വിമാനത്താവളങ്ങളില്ലാത്ത രാജ്യങ്ങളോ? ഇവിടേക്ക് ബസ്സിൽ പോകാം, അതിസുന്ദരമായ സ്ഥലങ്ങൾ

വിമാന യാത്ര സർവസാധാരണമായ ഇക്കാലത്ത് വിമാനത്താവളങ്ങളില്ലാത്ത രാജ്യങ്ങളുണ്ടെന്ന് കേൾക്കുന്നത് അമ്പരപ്പുണ്ടാക്കുന്നതാണ്. കുറഞ്ഞ ചിലവിൽ ലോകം ചുറ്റാൻ സാധിക്കുമ്പോൾ, ചിലയിടങ്ങളിലേക്ക് വിമാനമാർഗ്ഗം പ്രവേശനം അസാധ്യമാണ്.

എന്നാൽ, ഈ രാജ്യങ്ങളെല്ലാം മികച്ച രീതിയിൽ പ്രവർത്തിക്കുകയും ഓരോ വർഷവും ധാരാളം സഞ്ചാരികളെ ആകർഷിക്കുകയും ചെയ്യുന്നുണ്ട്. വിമാനമിറങ്ങാൻ സൗകര്യമില്ലാത്ത ഈ രാജ്യങ്ങളിലേക്ക് ആളുകൾ എങ്ങനെ എത്തുന്നു എന്ന ആകാംഷയുണ്ടെങ്കിൽ, അഞ്ച് വിമാനത്താവളങ്ങളില്ലാത്ത രാജ്യങ്ങളെയും അവിടേക്കുള്ള യാത്രാമാർഗങ്ങളെയും പരിചയപ്പെടാം.

വത്തിക്കാൻ സിറ്റി

ലോകത്തിലെ ഏറ്റവും ചെറിയ രാജ്യമായ വത്തിക്കാൻ സിറ്റിക്ക് സ്വന്തമായി വിമാനത്താവളമില്ല. പാർക്കിംഗ് സൗകര്യം ഒരുക്കാൻ പോലും മതിയായ സ്ഥലമില്ലാത്തതിനാലാണ് ഈ നഗരരാഷ്ട്രത്തിന് റൺവേകൾ ഇല്ലാത്തത്. റോമിനുള്ളിൽ സ്ഥിതി ചെയ്യുന്ന വത്തിക്കാൻ സിറ്റിക്ക് അര ചതുരശ്ര കിലോമീറ്ററിൽ താഴെ മാത്രം വിസ്തൃതിയുള്ളൂ. ഇത് കാൽനടയായി സഞ്ചരിക്കാൻ എളുപ്പമാക്കുന്നു, പല സമീപപ്രദേശങ്ങളേക്കാളും ചെറുതാണിത്.

സഞ്ചാരികൾ സാധാരണയായി റോമിലെ ലിയോനാർഡോ ഡാവിഞ്ചി (ഫ്യൂമിസിനോ) വിമാനത്താവളത്തിൽ എത്തിച്ചേരുകയും തുടർന്ന് കാൽനടയായോ ചെറിയ യാത്രാവാഹനങ്ങളിലോ വത്തിക്കാനിലേക്ക് പോകുകയും ചെയ്യുന്നു. മാർപ്പാപ്പയുടെ പ്രസംഗത്തിൽ പങ്കെടുത്ത ശേഷം മിനിറ്റുകൾക്കുള്ളിൽ അതിർത്തി കടന്ന് ജെലാറ്റോ ആസ്വദിക്കാൻ കഴിയുന്ന അപൂർവ രാജ്യങ്ങളിലൊന്നുകൂടിയാണ് വത്തിക്കാൻ സിറ്റി.

സാൻ മരീനോ

സ്വന്തമായി വിമാനത്താവളമില്ലാത്ത മനോഹരമായ സാൻ മരീനോ, മധ്യ ഇറ്റലിയിലെ ഒരു പാറക്കെട്ടുള്ള മലമുകളിൽ ഉയരത്തിലാണ് സ്ഥിതി ചെയ്യുന്നത്. ഇറ്റലിയിലെ റിമിനി വിമാനത്താവളത്തിൽ വിമാനമിറങ്ങിയ ശേഷം, സഞ്ചാരികൾ സാധാരണയായി ഡ്രൈവ് ചെയ്തും അല്ലെങ്കിൽ ബസ്സിൽ കയറിയും ഈ രാജ്യത്തിനകത്തേക്ക് പ്രവേശിക്കുന്നു.

വലുപ്പത്തിൽ ചെറുതാണെങ്കിലും, ലോകത്തിലെ ഏറ്റവും പഴക്കമുള്ള റിപ്പബ്ലിക്കുകളിൽ ഒന്നാണ് സാൻ മരീനോ. അവിടുത്തെ കൽത്തറകളും മധ്യകാല ഗോപുരങ്ങളും സന്ദർശകരെ ഒരു പഴയകാലത്തിലേക്ക് കൂട്ടിക്കൊണ്ടുപോകുന്നു.

ലിച്ചൻസ്റ്റീൻ

ഓസ്ട്രിയയ്ക്കും സ്വിറ്റ്സർലൻഡിനും ഇടയിൽ സ്ഥിതി ചെയ്യുന്ന മനോഹരമായ ഒരു രാജ്യമാണ് ലിച്ചൻസ്റ്റീൻ. ഇവിടെ വിമാനത്താവളങ്ങളില്ലാത്തതിനാൽ നേരിട്ട് വിമാനമിറങ്ങാൻ സാധ്യമല്ല. എന്നിരുന്നാലും, യൂറോപ്പിലെ തിരക്കേറിയ വിമാനത്താവളങ്ങളിലൊന്നായ സൂറിച്ച് എയർപോർട്ടിൽ നിന്ന് ഏകദേശം ഒരു മണിക്കൂർ യാത്ര ചെയ്താൽ ഇവിടെയെത്താം. മനോഹരമായ കാഴ്ചകളും കൊട്ടാരങ്ങളും പർവതഗ്രാമങ്ങളും ഈ രാജ്യത്തിന്റെ പ്രത്യേകതകളാണ്.

ആൻഡോറ

പിറനീസിലെ മലനിരകൾക്കിടയിൽ സ്ഥിതി ചെയ്യുന്ന ആൻഡോറയ്ക്കും സ്വന്തമായി വിമാനത്താവളങ്ങളില്ല. വിമാനത്താവളങ്ങൾക്ക് പകരം മനോഹരമായ പർവതങ്ങളും ലോകോത്തര സ്കീയിംഗ് കേന്ദ്രങ്ങളുമാണ് ഈ രാജ്യത്തിന്റെ ആകർഷണം. സ്പെയിനിലെ ബാർസലോണ വിമാനത്താവളത്തിലോ ഫ്രാൻസിലെ ടൂലൂസ് വിമാനത്താവളത്തിലോ ഇറങ്ങി ബസ് മാർഗം ഇവിടെയെത്താം. ഹെലികോപ്റ്റർ സൗകര്യങ്ങളും ലഭ്യമാണ്.

മൊണാക്കോ

ആഡംബര കപ്പലുകളും, പഞ്ചനക്ഷത്ര ഹോട്ടലുകളും, പ്രശസ്തമായ ഫോർമുല 1 സ്ട്രീറ്റ് സർക്യൂട്ടുമെല്ലാമുള്ള മൊണാക്കോയിലും വിമാനത്താവളമില്ല. ഫ്രാൻസിലെ നൈസ് കോട്ട് ഡി അസൂർ വിമാനത്താവളത്തിൽ എത്തി റോഡ് മാർഗമോ ഹെലികോപ്റ്റർ വഴിയോ മൊണാക്കോയിലെത്താം. വിമാനത്താവളത്തിൽ നിന്ന് കാസിനോയിലേക്ക് അരമണിക്കൂറിനുള്ളിൽ എത്താൻ കഴിയുന്ന ചുരുക്കം ചില രാജ്യങ്ങളിൽ ഒന്നാണിത്.