ഈ ചൂടിന് പോകാൻ പറ്റിയ കേരളത്തിലെ 5 സ്ഥലങ്ങൾ; ത്രില്ലടിപ്പിക്കും ഈ യാത്രകൾ

Updated: Wednesday, April 8, 2026, 19:40 [IST]

സംസ്ഥാനത്ത് മിക്കയിടത്തും താപനില 33 ഡിഗി സെൽഷ്യസിന് മുകളിലാണ്. ഈ കൊടും ചൂടിൽ എവിടേക്ക് യാത്ര പോകാനാണ് എന്നാണോ ചോദ്യം? എന്നാൽ കേരളത്തിൽ ചൂട് അസഹനീയമാകാത്ത, ഏത് നേരവും ആസ്വദിക്കാൻ കഴിയുന്ന ചില മനോഹര സ്ഥലങ്ങളുണ്ട്. ഈ സീസണിൽ ഏറ്റവും അനുയോജ്യമായ അഞ്ച് സ്ഥലങ്ങളെ കുറിച്ച് അറിയാം:

മൂന്നാർ: കുന്നുകളുടെ റാണി, വേനൽക്കാലത്ത് ഏറ്റവും കുളിർമ നൽകുന്ന സ്ഥലം ഏതെന്ന് ചോദിച്ചാൽ മൂന്നാർ എന്ന് തന്നെയാണ് ഉത്തരം. പച്ചവിരിച്ച തേയിലത്തോട്ടങ്ങളിഷ ഇപ്പോഴും രാവിലെ മൂടൽ മഞ്ഞ് കാണാം. ട്രെക്കിങ് സ്പോട്ടുകളാണെങ്കിലും അതിരാവിലെ കയറി ആസ്വദിച്ച് മടങ്ങാം. വെള്ളച്ചാട്ടങ്ങൾക്ക് രൌദ്രഭാവം കുറവാണെങ്കിലും മറ്റിടങ്ങളിലെ പോലെ തീരെ നേർത്ത കാഴ്ചയല്ല. ജെക്കരാന്ത കാണാനും ഇപ്പോൾ പോയാൽ അവസരമുണ്ട്.

വയനാട്: വനങ്ങളും, വെള്ളച്ചാട്ടങ്ങളും, മൂടൽമഞ്ഞുള്ള മലയോരങ്ങളുമെല്ലാം വയനാടിന്റെ പ്രത്യേകതയാണ്. സാഹസികതയോടൊപ്പം പ്രകൃതിയുടെ സൗന്ദര്യവും ആഗ്രഹിക്കുന്നവർക്ക് ഈ വടക്കൻ കേരളത്തിലെ മലയോര ജില്ല മികച്ചൊരു തിരഞ്ഞെടുപ്പാണ് എന്ന കാര്യത്തിൽ തർക്കമില്ല. മൂന്നാറിനെക്കാൾ തിരക്ക് കുറഞ്ഞതിനാൽ വേനൽക്കാലത്ത് ശാന്തമായ യാത്രകൾക്ക് വയനാട് അനുയോജ്യമാണ്. കോഴിക്കോട്ടുനിന്ന് 2-3 മണിക്കൂർ മാത്രം ദൂരമേയുള്ളൂ. വയനാട് വന്യജീവി സങ്കേതം പ്രധാന ആകർഷണമാണ്; ആനകൾ, മാനുകൾ, പലപ്പോഴും പുലികൾ എന്നിവയെ ജീപ്പ് സഫാരിയിലൂടെ കാണാൻ സാധിക്കും. പുരാതന ശിലാലിഖിതങ്ങളുള്ള എടക്കൽ ഗുഹകൾ. സൂചിപ്പാറ, മീൻമുട്ടി വെള്ളച്ചാട്ടങ്ങൾ, ചെമ്പ്ര പീക്ക് ട്രെക്കിംഗ് (4-5 മണിക്കൂർ), പൂക്കോട് തടാകത്തിലെ ബോട്ടിംഗും പിക്നിക്കുകളും, സുഗന്ധവ്യഞ്ജന തോട്ടങ്ങളിലേക്കുള്ള യാത്രകൾ എന്നിവയെല്ലാം വയനാടിന്റെ പ്രധാന ആകർഷണങ്ങളാണ്.

തേക്കടി (പെരിയാർ): വന്യജീവി സഫാരികളാലും തടാകതീരത്തെ ശാന്തതയാലും വേനൽക്കാലത്ത് മികച്ചൊരു തിരഞ്ഞെടുപ്പാണിത്. പെരിയാർ വന്യജീവി സങ്കേതത്തിന്റെ ആസ്ഥാനമായ തേക്കടിയിൽ തടാകത്തിലെ ഇളംകാറ്റും തണൽവൃക്ഷങ്ങളും കാലാവസ്ഥയെ സുഖകരമാക്കുന്നു. പെരിയാർ തടാകത്തിലെ ബോട്ട് സഫാരി പ്രധാന ആകർഷണമാണ്; ആനക്കൂട്ടങ്ങൾ, മാനുകൾ, പക്ഷികൾ എന്നിവയെ കാണാം. ഗൈഡിനോടൊപ്പം ബാംബൂ റാഫ്റ്റിംഗ്, നേച്ചർ വാക്കുകൾ, ടൈഗർ ട്രെയിലുകൾ എന്നിവയും തേക്കടിയിലുണ്ട്. കുമളിയിലെ സുഗന്ധവ്യഞ്ജന തോട്ടങ്ങളിൽ ഏലം, വാനില, കാപ്പിക്കുരു എന്നിവ രുചിച്ചറിയാം. സായാഹ്നങ്ങളിൽ സാംസ്കാരിക പരിപാടികളോ തടാകക്കരയിൽ സൂര്യാസ്തമയം ആസ്വദിച്ചോ സമയം ചെലവഴിക്കാം.

ആലപ്പുഴ: കായൽ സൗന്ദര്യവും ഗ്രാമീണാനുഭവങ്ങളും നൽകുന്ന ആലപ്പുഴയിലെ യാത്രകൾ വേനൽ ചൂടിൽനിന്ന് ആശ്വാസം പകരുന്നു. തെങ്ങിൻതോപ്പുകളാൽ ചുറ്റപ്പെട്ട കനാലുകളിലൂടെയുള്ള ഹൗസ് ബോട്ടിലെ യാത്രകൾ ആസ്വദിക്കാം. 'കിഴക്കിന്റെ വെനീസ്' എന്നറിയപ്പെടുന്ന ഇവിടം ശാന്തമായ ഗ്രാമീണ ജീവിതക്കാഴ്ചകളാൽ സമ്പന്നമാണ്.എയർ കണ്ടീഷനിംഗ് സൗകര്യങ്ങളുള്ള പരമ്പരാഗത കെട്ടുവള്ളങ്ങളിലെ മൾട്ടി-ഡേ ഹൗസ് ബോട്ട് ക്രൂയിസ് മികച്ച അനുഭവമായിരിക്കും. കേരളീയ വിഭവങ്ങൾ, ഗ്രാമീണ നടത്തം, കയർ നിർമ്മാണ പ്രദർശനങ്ങൾ എന്നിവ ഇതിൽ ഉൾപ്പെടുന്നു.

വർക്കല: കടൽത്തീരത്തെ മനോഹര കാഴ്ചകൾ ആസ്വദിക്കാൻ ഇവിടേക്ക് വരാം. അറബിക്കടലിന് അഭിമുഖമായുള്ള പാറക്കെട്ടുകൾ കടൽക്കാറ്റിൽ പ്രഭാതങ്ങളിലും സായാഹ്നങ്ങളിലും ചൂടിനെ നിയന്ത്രിക്കുന്നു. ഇത് ആസ്വാദ്യകരമായ അനുഭവം നൽകും. Cliff-top കഫേകളിൽ കടൽവിഭവങ്ങൾ ആസ്വദിക്കാം. യോഗ സെഷനുകൾ, പാരാസെയിലിംഗ്, കയാക്കിംഗ്, പാരാഗ്ലൈഡിംഗ് തുടങ്ങിയ ജലസാഹസിക വിനോദങ്ങൾ ഇവിടെ ലഭ്യമാണ്.