വന്ദേഭാരതിൽ ബെംഗളൂരുവിലെത്താം, വെറും 7 മണിക്കൂർ മതി, പാത അന്തിമഘട്ടത്തിലേക്ക്; മലയാളികൾക്കും ലോട്ടറി

വളരെ വേഗത്തിൽ സുഖകരമായ യാത്രയൊരുക്കുന്ന വന്ദേഭാരത് എക്സപ്രസുകൾക്ക് രാജ്യത്ത് ഡിമാന്‌റ് കൂടുകയാണ്. ഇതിനോടകം തന്നെ 70 ഓളം റൂട്ടുകളിൽ വന്ദേഭാരത് സർവ്വീസ് നടത്തുന്നുണ്ട്. ഇപ്പോഴിതാ മറ്റൊരു റൂട്ടിനെ കുറിച്ചുള്ള ഏറ്റവും പുതിയ അപ്ഡേറ്റാണ് പുറത്തുവരുന്നത്. ബെംഗളൂരു-മംഗളൂരു വന്ദേഭാരത് യാഥാർഥ്യമാക്കാനുള്ള നടപടികൾ പുരോഗമിക്കുകയാണെന്നാണ് റിപ്പോർട്ട്. ഈ റൂട്ട് യാഥാർത്ഥ്യമാകുന്നതോടെ പ്രധാന നഗരങ്ങളിലേക്കുള്ള യാത്രാസമയം ഗണ്യമായി കുറയും.

നിലവിൽ ബെംഗളൂരു-ധാർവാഡ്, മംഗളൂരു-മഡ്ഗാവ്, ഹുബ്ബള്ളി-പൂനെ, ബെംഗളൂരു-കലബുറഗി, മൈസൂരു-ചെന്നൈ, ബെംഗളൂരു-ഹൈദരാബാദ്, മംഗളൂരു-തിരുവനന്തപുരം, മൈസൂരു-ചെന്നൈ , ബെംഗളൂരു-കോയമ്പത്തൂർ, ബെംഗളൂരു-മധുരൈ എന്നീ റൂട്ടുകളിലാണ് കർണാടകയിൽ നിന്നും വന്ദേഭാരത് എക്സ്പ്രസ്സ് സർവീസ് നടത്തുന്നത്. ഇതിനുപുറമെയാണ് ബെംഗളൂരു-മംഗളൂരു റൂട്ട് ആരംഭിക്കാൻ റെയിൽവെ ഒരുങ്ങുന്നത്.

ബെംഗളൂരു-മംഗളൂരു പാത വൈദ്യുതീകരണം പുരോഗമിക്കുന്നു

ഈ റൂട്ടിൽ വന്ദേ ഭാരത് ട്രെയിനിന് ആവശ്യമായ വൈദ്യുതീകരണ നടപടികൾ 22 കിമി പൂർത്തിയാക്കിയതായി മന്ത്രി സോമണ്ണ അറിയിച്ചിരുന്നു. ശേഷിക്കുന്ന 33 കിമി പാതയുടെ പ്രവർത്തനങ്ങൾ പുരോഗമിക്കുകയാണ്. ബെംഗളൂരു-മംഗളൂരു വന്ദേഭാരത് എത്തുന്നതോടെ ബെംഗളൂരു, തുംകുരു, ഹാസൻ, മംഗളൂരു എന്നീ നാല് ജില്ലകളിലെ യാത്രക്കാർക്ക് അത് വലിയ ആശ്വാസമാകും.

ഹസൻ-മംഗളൂരു പാതയിൽ 57 തുരങ്കങ്ങളും 700 പാലങ്ങളുമാണ് ഉള്ളത്. ഈ പാത ഇരട്ടിപ്പിക്കുന്നത് സംബന്ധിച്ചുള്ള സർവ്വേ നേരത്തേ നടത്തിയിരുന്നു. ഏകദേശം 50,000 കോടിയാണ് ഈ പ്രൊജക്ട് പൂർത്തീകരിക്കാൻ ആവശ്യം. വിശദമായ ഡി പി ആർ ഉടൻ തയ്യാറാക്കുമെന്നും ഉടൻ തന്നെ ടെന്ററുകൾ ക്ഷണിക്കുമെന്നും മന്ത്രി സോമണ്ണ അറിയിച്ചു.

ബെളൂർ-ഹാസ്സൻ പാതയിൽ ഭൂമി ഏറ്റെടുക്കുന്നത് ജുലൈ 20 ഓടെ പൂർത്തീകരിക്കാൻ അധികൃതർക്ക് നിർദേശം നൽകിയിട്ടുണ്ട്. അതോടൊപ്പം തന്നെ കടൂർ-ചിക്കമംഗളൂരു-ബെളൂർ പാതയിൽ 68 കിലോമീറ്ററിലെ പ്രവൃത്തികളും പുരോഗമിക്കുന്നുണ്ട്.

മലയാളികൾക്കും ഗുണം

മെഗംളൂരു-ബെംഗളൂരു സർവ്വീസ് യാഥാർത്ഥ്യമായാൽ ഉത്തരകേരളത്തിലെ പ്രത്യേകിച്ച് കണ്ണൂർ, കാസർഗോഡ് മേഖലയിലെ ഒട്ടനവധി മലയാളികൾക്ക്, പ്രത്യേകിച്ച് ഐടി മേഖലയിലുള്ളവർക്ക്, മംഗലാപുരത്തേക്കും തിരിച്ചും യാത്ര ചെയ്യാൻ ഈ ട്രെയിൻ സൗകര്യപ്രദമാകും. വാരാന്ത്യ യാത്രകൾക്കും ഈ സർവ്വീസിനെ കൂടുതലായി ആശ്രയിക്കാനാകും. നിലവിൽ ഈ റൂട്ടിൽ മറ്റ് ട്രെയിനുകൾക്ക് ആവശ്യമായി വരുന്ന യാത്രാസമയം 9 മണിക്കൂറാണ്. എന്നാൽ വന്ദേഭാരതിൽ 7 മണിക്കൂർ കൊണ്ട് സുഖമായി പോയി വരാൻ സാധിക്കും. മംഗലാപുരവും ബെംഗളൂരുവും തമ്മിലുള്ള വേഗതയേറിയ റൂട്ട് വ്യാപാരികൾക്കും ചെറുകിട ബിസിനസുകാർക്കും പ്രയോജനപ്പെടും. മലയാളി വ്യവസായികൾക്ക് ഈ റൂട്ട് കൂടുതൽ ലാഭകരമാകും.

ഓണസമ്മാനമായി വന്ദേഭാരത് സ്ലീപ്പർ എത്തും?

വന്ദേഭാരത് സ്ലീപ്പർ സർവ്വീസുകൾ അവതരിപ്പിക്കാനുള്ളഒരുക്കത്തിലാണ് റെയിൽവെ. 10 സ്ലീപ്പറുകളായിരിക്കും ആദ്യ ഘട്ടത്തിൽ അവതരിപ്പിക്കുക. ഇതിൽ ഒന്ന് കേരളത്തിനായിരിക്കും എന്നാണ് റിപ്പോർട്ട്. അങ്ങനെയെങ്കിൽ കേരളത്തിന് ഓണസമ്മാനമായി തിരുവന്തപുരം-ബെംഗളൂരു വന്ദേഭാരത് സ്ലീപ്പർ എത്തുമോയെന്നാണ് യാത്രക്കാർ ഉറ്റുനോക്കുന്നത്. വെറും 12 മണിക്കൂർ കൊണ്ട് ബെംഗളൂരിവിൽ എത്താൻ കഴിയുമെന്നതിനാൽ ഈ സർവ്വീസ് ഗെയിം ചെയ്ഞ്ചർ ആകുമെന്നാണ് വിലയിരുത്തപ്പെടുന്നത്.

നിലവിൽ ഈ റൂട്ടിൽ ഓടുന്ന പ്രതിദിന ട്രെയിനുകൾ കുറഞ്ഞത് 15 മണിക്കൂർ വരെയാണ് ലക്ഷ്യസ്ഥാനത്ത് എത്താൻ എടുക്കുന്നത്. പുതിയ സർവ്വീസ് എത്തിയാൽ വളരെ വേഗത്തിൽ സുഖകരമായ രാത്രിയാത്ര എന്ന മലയാളികളുടെ ഏറെകാലമായുള്ള ആവശ്യത്തിനായിരിക്കും പരിഹാരം കാണുക. കുറഞ്ഞ സ്റ്റോപ്പുകൾ മാത്രമായിരിക്കും ഇവയ്ക്കുണ്ടാകുക.

അതേസമയം തിരുവനന്തപുരം-ബെംഗളൂരു റൂട്ട് കൂടാതെ തിരുവനന്തപുരം-മംഗളൂരു സ്ലീപ്പറും എത്തിയേക്കുമെന്ന് റിപ്പോർട്ടുണ്ട്. എന്നാൽ ഇത് ആദ്യ ഘട്ടത്തിൽ ഉണ്ടാകാൻ സാധ്യതയില്ല. എട്ടര മണിക്കൂർ കൊണ്ട് തിരുവനന്തപുരത്ത് നിന്ന് മംഗളൂരുവിൽ എത്താൻ സഹായിക്കുന്ന തരത്തിലായിരിക്കും ഈ സർവീസ്.