തീര്‍ത്ഥാടകര്‍ക്കായി റെയില്‍വേയുടെ 'ശ്രീ രാമായണ യാത്ര'; മുപ്പതിലധികം തീര്‍ത്ഥാടന കേന്ദ്രങ്ങള്‍ കണ്ടുവരാം

ഇന്ത്യന്‍ റെയില്‍വേ കാറ്ററിംഗ് ആന്‍ഡ് ടൂറിസം കോര്‍പ്പറേഷന്‍ വാഗ്ദാനം ചെയ്യുന്ന 'ശ്രീ രാമായണ യാത്ര'യ്ക്ക് തീര്‍ത്ഥാടകരില്‍ നിന്ന് വലിയ പ്രതികരണമാണ് ലഭിക്കുന്നത്. 30 ലധികം തീര്‍ത്ഥാടന കേന്ദ്രങ്ങള്‍ സന്ദര്‍ശിക്കുന്ന 17 ദിവസത്തെ യാത്രയാണ് ഈ ഇതിഹാസ ട്രെയിന്‍ ടൂര്‍ പാക്കേജില്‍ ഉള്‍ക്കൊള്ളിച്ചിരിക്കുന്നത്. ഇന്ത്യയുടെ ആത്മീയ പാരമ്പര്യത്തെ തൊട്ടറിയാന്‍ സഹായിക്കുന്ന ഈ യാത്ര ഭാരത് ഗൗരവ് ഡീലക്‌സ് എസി ടൂറിസ്റ്റ് ട്രെയിനിലാണ് നടത്തുന്നത്.

ജൂലൈ 25 ന് ഡല്‍ഹി സഫ്ദര്‍ജംഗ് റെയില്‍വേ സ്റ്റേഷനില്‍ നിന്നാണ് യാത്ര ആരംഭിക്കുന്നത്. ദക്ഷിണേന്ത്യ വഴി സഞ്ചരിച്ച് രാമേശ്വരത്ത് അവസാനിച്ച് ഡല്‍ഹിയിലേക്ക് മടങ്ങുന്ന വിധമാണ് ട്രെയിന്‍ ടൂര്‍ ക്രമീകരിച്ചിട്ടുള്ളത്.

ശ്രീ രാമായണ യാത്രയുടെ അഞ്ചാം പതിപ്പാണ് ഇക്കുറി ഐആര്‍സിടിസി നടത്തുന്നത്. ശ്രീരാമന്റെ ജീവിത യാത്രയുമായി ബന്ധപ്പെട്ട 30-ലധികം സ്ഥലങ്ങളാണ് യാത്രയില്‍ ഉള്‍പ്പെടുത്തിയിരിക്കുന്നത്. പൂര്‍ണമായും എയര്‍ കണ്ടീഷന്‍ ചെയ്ത കോച്ചുകളിലാണ് യാത്ര. ട്രെയിനിനുള്ളില്‍ രണ്ട് റസ്റ്റോറന്റുകളും ഒരു ആധുനിക അടുക്കളയുമുണ്ട്. ഓരോ കോച്ചിനും പ്രത്യേകം സുരക്ഷാ ഗാര്‍ഡുകളുമുണ്ട്.

തേര്‍ഡ് എസിക്ക് ഒരാള്‍ക്ക് 1,17,975 രൂപയും സെക്കന്‍ഡ് എസിക്ക് ഒരാള്‍ക്ക് 1,40,120 രൂപയും, ഫസ്റ്റ് എസി ക്യാബിന് ഒരാള്‍ക്ക് 1,66,380 രൂപയും ഫസ്റ്റ് എസി കൂപ്പെയ്ക്ക് ഒരാള്‍ക്ക് 1,79,515 രൂപയുമാണ് യാത്രാ നിരക്ക്. പൂര്‍ണമായും വെജിറ്റേറിയന്‍ ഭക്ഷണമാണ് നല്‍കുന്നത്. ത്രീ സ്റ്റാര്‍ ഹോട്ടല്‍ താമസ സൗകര്യങ്ങള്‍, കാഴ്ച കാണല്‍, യാത്രാ ഇന്‍ഷുറന്‍സ്, ടൂര്‍ മാനേജര്‍ സേവനങ്ങള്‍ എന്നിവ പാക്കേജില്‍ ഉള്‍പ്പെടുന്നു.

ഈ പാക്കേജില്‍ ഉള്‍പ്പെടുത്തിയിരിക്കുന്ന പ്രധാന തീര്‍ത്ഥാടന കേന്ദ്രങ്ങള്‍

1. അയോധ്യയിലെ ശ്രീരാമ ജന്മഭൂമി ക്ഷേത്രം, ഹനുമാന്‍ ഗര്‍ഹി, സരയൂ നദിയുടെ തീരത്തുള്ള രാം കി പൈഡി.

2. നന്ദിഗ്രാം (യുപി): ശ്രീരാമന്റെ സഹോദരന്‍ ഭരതുമായി ബന്ധമുള്ള ഭാരത് മന്ദിര്‍ സന്ദര്‍ശിക്കുക.

3. സീതാമര്‍ഹി (ബിഹാര്‍): സീതയുടെ ജന്മസ്ഥലമാണെന്ന് വിശ്വസിക്കപ്പെടുന്ന സ്ഥലമാണ് സീതാമര്‍ഹി. രാം ജാങ്കി ക്ഷേത്രം സന്ദര്‍ശിക്കാന്‍ റോഡ് മാര്‍ഗം ജനക്പൂരിലേക്ക് (നേപ്പാള്‍) യാത്ര തുടരുന്നു.

4. ബക്സര്‍ (ബിഹാര്‍): രാമരേഖ ഘട്ടും രാമേശ്വരനാഥ ക്ഷേത്രവും ഉള്‍പ്പെടുന്നു.

5. വാരാണസി (യുപി): കാശി വിശ്വനാഥ് ഇടനാഴി, തുളസി മന്ദിര്‍, സങ്കട് മോചന്‍ ഹനുമാന്‍ മന്ദിര്‍, ഗംഗാ ആരതി എന്നിവ സന്ദര്‍ശിക്കുന്നു.

6. പ്രയാഗ്രാജ്, ശൃംഗര്‍പൂര്‍, ചിത്രകൂട് (യുപി അതിര്‍ത്തി): ഇവിടെ രാമായണത്തില്‍ പരാമര്‍ശിക്കുന്ന സ്ഥലങ്ങളിലേക്കുള്ള രാത്രി താമസവും റോഡ് സന്ദര്‍ശനവും ഉള്‍പ്പെടുന്നു.

7. നാസിക് (മഹാരാഷ്ട്ര): രാമന്‍ വനവാസകാലത്ത് ജീവിച്ചിരുന്നുവെന്ന് വിശ്വസിക്കപ്പെടുന്ന ത്രയംബകേശ്വര്‍ ക്ഷേത്രവും പഞ്ചവടിയും സന്ദര്‍ശിക്കും

8. ഹംപി (കര്‍ണാടക): കിഷ്‌കിന്ധയിലെ പുരാതന നഗരം. ആഞ്ജനേയ കുന്ന് (ഹനുമാന്റെ ജന്മസ്ഥലം), വിറ്റല ക്ഷേത്രം, വിരൂപാക്ഷ ക്ഷേത്രം എന്നിവ യാത്രയില്‍ ഉള്‍പ്പെടുന്നു.

9. രാമേശ്വരം (തമിഴ്‌നാട്): രാമനാഥസ്വാമി ക്ഷേത്രം, രാമസേതുവിന് സമീപമുള്ള ധനുഷ്‌കോടി എന്നിവ സന്ദര്‍ശിച്ചാണ് യാത്ര അവസാനിക്കുന്നത്.

ഇന്ത്യയുടെ ആത്മീയ ടൂറിസത്തിന് ദേശീയ, വിദേശ തീര്‍ത്ഥാടകരില്‍ നിന്ന് വലിയ പ്രതികരണമാണ് ലഭിക്കുന്നതെന്ന് ഐആര്‍സിടിസി ഉദ്യോഗസ്ഥര്‍ പറയുന്നു. ടൂറിനുള്ള ബുക്കിംഗ് ഐആര്‍സിടിസി ടൂറിസം പോര്‍ട്ടലില്‍ നടത്താം.