10,000 രൂപയ്ക്ക് ഗോവ കാണാം; രസമൊട്ടും കുറയാതെ: താമസം, ഭക്ഷണം, യാത്രാ വിശദാംശങ്ങള്‍ ഇതാ

10,000 രൂപ കൊണ്ട് ഇന്ത്യയിലെ ഏറ്റവും ജനപ്രിയ വിനോദസഞ്ചാര കേന്ദ്രങ്ങളിലൊന്നായ ഗോവയില്‍ പോയി വരാന്‍ കഴിയുമോ? വിശ്വസിക്കാന്‍ അല്‍പം പ്രയാസം കാണും, അല്ലേ? മൂന്നു മാസത്തെ ശമ്പളത്തില്‍ അല്‍പം നീക്കി വച്ചാല്‍ ഗോവ സുന്ദരമായി കണ്ടുമടങ്ങാം. അല്‍പം ചെലവു ചുരുക്കണമെന്നു മാത്രം. ആഡംബരങ്ങള്‍ കുറച്ച് രസമൊട്ടും കുറയാതെ തന്നെ ഇടത്തരം വരുമാനക്കാര്‍ക്കും ഗോവ സന്ദര്‍ശിക്കാന്‍ മാര്‍ഗങ്ങള്‍ ഏറെയുണ്ട്.

മനോഹരമായ ബീച്ചുകള്‍, ഊര്‍ജസ്വലമായ നൈറ്റ് ലൈഫ്, ആഡംബര, ബജറ്റ് റിസോര്‍ട്ടുകള്‍, ഹോംസ്റ്റേകള്‍, വായില്‍ വെള്ളമൂറുന്ന സീഫുഡ് എന്നിവയാല്‍ സമ്പന്നമാണ് ഗോവ. ഗോവയില്‍ പോയി ഒന്ന് അടിച്ചുപൊളിക്കാന്‍ വലിയ ചിലവ് വേണ്ടി വരും എന്നാണ് പലരും കരുതുന്നത്. പൈസ് ഇല്ലാത്തതിനാല്‍ ഗോവ യാത്ര സ്വപ്‌നം മാത്രമായി മാറ്റിവയ്ക്കുന്നവരും ഉണ്ട്. എന്നാല്‍ വെറും 10000 രൂപ കൊണ്ട് ഗോവ കണ്ടു മടങ്ങാന്‍ കഴിയും. അതിനായി നല്ലൊരു പ്ലാനിങ് വേണമെന്നു മാത്രം.

ഏപ്രില്‍ മുതല്‍ സെപ്റ്റംബര്‍ വരെയുള്ള ഓഫ്-സീസണ്‍ സമയത്താണ് കുറഞ്ഞ ബജറ്റില്‍ ഗോവ സന്ദര്‍ശിക്കാന്‍ ഏറ്റവും അനുയോജ്യമായ സമയം. ഈ കാലയളവില്‍ വിനോദസഞ്ചാരികളുടെ വലിയ തിരക്ക് ഉണ്ടാകില്ല. താമസം, യാത്ര ഉള്‍പ്പെടെ എല്ലാം കുറഞ്ഞ നിരക്കില്‍ ലഭിക്കും.

ഫ്‌ളൈറ്റ് നിരക്ക്: ഓഫ് സീസണില്‍ മുംബൈ, ഡല്‍ഹി, ബെംഗളൂരു തുടങ്ങിയ നഗരങ്ങളില്‍ നിന്ന് 2,000-3,000 രൂപ മുതല്‍ ആരംഭിക്കുന്ന നിരക്കില്‍ ഗോവയിലേക്കുള്ള ഫ്‌ളൈറ്റുകള്‍ ലഭിക്കും.
താമസം: ഓഫ് സീസണില്‍ ഹോട്ടലുകളും റിസോര്‍ട്ടുകളും ഡിസ്‌കൗണ്ടുകളും ആകര്‍ഷകമായ പാക്കേജുകളും വാഗ്ദാനം ചെയ്യുന്നു. ഇത് പ്രയോജനപ്പെടുത്തിയാല്‍ കുറഞ്ഞ നിരക്കില്‍ താമസം തരപ്പെടുത്താന്‍ കഴിയും. പോക്കറ്റ് കാലിയാകാതെയുള്ള താമസത്തിന് ഒരു രാത്രിക്ക് ഏകദേശം 800-1,500 രൂപ നല്‍കേണ്ടി വരുമെന്ന് പ്രതീക്ഷിക്കാം.

റോഡ് യാത്ര: ഗോവയിലേക്ക് വാഹനം ഓടിച്ച് പോകാനാണ് പദ്ധതിയിടുന്നതെങ്കില്‍ ഗതാഗതക്കുരുക്ക് ഒഴിവാക്കാന്‍ ഓഫ് സീസണ്‍ നല്ല സമയമാണ്. ടോളുകള്‍ക്കും ഇന്ധനത്തിനും കുറഞ്ഞ നിരക്ക് പ്രതീക്ഷിക്കാം.

താമസിക്കാന്‍ കുറഞ്ഞ ബജറ്റിലുള്ള ഗസ്റ്റ് ഹൗസുകളോ ഹോംസ്റ്റേകളോ തിരഞ്ഞെടുക്കാം. ഒരു രാത്രിക്ക് 800-1,200 രൂപ മുതല്‍ ആരംഭിക്കുന്ന പാക്കേജുകള്‍ ഉണ്ട്. പ്രാദേശിക ആതിഥ്യ മര്യാദയും സംസ്‌കാരവും അനുഭവിക്കാന്‍ ഇത് നല്ല അവസരമാണ്. ഇനി ഹോട്ടലുകളിലാണെങ്കില്‍ താമസിക്കാന്‍ ആഗ്രഹിക്കുന്നതെങ്കില്‍ ഒരു രാത്രിക്ക് ഏകദേശം 1,200-2,000 രൂപയ്ക്ക് വൃത്തിയുള്ളതും സുഖപ്രദവുമായ മുറികള്‍ വാഗ്ദാനം ചെയ്യുന്ന ഹോട്ടലുകള്‍ക്കായി തിരയുക. പല ബജറ്റ് ഹോട്ടലുകളും സൗജന്യ വൈ-ഫൈയും പ്രഭാത ഭക്ഷണവും വാഗ്ദാനം ചെയ്യുന്നു.

ഇനി സോളോ യാത്രക്കാര്‍ക്കാണെങ്കില്‍ ഒരു രാത്രിക്ക് 500-1,000 രൂപയ്ക്ക് ഡോര്‍മിറ്ററികളും ഹോസ്റ്റലുകളും ലഭിക്കും.

ഗോവ പര്യവേക്ഷണം ചെയ്യാന്‍ ഒരു ദിവസം 200-300 രൂപയ്ക്ക് ഒരു സ്‌കൂട്ടറോ ബൈക്കോ വാടകയ്ക്കെടുക്കുക. സുരക്ഷിതമായ യാത്രയ്ക്കായി ഹെല്‍മെറ്റ് ധരിക്കുകയും പ്രാദേശിക ഗതാഗത നിമങ്ങള്‍ പാലിക്കുകയും ചെയ്യുക. ലോക്കല്‍ ബസുകള്‍ പ്രധാന പട്ടണങ്ങളെയും ബീച്ചുകളെയും ബന്ധിപ്പിക്കുന്നു, ഒരാള്‍ക്ക് 10-50 രൂപ മുതല്‍ നിരക്കുകള്‍ ആരംഭിക്കും. ബജറ്റ് യാത്രയ്ക്ക് ഇത് അനുയോജ്യമാണ്. ഓട്ടോറിക്ഷകളോ ടാക്‌സികളോ വാടകയ്ക്കെടുത്താല്‍ വിലപേശുക.

പ്രാദേശിക ഭക്ഷണശാലകളില്‍ ഒരാള്‍ക്ക് 150-250 രൂപയ്ക്ക് ഭക്ഷണം ആരംഭിക്കും. പരമ്പരാഗത ഗോവന്‍ വിഭവങ്ങളായ ഫിഷ് കറി, സാകുട്ടി, ബെബിങ്ക എന്നിവ പരീക്ഷിക്കാം. തിരിച്ചു വീട്ടിലേക്കു പോകുമ്പോള്‍ കൊണ്ടുപോകാന്‍ കരകൗശല വസ്തുക്കള്‍ വാങ്ങിക്കാന്‍ ഫ്‌ളീ മാര്‍ക്കറ്റ് അല്ലെങ്കില്‍ പന്‍ജിം മാര്‍ക്കറ്റ് പോലുള്ള പ്രാദേശിക വിപണികള്‍ സന്ദര്‍ശിക്കുക. ഇങ്ങനെ
യാത്രാ പദ്ധതി മുന്‍കൂട്ടി ആസൂത്രണം ചെയ്ത് ചെലവുകള്‍ കുറയ്ക്കാനാകും.