കല്ലാറിന്റെ കുളിരിൽ കുട്ടവഞ്ചി തുഴയാം, ആനക്കൂട് കാണാം, കുംഭാവരുട്ടി വെള്ളച്ചാട്ടവും

Updated: Monday, September 11, 2023, 16:27 [IST]

ഈ മഴക്കാലത്ത് വനഭംഗി ആസ്വദിച്ച് ഒരു കുട്ടവഞ്ചി സവാരി നടത്തിയാലോ? കൊള്ളാമായിരിക്കും അല്ലേ? സംശയമേ വേണ്ട, സാഹസികത ഇഷ്ടപ്പെടുന്നവരാണെങ്കിൽ തീർച്ചയായും നിങ്ങളുടെ ഇഷ്ട യാത്രകളിൽ ഒന്നായി മാറും ഇതെന്ന് തീർച്ച. എവിടെയാണ് ഈ സവാരിയെന്നല്ലേ അടുത്ത ചോദ്യം? നമ്മുടെ സ്വന്തം അടവി ഇക്കോ ടൂറിസം സെന്റിൽ തന്നെ.

കുട്ടവഞ്ചി സവാരി മാത്രമല്ല കേട്ടോ, കോന്നി ആന വളർത്തൽ കേന്ദ്രം, കുംഭാവുരുട്ടി വെള്ളച്ചാട്ടം, അച്ചൻകോവിൽ ശാസ്താക്ഷേത്രം എന്നീ സ്ഥലങ്ങളും വേണ്ടുവോളം കണ്ട് ആസ്വദിക്കാം. കൊല്ലം കെഎസ്ആർടിസിയുടെ ബജറ്റ് ടൂറിസം സെല്ലാണ് ഇത്തരമൊരു യാത്ര സംഘടിപ്പിക്കുന്നത്.

സപ്റ്റംബർ 24ന് രാവിലെ ആറ് മണിക്കാണ് കൊല്ലത്ത് നിന്ന് യാത്ര ആരംഭിക്കുക. അടവിയിലെത്തി അവിടെ നിന്ന് പ്രഭാത ഭക്ഷണം കഴിച്ച ശേഷം ആദ്യം യാത്ര അച്ചൻകോവിൽ ആറിന്‍റെ കൈവഴിയായ കല്ലാറിന്‍റെ തീരത്തുള്ള അടവി ഇക്കോ ടൂറിസം സെന്‍ററിലേക്കാണ്. സംസ്ഥാനത്തെ അറിയപ്പെടുന്ന മഴക്കാല ടൂറിസം കേന്ദ്രമാണ് അടവി. ഇവിടം കണ്ട് കഴിഞ്ഞാൽ നേരെ കുട്ടവഞ്ചി സവാരി കേന്ദ്രത്തിലേക്ക്.

കോന്നി ഇക്കോ ടൂറിസത്തിന്‌ കീഴിൽ വനം വകുപ്പ്‌ നേരിട്ടാണ് അടവി വിനോദസഞ്ചാര കേന്ദ്രം നിയന്ത്രിക്കുന്നത്. കേരളത്തിൽ ആദ്യമായി കുട്ടവഞ്ചി സവാരി ആരംഭിച്ചതും ഇവിടെയാണ്. സാഹസികരുടെ പ്രിയ ഇടമായ ഇവിടെ കൃത്യമായ സുരക്ഷാ മാനദണ്ഡങ്ങളോടെയാണ് കുട്ടവഞ്ചി സവാരി നടത്തുക.

വന ഭംഗിയും കല്ലാറിന്റെ കുളിരുമൊക്കെ ആസ്വദിച്ച് കല്ലാറിൽ മുണ്ടോംമുഴി മുതൽ ഇരട്ടയാർ വരെയുള്ള നാല് കിമി ദൂരമാണ് കുട്ടവഞ്ചിയിലുള്ള സാഹസിക യാത്ര. ഈ മഴക്കാലത്ത് കുട്ടവഞ്ചിയിലൂടെയൊരു യാത്ര ഏതൊരു സാഹസികരും തീർച്ചയായും ഇഷ്ടപ്പെടും. കുട്ടവഞ്ചി യാത്ര കഴിഞ്ഞാൽ യാത്ര നേരെ കോന്നി ആനത്താവളത്തിലേക്ക് പോകും. ആനകളെ കാണാനും അവയെ പറ്റി കൂടുതലായി മനസിലാക്കാനുമെല്ലാം സഞ്ചാരികൾക്ക് സാധിക്കും.കോന്നി ആനക്കൂടും അവിടുത്തെ ഫിലിം പ്രദർശനവും, ആന മ്യൂസിയവും കണ്ട ശേഷം അച്ചൻകോവിൽ വനത്തിലൂടെ കുംഭാവുരുട്ടി വെളളച്ചാട്ടത്തിലേക്കാണ് അടുത്ത യാത്ര.

പൈതൽ മലയിൽ നിന്ന് ഉത്ഭവിക്കുന്ന അതിമനോഹരമായ ഒരു വെള്ളച്ചാട്ടമാണ് കുംഭ വുരുട്ടി. കുംഭാവുരുട്ടി വെള്ളച്ചാട്ടത്തിൽ ഒരു കുളിയും കഴിഞ്ഞ് മടങ്ങി വരുന്ന വഴിക്ക് അച്ചൻകോവിൽ ക്ഷേത്രദർശനം നടത്തേണ്ടവർക്ക് അതിനുള്ള സൗകര്യവും നൽകുന്നതാണ്. തിരികെ അച്ചൻകോവിൽ വനത്തിലൂടെയുള്ള യാത്രയിൽ സന്ധ്യാ സമയത്ത് ധാരാളം മൃഗങ്ങളെ കാണാനുള്ള സാധ്യത ഉള്ളതിനാൽ ശരിക്കും ഒരു ജംഗിൾ സഫാരി എന്നു വേണമെങ്കിൽ പറയാം... കൊല്ലം ഡിപ്പോയിൽ തിരിച്ചെത്തും. യാത്രക്കൂലിയായി 600 രൂപയാണ് ഈടാക്കുന്നത്. കൂടുതൽ വിവരങ്ങൾക്ക് 9747969768, 9496110124 എന്നീ നമ്പറുകളിൽ ബന്ധപ്പെടാം.