ഇതെന്താ പാമ്പുകളുടെ സംസ്ഥാന സമ്മേളനമോ? പാമ്പുകൾ അട്ടിയട്ടിയായി കിടക്കുന്ന നാട് കാണാൻ പോകുന്നോ?

മനുഷ്യനെ ഞെട്ടിക്കുന്ന, വിസ്മയിപ്പിക്കുന്ന പല കാഴ്ചകളും ലോകത്ത് പ്രകൃതി ഒരുക്കിയിട്ടുണ്ട്. ആഫ്രിക്കയിൽ വന്യജീവികൾ കൂട്ടപ്പലായനം ചെയ്യുന്ന പ്രതിഭാസമുണ്ട്. മെക്സിക്കോയിലാകട്ടെ ലക്ഷക്കണക്കിന് പൂമ്പാറ്റകളുടെ വരവാണ് ഉളളത്.

എന്നാൽ ഇവയിൽ നിന്നെല്ലാം വ്യത്യസ്തമായി പതിനായിരക്കണക്കിന് പാമ്പുകൾ ഒരേസമയം ഒത്തുചേരുന്ന ഒരു സ്ഥലം ഭൂമിയിലുണ്ടെന്ന് പറഞ്ഞാൽ നിങ്ങൾ വിശ്വസിക്കുമോ? കാനഡയിലെ മാനിറ്റോബ പ്രവിശ്യയിലുള്ള നാർസിസ് സ്നേക്ക് ഡെൻസ് എന്ന സ്ഥലത്താണ് ലോകത്തെ ഞെട്ടിക്കുന്ന ഈ പ്രതിഭാസം നടക്കുന്നത്.

ഓരോ വർഷവും വസന്തകാലത്തിന്റെ തുടക്കത്തിൽ (ഏപ്രിൽ അവസാന വാരത്തിലും മേയ് ആദ്യ വാരത്തിലും) ഈ പ്രദേശം അക്ഷരാർത്ഥത്തിൽ പാമ്പുകളുടെ സംസ്ഥാന സമ്മേളന വേദിയായി മാറും. ഭൂമിക്കടിയിലെ ഗുഹകളിൽ നിന്ന് ഒരേസമയം പതിനായിരക്കണക്കിന് പാമ്പുകളാണ് പുറത്തേക്ക് വരുന്നത്. ലോകത്തിൽ ഇന്നുവരെ കണ്ടെത്തിയിട്ടുളളതിൽ വെച്ച് ഒരേ വംശത്തിൽപ്പെട്ട പാമ്പുകളുടെ ഏറ്റവും വലിയ ഒത്തുചേരലാണിത്. ഏകദേശം 70000 മുതൽ 100000 വരെ പാമ്പുകൾ ഈ സമയത്ത് ഇവിടെ ഒത്തുകൂടാറുണ്ട്.

എന്തുകൊണ്ടാണ് ഇത്രയധികം പാമ്പുകൾ ഇവിടെയെത്തുന്നത്? കാനഡയിലെ കഠിനമായ ശൈത്യകാലത്ത് താപനില മൈനസ് 30 ഡിഗ്രി സെൽഷ്യസിനും താഴേക്ക് പോകാറുണ്ട്. അത്രയും തണുപ്പിൽ പാമ്പുകൾക്ക് പുറത്തു ജീവിക്കാൻ കഴിയില്ല. എന്നാൽ നാർസിസ് പ്രദേശത്തിന്റെ ഭൂപ്രകൃതിക്ക് ഒരു പ്രത്യേകതയുണ്ട്. ഇവിടുത്തെ ചുണ്ണാമ്പുകല്ല് നിറഞ്ഞ പാറകൾക്കുള്ളിൽ വലിയ ഗുഹകളും വിള്ളലുകളുമുണ്ട്.

ഈ ഗുഹകൾ ഭൂമിയുടെ ഉപരിതലത്തിലെ മഞ്ഞുരുകുന്ന പരിധിക്ക് താഴെയായതിനാൽ പുറത്ത് എത്ര കഠിനമായ തണുപ്പാണെങ്കിലും ഗുഹയ്ക്കുള്ളിലെ താപനില പൂജ്യം ഡിഗ്രിക്ക് താഴേക്ക് പോകാറില്ല. അതിനാൽ കഠിനമായ തണുപ്പിൽ നിന്ന് രക്ഷപ്പെടാൻ റെഡ്-സൈഡഡ് ഗാർട്ടർ ഇനത്തിൽപ്പെട്ട പതിനായിരക്കണക്കിന് പാമ്പുകൾ ഈ ഗുഹകളെ തങ്ങളുടെ ഒളിത്താവളമാക്കുന്നു.

മേറ്റിംഗ് ബോൾ അഥവാ പാമ്പ് പന്ത്

വസന്തകാലം ആകുന്നതോടെ ഗുഹയ്ക്കുള്ളിൽ നിന്ന് പാമ്പുകൾ കൂട്ടത്തോടെ പുറത്തേക്ക് വരും. ഇവയുടെ ഈ ഒത്തുചേരലിന്റെ പ്രധാന ലക്ഷ്യം വംശവർദ്ധനവാണ്. ആദ്യം പുറത്തുവരുന്ന ആൺപാമ്പുകൾ പെൺപാമ്പുകളുടെ വരവിനായി ഗുഹയുടെ കവാടങ്ങളിൽ കാത്തിരിക്കും. വലിപ്പമേറിയ പെൺപാമ്പുകൾ പുറത്തേക്ക് വരുമ്പോൾ തന്നെ നൂറുകണക്കിന് ആൺപാമ്പുകൾ അവയെ വട്ടമിട്ടു പിടിക്കാൻ ശ്രമിക്കും. ഇത് കാണാൻ ഒരു വലിയ പാമ്പ് പന്ത് ഉരുണ്ടുകൂടിയത് പോലെ തോന്നും. ഈ അപൂർവ്വ പ്രജനന രീതിയാണ് നാർസിസിലെ ഏറ്റവും വലിയ ആകർഷണം.

കേൾക്കുമ്പോൾ ഭയം തോന്നുമെങ്കിലും ഇവിടുത്തെ കാഴ്ചകൾ ആസ്വദിക്കാൻ ഓരോ വർഷവും 35000ത്തിലധികം വിനോദസഞ്ചാരികളാണ് ഇവിടേക്ക് എത്തുന്നത്. ഇതിന് പ്രധാന കാരണം ഇവിടെയുള്ള ഗാർട്ടർ ഇനത്തിൽപ്പെട്ട പാമ്പുകൾക്ക് മനുഷ്യനെ കൊല്ലാനുളള വിഷമില്ല. അവ പൊതുവെ ശാന്തസ്വഭാവക്കാരാണ്.

മനുഷ്യരെ ആക്രമിക്കുന്നതിനേക്കാൾ സ്വന്തം ഇണയെ കണ്ടെത്തുന്നതിലാണ് ഈ സമയത്ത് അവയ്ക്ക് ശ്രദ്ധ. ചില ധൈര്യശാലികളായ സഞ്ചാരികൾ ഇവയെ കയ്യിലെടുത്ത് ചിത്രങ്ങൾ പകർത്താറുമുണ്ട്. സഞ്ചാരികൾക്ക് സുരക്ഷിതമായി പാമ്പുകളെ കാണാൻ മാനിറ്റോബ സർക്കാർ ഇവിടെ പ്രത്യേക വ്യൂവിംഗ് പ്ലാറ്റ്‌ഫോമുകളും നടപ്പാതകളും ഒരുക്കിയിട്ടുണ്ട്.
അടുത്ത അവധിക്കാലത്ത് നാർസിസിലെ പാമ്പുകളെ കാണാൻ പോകുന്നോ?