കൈവാക്കുകൾ, ഖാസി ജനതയുടെ തനത് സംസ്കാരം, പ്രകൃതിദത്തമായ ലിവിങ് റൂട്ട് ബ്രിഡ്ജുകൾ എന്നിവയുണ്ട്. ഗ്രാമവാസികൾ എല്ലാവരും ഒത്തൊരുമിച്ച് തങ്ങളുടെ പരിസ്ഥിതി സംരക്ഷിക്കുന്നു എന്നതാണ് ഈ സ്ഥലത്തെ സവിശേഷമാക്കുന്നത്.
4. ഖോനോമ, നാഗാലാൻഡ്
ഇന്ത്യയിലെ ആദ്യത്തെ ഗ്രീൻ വില്ലേജ് ആയി കണക്കാക്കപ്പെടുന്ന സ്ഥലമാണ് ഖോനോമ. പ്രകൃതി സംരക്ഷണത്തിന് ഒരു ഗ്രാമം ഒന്നിച്ച് ഇറങ്ങിയാൽ എങ്ങനെയിരിക്കും എന്നതിന്റെ മികച്ച ഉദാഹരണമാണിത്. അങ്ങാമി നാഗാ വിഭാഗത്തിൽപ്പെട്ട ആളുകൾ ജീവിക്കുന്ന ഈ ഗ്രാമം മലഞ്ചെരുവുകളിലെ തട്ടുതട്ടുകളായുള്ള കൃഷിസ്ഥലങ്ങൾക്ക് നടുവിലാണ് സ്ഥിതി ചെയ്യുന്നത്. പണ്ടുകാലത്ത് നായാട്ട് ശീലമാക്കിയിരുന്ന ഇവിടുത്തെ ജനങ്ങൾ, പിന്നീട് പ്രാദേശിക ജൈവവൈവിധ്യം സംരക്ഷിക്കുന്നതിലേക്ക് മാറുകയായിരുന്നു. സംസ്കാരത്തിന്റെയും പ്രകൃതി സംരക്ഷണത്തിന്റെയും മനോഹരമായ സംയോജനമാണ് ഈ ഗ്രാമം.
5. മുൻഷിയാരി, ഉത്തരാഖണ്ഡ്
കുമയോൺ ഹിമാലയൻ നിരകളിൽ സ്ഥിതി ചെയ്യുന്ന മുൻഷിയാരി പല പ്രശസ്തമായ ട്രെക്കിംഗ് പാതകളുടെയും പ്രവേശന കവാടമാണ്. പഞ്ചചൂലി കൊടുമുടികളുടെ പശ്ചാത്തലത്തിൽ സ്ഥിതി ചെയ്യുന്ന ഈ ഗ്രാമം മറ്റ് വിനോദസഞ്ചാര കേന്ദ്രങ്ങളെപ്പോലെ തിരക്കുകളില്ലാത്ത ഒന്നാണ്. നിബിഡ വനങ്ങളും ഗ്രാമീണ പാതകളും പ്രാദേശിക സംസ്കാരവും ആസ്വദിക്കുന്നതിനൊപ്പം കാലാവസ്ഥ അനുസരിച്ച് മാറുന്ന ഹിമാലയത്തിന്റെ അതിമനോഹരമായ ദൃശ്യങ്ങളും ഇവിടെ നിന്നും ആസ്വദിക്കാം.
6. മജൂലി, അസം
ഈ പട്ടികയിലെ മറ്റ് സ്ഥലങ്ങളിൽ നിന്നെല്ലാം തികച്ചും വ്യത്യസ്തമായ ഒന്നാണ് മജൂലി. ലോകത്തിലെ ഏറ്റവും വലിയ ജനവാസമുള്ള നദീദ്വീപാണിത്. പ്രകൃതിയും ആത്മീയതയും സംസ്കാരവും ഒരുപോലെ ഒത്തുചേരുന്ന ഒരിടം. നൂറ്റാണ്ടുകളായി തനത് നൃത്തരൂപങ്ങളും നാടകങ്ങളും സംരക്ഷിച്ചുപോരുന്ന 'സത്രങ്ങൾ' എന്ന് വിളിക്കപ്പെടുന്ന വൈഷ്ണവ ആശ്രമങ്ങളാൽ സമ്പന്നമാണ് മജൂലി. ഗ്രാമങ്ങളിലൂടെ സൈക്കിൾ ചവിട്ടുന്നതും നദിക്ക് മുകളിലെ സൂര്യാസ്തമയം കാണുന്നതും സാധാരണ ടൂറിസത്തിൽ നിന്ന് തികച്ചും വ്യത്യസ്തമായ ഒരു അനുഭൂതിയാണ് സമ്മാനിക്കുക.
Click it and Unblock the Notifications
Sign in with Google