കൊച്ചി വാട്ടര് മെട്രോ മാതൃക ഗോവയിലേക്ക്; 87 ബോട്ടുകള്, 8 റൂട്ടുകള്, അകമഴിഞ്ഞ് കേന്ദ്ര സഹായം
പനാജി: കൊച്ചി വാട്ടര് മെട്രോയുടെ വിജയകരമായ മാതൃക പിന്തുടര്ന്ന് ഗോവയിലും വാട്ടര് മെട്രോ പദ്ധതി വരുന്നു. പദ്ധതിയുടെ ഒന്നാം ഘട്ട നിര്മാണ പ്രവര്ത്തനങ്ങള്ക്ക് കേന്ദ്ര സര്ക്കാര് മുന്ഗണന നല്കും. പനാജിയില് ക്യാപ്റ്റന് ഓഫ് പോര്ട്ട്സ് വകുപ്പിന്റെ പുതിയ കെട്ടിടം ഉദ്ഘാടനം ചെയ്ത് സംസാരിക്കവേ കേന്ദ്ര തുറമുഖ-ഷിപ്പിംഗ്-ജലപാത മന്ത്രി സര്ബാനന്ദ സോനോവാളാണ് ഇക്കാര്യം അറിയിച്ചത്. ഗോവയിലെ യാത്രാസൗകര്യങ്ങള് മെച്ചപ്പെടുത്തുന്നതിനൊപ്പം സംസ്ഥാനത്തെ ടൂറിസം മേഖലയ്ക്ക് ഉണര്വ് നല്കാനും ഈ പദ്ധതിക്ക് സാധിക്കും.
കൊച്ചിയില് വിജയകരമായി നടപ്പിലാക്കിയ വാട്ടര് മെട്രോ പദ്ധതിയുടെ അതേ രീതിയിലുള്ള പ്രവര്ത്തനങ്ങളാണ് ഗോവയിലും ആവിഷ്കരിക്കുന്നത്. ഗോവ മുഖ്യമന്ത്രി പ്രമോദ് സാവന്ത് ഡല്ഹിയിലെത്തി നടത്തിയ അഭ്യര്ത്ഥനയെ തുടര്ന്നാണ് പദ്ധതി വേഗത്തിലാക്കാന് കേന്ദ്ര മന്ത്രാലയം തീരുമാനിച്ചത്. ഗോവക്കാരുടെ യാത്രാക്ലേശം പരിഹരിക്കാന് ഈ സുസ്ഥിര ജലഗതാഗത സംവിധാനത്തിന് സാധിക്കുമെന്നാണ് വിലയിരുത്തപ്പെടുന്നത്.
ഗോവയില് ജലമെട്രോ സര്വീസിനായി വിപുലമായ പഠനങ്ങളാണ് കേന്ദ്ര-സംസ്ഥാന സര്ക്കാരുകളുടെ നേതൃത്വത്തില് പൂര്ത്തിയാക്കിയത്. സംസ്ഥാനത്തെ വിവിധ ഭൗതിക സാഹചര്യങ്ങളുള്ള 28 കേന്ദ്രങ്ങള് വിശദമായി നിരീക്ഷിച്ച ശേഷമാണ് ഏറ്റവും പ്രായോഗികമായ ജലപാതകള് കണ്ടെത്തിയത്. ആകെ 111 കിലോമീറ്റര് ദൈര്ഘ്യമുള്ള വലിയ ശൃംഖലയിലൂടെ സര്വീസ് നടത്താന് തക്കവണ്ണമാണ് പുതിയ ഗതാഗത സംവിധാനം. ഇതിനായി പ്രാരംഭ ഘട്ടത്തില് എട്ട് പ്രധാന റൂട്ടുകളിലായി 87 ബോട്ടുകള് സര്വീസിന് സജ്ജമാക്കാന് ഒരുങ്ങുകയാണ്.
പദ്ധതി യാഥാര്ഥ്യമാകുന്നതോടെ പ്രതിദിന യാത്രികരുടെ എണ്ണത്തില് വലിയ വര്ദ്ധനവുണ്ടാകുമെന്നാണ് പഠന റിപ്പോര്ട്ടുകള്. നിലവില് ഉള്നാടന് ജലപാതകള് ഉപയോഗിക്കുന്ന ആളുകളേക്കാള് വേഗത്തിലും സുരക്ഷിതമായും ജനങ്ങള്ക്ക് വാട്ടര് മെട്രോ വഴി നിര്ദിഷ്ട കേന്ദ്രങ്ങളില് എത്തിച്ചേരാനാകും. വരും വര്ഷങ്ങളില് ഈ യാത്രാസംവിധാനം കൂടുതല് സജീവമാകുന്നതോടെ യാത്രക്കാരുടെ എണ്ണത്തില് വലിയ വര്ധനവുണ്ടാകും. 2041 ആകുമ്പോഴേക്കും പ്രതിദിനം അറുപതിനായിരത്തിലധികം ആളുകള് ഈ ജലമെട്രോ ഉപയോഗിക്കുമെന്നാണ് ഔദ്യോഗിക വിലയിരുത്തല്.
നിര്ദേശിക്കപ്പെട്ടിരിക്കുന്ന നാല് ജലപാത
പനാജി - നര്വെ റൂട്ട്: ഗോവയുടെ തലസ്ഥാന നഗരിയെയും പരമ്പരാഗത പ്രാധാന്യമുള്ള നര്വെ പ്രദേശത്തെയും തമ്മില് പരസ്പരം ബന്ധിപ്പിക്കുന്ന സുപ്രധാന പാതയാണിത്.
ബെറ്റിം - ഓള്ഡ് ഗോവ റൂട്ട്: ലോകമെമ്പാടുമുള്ള വിനോദസഞ്ചാരികള് സന്ദര്ശിക്കുന്ന ചരിത്രസ്മാരകങ്ങളിലേക്ക് ദിവസേനയുള്ള യാത്രക്കാര്ക്ക് വളരെ വേഗത്തില് എത്തിച്ചേരാന് സഹായിക്കുന്ന പാതയാണിത്.
വാസ്കോ - കോര്ട്ടാലിം റൂട്ട്: ഗോവയിലെ വ്യാവസായിക പ്രാധാന്യമുള്ള പ്രദേശങ്ങളെയും മറ്റു പ്രധാന സമുദ്ര ഗതാഗത മാര്ഗ്ഗങ്ങളെയും കൂട്ടിയിണക്കുന്ന ജലപാതയാണിത്.
പനാജി - ചാപ്പോര റൂട്ട്: വടക്കന് ഗോവയിലെ പ്രകൃതിരമണീയമായ കായലുകളെയും പ്രധാന വിനോദസഞ്ചാര കേന്ദ്രങ്ങളെയും കൂടുതല് ജനകീയമാക്കാന് സഹായിക്കുന്ന യാത്രയാണിത്.
കഴിഞ്ഞ പന്ത്രണ്ട് വര്ഷങ്ങള്ക്കിടയില് രാജ്യത്തെ സമുദ്ര വ്യവസായ മേഖലയില് അഭൂതപൂര്വ്വമായ വളര്ച്ചയാണ് ഉണ്ടായിട്ടുള്ളതെന്ന് കേന്ദ്രമന്ത്രി വ്യക്തമാക്കി. 'ഉള്നാടന് ജലഗതാഗത നിയമം 2021' വേഗത്തില് രാജ്യത്ത് നടപ്പിലാക്കിയ ആദ്യ സംസ്ഥാനമായി ഗോവ മാറി. കപ്പലുകള് തുറമുഖങ്ങളില് കിടക്കുന്ന സമയം മുന്പ് ശരാശരി 95 മണിക്കൂറിലധികം ആയിരുന്നെങ്കില് അത് 41 മണിക്കൂറായി കുറച്ചു. അതിനൊപ്പം തന്നെ രാജ്യത്ത് സജീവമായി പ്രവര്ത്തിക്കുന്ന ഉള്നാടന് ജലപാതകളുടെ എണ്ണം മൂന്നില് നിന്നും 32ലേക്ക് ഉയര്ത്താന് കഴിഞ്ഞത് നേട്ടമാണ്.
Click it and Unblock the Notifications
Sign in with Google