ഫെബ്രുവരിയില്‍ ഡല്‍ഹിയില്‍ പോകാന്‍ പ്ലാനുണ്ടോ? രാഷ്ട്രപതി ഭവനും ഈ ഉദ്യാനവും കാണാം

ഫെബ്രുവരിയില്‍ രാജ്യതലസ്ഥാനത്തേക്കു പോകാന്‍ പ്ലാനിടുന്നുണ്ടോ? എന്നാല്‍ മറക്കാതെ കാണേണ്ട ഒരിടമുണ്ട്. ന്യൂഡല്‍ഹിയിലെ രാഷ്ട്രപതി ഭവന്റെ മടിത്തട്ടിലുള്ള അമൃത് ഉദ്യാനം. അതിമനോഹരമായ ചെടികളും അഴകേറും നിറഞ്ഞ ഉദ്യാനം സന്ദര്‍ശകരെ വരവേല്‍ക്കാനുള്ള തയാറെടുപ്പിലാണ്.

രാഷ്ട്രപതി ഭവനിലുള്ള വിശ്വപ്രസിദ്ധമായ അമൃത് ഉദ്യാനം ഈ സന്ദര്‍ശനത്തിനായി ഉടന്‍ പൊതുജനങ്ങള്‍ക്ക് തുറന്നുകൊടുക്കും. വിവിധയിനം റോസാപ്പൂക്കളും അപൂര്‍വ്വങ്ങളായ സസ്യജാലങ്ങളും നിറഞ്ഞ ഈ ഉദ്യാനം കാണാന്‍ ഫെബ്രുവരി മുതല്‍ മാര്‍ച്ച് വരെയുള്ള കാലയളവിലാണ് അവസരം ലഭിക്കുന്നത്. സന്ദര്‍ശകര്‍ക്ക് പ്രവേശനം തികച്ചും സൗജന്യമാണ്. എന്നാല്‍ തിരക്ക് നിയന്ത്രിക്കുന്നതിനായി മുന്‍കൂട്ടി ടിക്കറ്റുകള്‍ ബുക്ക് ചെയ്യേണ്ടതുണ്ട്.

സന്ദര്‍ശകര്‍ക്ക് രാഷ്ട്രപതി ഭവന്റെ ഔദ്യോഗിക വെബ്‌സൈറ്റ് വഴി ഓണ്‍ലൈനായി ടിക്കറ്റുകള്‍ ബുക്ക് ചെയ്യാവുന്നതാണ്. കൂടാതെ ഉദ്യാനത്തിലെ ഗേറ്റുകളില്‍ നിന്ന് നേരിട്ടും ടിക്കറ്റുകള്‍ ലഭിക്കുന്നതിനുള്ള സൗകര്യം ഉണ്ടായിരിക്കും. രാവിലെ പത്തു മണി മുതല്‍ വൈകുന്നേരം അഞ്ചു മണി വരെയാണ് സന്ദര്‍ശന സമയം അനുവദിച്ചിരിക്കുന്നത്. നോര്‍ത്ത് അവന്യൂവിന് സമീപമുള്ള 35-ാം നമ്പര്‍ ഗേറ്റിലൂടെയാണ് സന്ദര്‍ശകര്‍ അകത്തേക്ക് പ്രവേശിക്കേണ്ടത്.

തിങ്കളാഴ്ചകളില്‍ അറ്റകുറ്റപ്പണികള്‍ക്കും ശുചീകരണത്തിനുമായി ഉദ്യാനത്തിന് അവധിയായിരിക്കും. സന്ദര്‍ശകര്‍ക്ക് മൊബൈല്‍ ഫോണുകള്‍ കൈവശം വെക്കാമെങ്കിലും ഭക്ഷണപദാര്‍ത്ഥങ്ങള്‍, ക്യാമറകള്‍, വലിയ ബാഗുകള്‍ എന്നിവ അകത്തേക്ക് കൊണ്ടുപോകാന്‍ അനുവാദമില്ല. ഭിന്നശേഷിക്കാര്‍ക്കും മുതിര്‍ന്ന പൗരന്മാര്‍ക്കും പ്രത്യേക ദിവസങ്ങളില്‍ മുന്‍ഗണന ലഭിക്കുമെന്നും അധികൃതര്‍ അറിയിച്ചു. ഫെബ്രുവരിയുടെ തണുപ്പും മാര്‍ച്ചിലെ ഇളം വെയിലും ചേരുമ്പോള്‍ മനോഹരമായ അനുഭവമാണ് ഈ ഉദ്യാനത്തിലെ കാഴ്ച്ചകള്‍ സന്ദര്‍ശകര്‍ക്കു പകര്‍ന്നു നല്‍കുന്നത്.