ഇനി ജമ്മുവിൽ നിന്നും നേരിട്ട് ശ്രീനഗറിലേക്ക് വന്ദേഭാരതിൽ പോകാം; നിർണായക തീരുമാനവുമായി റെയിൽവെ

ഇക്കഴിഞ്ഞ ജൂണിലായിരുന്നു കത്ര-ശ്രീനഗർ വന്ദേഭാരത് എക്സ്പ്രസ് ആരംഭിച്ചത്. തുടങ്ങിയത് മുതൽ വമ്പൻ സ്വീകാര്യതയാണ് സർവ്വീസിന് ലഭിച്ചത്. ടിക്കറ്റുകൾ ചൂടപ്പം പോലെയാണ് വിറ്റ് പോകുന്നതെന്നാണ് റെയിൽവെ അധികൃതർ പറഞ്ഞത്. ഇപ്പോഴിതാ ഈ ട്രെയിൻ ജമ്മുവിലേക്ക് കൂടി നീട്ടാനുള്ള തയ്യാറെടുപ്പിലാണ് റെയിൽവേ. ഉടൻ തന്നെ ഇക്കാര്യത്തിൽ തീരുമാനം കൈക്കൊള്ളുമെന്ന് ഡിവിഷണൽ റെയിൽവേ മാനേജർ വിവേക് കുമാർ മാധ്യമപ്രവർത്തകരോട് പറഞ്ഞു.

സർവ്വീസ് വിപുലീകരിക്കാനുള്ള നടപടികൾ പുരോഗമിക്കുകയാണ്.തുടർച്ചയായ മഴയിലും വെള്ളപ്പൊക്കത്തിലും റെയിൽവേ ട്രാക്കുകൾക്ക് വ്യാപകമായ നാശനഷ്ടം സംഭവിച്ചതിനാലാണ് വന്ദേ ഭാരത് വഴി ജമ്മുവിനെ ശ്രീനഗറുമായി നേരിട്ട് ബന്ധിപ്പിക്കാനുള്ള പദ്ധതി വൈകിയതെന്നും വിവേക് കുമാർ കൂട്ടിച്ചേർത്തു. പുനരുദ്ധാരണ പ്രവർത്തനങ്ങൾ അതിവേഗം പുരോഗമിക്കുകയാണ്. സുരക്ഷാ അനുമതി ലഭിച്ചാലുടൻ സർവീസ് ആരംഭിക്കുമെന്ന് അദ്ദേഹം വിശദീകരിച്ചു.

ജമ്മുവിലേക്കുള്ള ഈ സർവീസ് തീർത്ഥാടകർക്കും വിനോദസഞ്ചാരികൾക്കും വിദ്യാർത്ഥികൾക്കും വ്യാപാരികൾക്കും സാധാരണക്കാർക്കും ഏറെ പ്രയോജനകരമാകും.
കൂടാതെ നിലവിലുള്ള റെയിൽ, റോഡ് സർവീസുകളെ അപേക്ഷിച്ച് യാത്രാ സൗകര്യവും സമയവും മെച്ചപ്പെടും. പുതിയ സർവ്വീസ് ദിവസേന ഉണ്ടായേക്കുമെന്നാണ് സൂചന.

ഇന്ത്യയിലെ ആദ്യത്തെ സെമി-ഹൈ-സ്പീഡ് ട്രെയിനായ എസ്എംവിഡി കത്ര-ശ്രീനഗർ വന്ദേ ഭാരത് എക്സ്പ്രസ് ജൂൺ 7 നായിരുന്നു പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തത്. ഏകദേശം 189 കിലോമീറ്റർ ദൂരം വരുന്ന ഉധംപൂർ-ശ്രീനഗർ-ബാരമുള്ള റെയിൽ ലിങ്കിലൂടെയാണ് ട്രെയിൻ സർവീസ് നടത്തുന്നത്. ചിനാബ് പാലം പോലുള്ള അത്യാധുനിക നിർമ്മിതികളിലൂടെ കടന്നുപോകുന്ന ഈ റൂട്ടിൽ ഹിമാലയൻ കാഴ്ചകൾ ആസ്വദിക്കാനാകും.ചൊവ്വാഴ്ച ഒഴികെ ആഴ്ചയിൽ ആറ് ദിവസവും സർവീസ് നടത്തുന്ന ഇതിന്റെ ശരാശരി വേഗത മണിക്കൂറിൽ 63 കിലോമീറ്ററാണ്. യാത്രയ്ക്ക് ഏകദേശം 2 മണിക്കൂർ 58 മിനിറ്റ് സമയം മതി.

ചൊവ്വാഴ്ച ഒഴികെ ആഴ്ചയിൽ ആറ് ദിവസവും സർവീസ് നടത്തുന്ന ഇതിന്റെ ശരാശരി വേഗത മണിക്കൂറിൽ 63 കിലോമീറ്ററാണ്. യാത്രയ്ക്ക് ഏകദേശം 2 മണിക്കൂർ 58 മിനിറ്റ് സമയം എടുക്കുന്നു.

കത്രയിൽ നിന്ന് (SVDK) രാവിലെ 8:10-ന് പുറപ്പെടുന്ന 26401 നമ്പർ ട്രെയിൻ രാവിലെ 9:04-ന് ബനിഹാലിൽ എത്തിച്ചേരും. ഇവിടെ 2 മിനിറ്റ് നിർത്തിയ ശേഷം 9:06-ന് പുറപ്പെട്ട് രാവിലെ 11:08-ന് ശ്രീനഗറിൽ എത്തും. തിരികെ, 26402 നമ്പർ ട്രെയിൻ ശ്രീനഗറിൽ നിന്ന് ഉച്ചയ്ക്ക് 2:00-ന് പുറപ്പെട്ട് 3:04-ന് ബനിഹാലിൽ എത്തുകയും 3:06-ന് അവിടെ നിന്ന് പുറപ്പെട്ട് വൈകുന്നേരം 4:58-ന് കത്രയിൽ തിരിച്ചെത്തുകയും ചെയ്യുന്നു.

എട്ട് കോച്ചുകളുള്ള ഈ ട്രെയിനിൽ, ഓരോ എസി ചെയർ കാർ കോച്ചിലും ഏകദേശം 78 സീറ്റുകളാണുള്ളത്. എക്സിക്യൂട്ടീവ് ക്ലാസ് കോച്ചിൽ 56 സീറ്റുകളുണ്ട്. എക്സിക്യൂട്ടീവ് ക്ലാസ്സിൽ കൂടുതൽ ലെഗ്‌റൂമും, മുൻഗണനാ പ്രവേശനവും ലഭിക്കും.

2025 സെപ്റ്റംബറിലെ നിരക്കനുസരിച്ച്, എസി ചെയർ കാറിന് 660 രൂപയും എക്സിക്യൂട്ടീവ് ക്ലാസിന് 1,270 രൂപയുമാണ്. ജിഎസ്ടി ഉൾപ്പെടെയുള്ള ഈ നിരക്കുകളിൽ ഭക്ഷണം ഓപ്ഷണലാണ്. അമർനാഥ് യാത്ര പോലുള്ള തിരക്കുള്ള സമയങ്ങളിൽ നിരക്കിൽ 10-20% വർദ്ധനവ് ഉണ്ടാകാം. മുതിർന്ന പൗരന്മാർക്കും കുട്ടികൾക്കും വിദ്യാർത്ഥികൾക്കും ഐആർസിടിസി നിയമങ്ങൾ അനുസരിച്ചുള്ള ഇളവുകൾ ലഭ്യമാണ്. 120 ദിവസം മുമ്പ് വരെ ഐആർസിടിസി വെബ്സൈറ്റ് വഴിയോ ആപ്പ് വഴിയോ ടിക്കറ്റുകൾ ബുക്ക് ചെയ്യാം. ഈ സേവനം യാത്രാ സമയം കുറച്ചതിലൂടെ തീർത്ഥാടനത്തിനും വിനോദസഞ്ചാരത്തിനും വലിയ ഉത്തേജനം നൽകിയിട്ടുണ്ട്.