എറണാകുളം - ഷൊർണൂർ മെമു ട്രെയിൻ ഇനി നിലമ്പൂരേക്കും; സർവ്വീസ് നീട്ടി

മുക്കം: എറണാകുളം - ഷൊർണൂർ മെമു ട്രെയിൻ നിലമ്പൂർക്ക് നീട്ടി. റെയിൽവേ മന്ത്രി അശ്വിനി വൈഷ്ണവാണ് ഇക്കാര്യം അറിയിച്ചത്. ഏറെനാളായുള്ള പ്രദേശവാസികളുടെ ആവശ്യമാണ് ഇതോടെ നടപ്പിലായിരിക്കുന്നത്..

66325, 66326 എന്നീ നമ്പറുകളിലാണ് മെമു ട്രെയിന്‍ സര്‍വീസ് നടത്തുകയെന്ന് കേന്ദ്ര മന്ത്രി ജോർജ് കുര്യനും സമൂഹമാധ്യമത്തിലൂടെ അറിയിച്ചു. അതേസമയം പുതിയ സർവ്വീസ് ഏത് സമയത്തായിരിക്കും സർവ്വീസ് നടത്തുകയെന്നത് വ്യക്തമല്ല.

നിലവിൽ വൈകീട്ട് 5.40 നാണ് എറണാകുളം ജങ്ഷനിൽ നിന്നും മെമു സർവ്വീസ് ആരംഭിക്കുന്നത്. 8.40 നാണ് ട്രെയിൻ ഷൊർണൂരിൽ എത്തുന്നത്. ഇതിന് ശേഷമായിരിക്കും നിലമ്പൂരിലേക്കുള്ള യാത്ര.

നിലമ്പൂർ മെമു; ഇടപെട്ടെന്ന് പ്രിയങ്ക ഗാന്ധി എം പി

മെമു നിലമ്പൂരിലേക്ക് നീട്ടണമെന്ന ആവശ്യം പ്രിയങ്ക ഗാന്ധി എം പി. വണ്ടൂരിൽ വച്ച് വിളിച്ചു ചേർത്ത പാലക്കാട് റെയിൽവേ ഡിവിഷൻ ഉദ്യോഗസ്ഥരുടെ യോഗത്തിൽ ഉന്നയിച്ച പ്രധാനപ്പെട്ട ഒരു ആവശ്യമായിരുന്നുവെന്ന് കോൺഗ്രസ്. ഈ വിഷയം ഉന്നയിച്ച്‌ റെയിൽവേ ബോർഡിന്‌ പ്രിയങ്ക ഗാന്ധി എം പി കത്തും അയച്ചിരുന്നു. കോട്ടയം നിലമ്പൂർ എക്സ്പ്രസിന് രണ്ടു കോച്ചുകൾ കൂടി ഉൾപ്പെടുത്തുമെന്ന് ദക്ഷിണ റെയിൽവേ അറിയിച്ചതായും പ്രിയങ്ക ഗാന്ധി എംപിയുടെ ഓഫീസ് അറിയിച്ചു.

നേരത്തെ പ്രിയങ്ക ഗാന്ധി എം.പി.യുടെ ഇടപെടലിനെ തുടർന്ന് രണ്ട് കോച്ചുകൾ ഈ ട്രെയിന് അധികമായി അനുവദിച്ചിരുന്നു. അതിന് പുറമെയാണ് രണ്ട് കോച്ചുകൾ കൂടി അനുവദിച്ചിരിക്കുന്നത്. കോയമ്പത്തൂർ - ഷൊർണൂർ മെമു കൂടി നിലമ്പൂർക്ക് നീട്ടുക ,നിലമ്പൂർ -ഷൊർണുർ സെക്ഷനിൽ കൂടുതൽ സ്റ്റോപ്പുകൾ അനുവദിക്കുക , മേലാറ്റൂർ , കുലുക്കലൂർ എന്നിവിടങ്ങളിൽ ക്രോസ്സിങ് സ്റ്റേഷൻ അനുവദിക്കുക ,നിലമ്പൂർ കോട്ടയം എക്സ്പ്രസ്സ് കൊല്ലത്തേക്ക് നീട്ടുക ,തൊടികപ്പുലത്തും , കാരാടും റെയിൽവേ ഓവർ ബ്രിഡ്ജ് /അണ്ടർ ബ്രിഡ്ജ് സ്ഥാപിക്കുക , രാജ്യറാണി എക്സ്പ്രസ്സ് തിരുവനന്തപുരത്തേക്ക് നീട്ടുക ,തുവ്വൂർ നിലമ്പൂർ വാണിയമ്പലം സ്റ്റേഷനുകളുടെ വികസനം തുടങ്ങിയവ മേയ്‌ ‌ 5 ന്‌ വണ്ടൂരിൽ പ്രിയങ്ക ഗാന്ധി എം പി വിളിച്ച്‌ ചേർത്ത റെയിൽവേ ഉന്നത ഉദ്യോഗസ്ഥരുടെ മീറ്റിംഗിൽ ഉന്നയിച്ച ആവശ്യങ്ങളായിരുന്നുവെന്നും പ്രിയങ്ക ഗാന്ധിയുടെ ഓഫീസ് ഇറക്കിയ പത്രുകറിപ്പിൽ പറഞ്ഞു.