വന്ദേഭാരത് എന്നാ സുമ്മാവാ...കുളിക്കാൻ ചൂടുവെള്ളവും വരും..പുതിയ സംവിധാനം ഒരുക്കാൻ റെയിൽവെ

ലോകത്തിലെ ഏറ്റവും വലിയ യാത്രാ ശൃംഖലകളിലൊന്നായ ഇന്ത്യൻ റെയിൽവേയിൽ ദിവസവും ദശലക്ഷക്കണക്കിന് ആളുകളാണ് യാത്ര ചെയ്യുന്നത്. ദീർഘദൂര ട്രെയിനുകളിൽ, പ്രത്യേകിച്ച് സ്ലീപ്പർ കോച്ചുകളിൽ മതിയായ കുളിക്കാനുള്ള സൗകര്യങ്ങൾ മിക്കപ്പോഴും ലഭിക്കാറില്ല. യാത്രക്കാർക്ക് പരിമിതമായ തണുത്ത വെള്ളം മാത്രമുള്ള ഇടുങ്ങിയതും വൃത്തിഹീനവുമായ ശുചിമുറികളെ ആശ്രയിക്കേണ്ടി വരുന്ന സാഹചര്യം പതിവാണ്. ഒന്നിലധികം ദിവസം നീണ്ടുനിൽക്കുന്ന യാത്രകളിൽ ഇത് വലിയ വെല്ലുവിളിയുയർത്താറുണ്ട്. പ്രത്യേകിച്ച് മുതിർന്ന പൗരൻമാർക്കും കുട്ടികൾക്കും.

ഈ ദീർഘകാല പ്രശ്നങ്ങൾക്ക് പരിഹാരമെന്ന നിലയിൽ ഇപ്പോഴിതാ ട്രെയിനുകളിൽ ചൂടുവെള്ള സൗകര്യം ഏർപ്പെടുത്താനുള്ള തീരുമാനം കൈക്കൊണ്ടേക്കുകയാണ് റെയിൽവെ. വരാനിരിക്കുന്ന വന്ദേ ഭാരത് സ്ലീപ്പർ ട്രെയിനിലാണ് ഈ സൗകര്യം ഉണ്ടാകുക. ഫസ്റ്റ് എ.സി. യാത്രക്കാർക്ക് ഈ സേവനം പൂർണ്ണമായും സൗജന്യമായി ലഭിക്കും. ടിക്കറ്റ് നിരക്കിൽ ഈ സേവനം ഉൾപ്പെടുത്തിയിട്ടുണ്ട്. ഓട്ടോമാറ്റിക് ഡോറുകൾ, അത്യാധുനിക സുരക്ഷാ സംവിധാനങ്ങൾ, ആധുനിക ഇന്റീരിയറുകൾ എന്നിവയുൾപ്പെടെ വന്ദേ ഭാരത് ട്രെയിനുകളിലെ സൗകര്യങ്ങളുടെ പട്ടികയിലേക്ക് പുതിയൊരു കൂട്ടിച്ചേർക്കൽ കൂടിയാകുമിത്. നിലവിൽ, രാജധാനി, ദുരന്തോ തുടങ്ങിയ തിരഞ്ഞെടുക്കപ്പെട്ട പ്രീമിയം ട്രെയിനുകളിലെ ഫസ്റ്റ് എ.സി. കോച്ചുകളിൽ മാത്രമാണ് ചൂടുവെള്ളം ലഭ്യമാക്കിയിരുന്നത്.

വന്ദേഭാരത് സ്ലീപ്പർ എന്ന് എത്തും?

ഇന്ത്യയുടെ തദ്ദേശീയമായി രൂപകൽപ്പന ചെയ്ത ആദ്യ സെമി-ഹൈ-സ്പീഡ് ഓവർനൈറ്റ് ട്രെയിനായ വന്ദേ ഭാരത് സ്ലീപ്പർ, സുരക്ഷാ പരിശോധനകളുടെ അവസാന ഘട്ടത്തിലാണെന്നാണ് അനൗദ്യോഗിക റിപ്പോർട്ടുകൾ. പരീക്ഷണങ്ങൾക്കിടെ കണ്ടെത്തിയ ചെറിയ ഡിസൈൻ, സുരക്ഷാ പ്രശ്നങ്ങൾ പരിഹരിച്ച ശേഷം 2026-ഓടെ വാണിജ്യപരമായ സർവീസുകൾ ആരംഭിച്ചേക്കുമെന്നാണ് സൂചന.

കവച്ച് 4.0 ആന്റി-കൊളിഷൻ സംവിധാനം ഉൾപ്പെടെയുള്ള നൂതന സുരക്ഷാ ഫീച്ചറുകൾ ഈ ട്രെയിനിൻ്റെ പ്രത്യേകതയാണ്. യാത്രക്കാരുടെ സൗകര്യങ്ങൾക്കായി വിശാലമായ കുഷ്യൻ ബെർത്തുകൾ, ലേഡറുകൾ, റീഡിംഗ് ലൈറ്റുകൾ, യുഎസ്ബി ചാർജിംഗ് പോയിന്റുകൾ എന്നിവ ഒരുക്കിയിട്ടുണ്ട്. സെൻസർ അധിഷ്ഠിത ലൈറ്റിംഗ്, ശബ്ദം കടക്കാത്ത ഇൻ്റീരിയറുകൾ, ഓരോ കോച്ചിലും മൂന്ന് വിശ്രമമുറികൾ (ഒന്ന് ഭിന്നശേഷിക്കാർക്ക് സൗകര്യപ്രദവും ദുർഗന്ധം നിയന്ത്രിക്കാനുള്ള സംവിധാനമുള്ളതും)എന്നിവയും ലഭ്യമാകും.

2024 സെപ്റ്റംബറിൽ ബാംഗ്ലൂരിലെ BEML-ൽ നിന്നാണ് വന്ദേ ഭാരത് സ്ലീപ്പറിൻ്റെ പ്രോട്ടോടൈപ്പ് പുറത്തിറക്കിയത്. 200 ട്രെയിൻ സെറ്റുകൾക്ക് ഓർഡർ നൽകിയിട്ടുണ്ട്. ഇതിൽ 120 എണ്ണം RVNL-TMH-ഉം 80 എണ്ണം BHEL-Titagarh-ഉം ചേർന്നാണ് നിർമ്മിക്കുന്നത്. ഒരു ട്രെയിൻ സെറ്റിന് ഏകദേശം 120 കോടി രൂപയാണ് ചെലവ്.

പൂർണ്ണ തോതിലുള്ള ഉത്പാദനം 2025 ജൂണിൽ ആരംഭിക്കാനായിരുന്നു പദ്ധതി, എന്നാൽ ഇത് വൈകുകയായിരുന്നു. ആദ്യത്തെ രണ്ട് റേക്കുകൾ 2025 ഒക്ടോബറോടെ തയ്യാറായിരുന്നുവെങ്കിലും, ബെർത്തുകളിലെ മൂർച്ചയേറിയ ഭാഗങ്ങൾ, അഗ്നിസുരക്ഷയിലെ പോരായ്മകൾ, കവച്ച് സംവിധാനത്തിൻ്റെ പൂർണ്ണമല്ലാത്ത സംയോജനം, അടിയന്തര സാഹചര്യങ്ങളിലെ അൺകപ്ലിംഗ് പ്രോട്ടോക്കോളുകൾ എന്നിവയെല്ലാം ആർഡിഎസ്ഒ ചൂണ്ടിക്കാട്ടി.

ഈ പ്രശ്നങ്ങൾ കാരണം 2025 ഡിസംബറിൽ ലക്ഷ്യമിട്ടിരുന്ന ലോഞ്ച് വൈകി. ജോധ്പൂരിൽ ഇതിനായി ഒരു പ്രത്യേക മെയിൻ്റനൻസ് ഡിപ്പോയുടെ നിർമ്മാണം പുരോഗമിക്കുകയാണ്, ഇത് 2026 ജൂണോടെ പൂർത്തിയാകുമെന്നാണ് പ്രതീക്ഷിക്കുന്നത്. മുംബൈ-അഹമ്മദാബാദ്, ഡൽഹി-ഹൗറ തുടങ്ങിയ ഉയർന്ന ഡിമാൻഡുള്ള റൂട്ടുകളിലായിരിക്കും ആദ്യഘട്ടത്തിൽ സർവീസ് നടത്തുക. അന്തിമ അനുമതി ലഭിച്ചതിന് ശേഷം റൂട്ടുകൾ സംബന്ധിച്ച ഔദ്യോഗിക പ്രഖ്യാപനം ഉണ്ടാകും.