വന്ദേഭാരത്, രാജധാനി ഉൾപ്പെടെ നിരവധി ട്രെയിനുകൾക്ക് പുതിയ സമയം; മാറ്റം ഇന്ന് മുതൽ

കേരളത്തിൽ നിന്ന് സർവീസ് നടത്തുന്ന നിരവധി ട്രെയിനുകളുടെ സമയത്തിൽ മാറ്റം. കൊങ്കൺ റെയിൽവേയുടെ മൺസൂൺ ടൈംടേബിൾ ജൂൺ 15 മുതൽ പ്രാബല്യത്തിൽ വന്നതോടെയാണ് പുതിയ സമയക്രമം നിലവിൽ വന്നത്. ഒക്ടോബർ 20 വരെയാണ് പ്രത്യേക സമയക്രമം തുടരുക. മത്സ്യഗന്ധ എക്സ്പ്രസ്, വന്ദേഭാരത്, രാജധാനി എക്സ്പ്രസ്, കേരള സമ്പർക്ക് ക്രാന്തി ഉൾപ്പെടെയുള്ള ട്രെയിനുകളുടെ സമയത്തിൽ മാറ്റം വരും

പുതിയ സമയക്രമമനുസരിച്ച് മംഗളൂരു സെൻട്രൽ-മുംബൈ എൽടിടി മത്സ്യഗന്ധ എക്സ്പ്രസ് (12620) ഉച്ചയ്ക്ക് 2.20ന് പകരം 12.45ന് മംഗളൂരു സെൻട്രലിൽ നിന്ന് പുറപ്പെടും. മംഗളൂരു ജംഗ്ഷൻ-മുംബൈ സി.എസ്.എം.ടി സൂപ്പർഫാസ്റ്റ് എക്സ്പ്രസ് (12134) ഉച്ചയ്ക്ക് 2ന് പകരം വൈകിട്ട് 4.35നാണ് യാത്ര ആരംഭിക്കുക.

മഡ്ഗാവ്-മംഗളൂരു സെൻട്രൽ മെമു എക്സ്പ്രസ് (10107) രാവിലെ 4ന് പകരം 4.40ന് പുറപ്പെടും. മഡ്ഗാവ്-മംഗളൂരു സെൻട്രൽ വന്ദേഭാരത് എക്സ്പ്രസ് (20645) വൈകിട്ട് 6.10ന് പകരം 5.35നാണ് സർവീസ് ആരംഭിക്കുക. മഡ്ഗാവ്-മംഗളൂരു പാസഞ്ചർ (56615) ഉച്ചയ്ക്ക് 2.10ന് പകരം 2.15ന് പുറപ്പെടും.

എറണാകുളം ജംഗ്ഷൻ-പൂനെ ജംഗ്ഷൻ സൂപ്പർഫാസ്റ്റ് എക്സ്പ്രസ് (22149), എറണാകുളം ജംഗ്ഷൻ-ഹസ്രത് നിസാമുദ്ദീൻ സൂപ്പർഫാസ്റ്റ് എക്സ്പ്രസ് (22655) എന്നിവ പുലർച്ചെ 5.15ന് പകരം 2.15നാണ് പുറപ്പെടുക.

തിരുവനന്തപുരം നോർത്ത്-യോഗ് നഗറി ഋഷികേശ് സൂപ്പർഫാസ്റ്റ് എക്സ്പ്രസ് (22659), തിരുവനന്തപുരം നോർത്ത്-ചണ്ഡീഗഢ് കേരള സമ്പർക്ക് ക്രാന്തി എക്സ്പ്രസ് (12217), തിരുവനന്തപുരം നോർത്ത്-അമൃത്സർ സൂപ്പർഫാസ്റ്റ് എക്സ്പ്രസ് (12483) എന്നിവ രാവിലെ 9.10ന് പകരം 4.50ന് സർവീസ് ആരംഭിക്കും.

തിരുനെൽവേലി-ജാംനഗർ എക്സ്പ്രസ് (19577), തിരുനെൽവേലി-ഗാന്ധിധാം ഹംസഫർ എക്സ്പ്രസ് (20923) എന്നിവ രാവിലെ 8.10ന് പകരം 5.10നാണ് പുറപ്പെടുക. തിരുവനന്തപുരം നോർത്ത്-മുംബൈ എൽടിടി ഗരീബ് രഥ് എക്സ്പ്രസ് (12202) രാവിലെ 9.10ന് പകരം 7.45ന് സർവീസ് ആരംഭിക്കും.

തിരുവനന്തപുരം നോർത്ത്-ഇൻഡോർ വീക്കിലി സൂപ്പർഫാസ്റ്റ് എക്സ്പ്രസ് (20931), തിരുവനന്തപുരം നോർത്ത്-പോർബന്ദർ വീക്കിലി സൂപ്പർഫാസ്റ്റ് എക്സ്പ്രസ് (20909) എന്നിവ രാവിലെ 11.15ന് പകരം 9.10നാണ് പുറപ്പെടുക.

എറണാകുളം ജംഗ്ഷൻ-ഹസ്രത് നിസാമുദ്ദീൻ മംഗള ലക്ഷദ്വീപ് എക്സ്പ്രസ് (12617) ഉച്ചയ്ക്ക് 1.25ന് പകരം 10.30ന് പുറപ്പെടും. കോയമ്പത്തൂർ-ഹിസാർ എ.സി സൂപ്പർഫാസ്റ്റ് എക്സ്പ്രസ് (22476) ഉച്ചയ്ക്ക് 2.55ന് പകരം 1.30നാണ് സർവീസ് ആരംഭിക്കുക.

എറണാകുളം ജംഗ്ഷൻ-മഡ്ഗാവ് സൂപ്പർഫാസ്റ്റ് എക്സ്പ്രസ് (10216) രാവിലെ 10.40ന് പകരം ഉച്ചയ്ക്ക് 1.25നും തിരുവനന്തപുരം സെൻട്രൽ-ഹസ്രത് നിസാമുദ്ദീൻ രാജധാനി എക്സ്പ്രസ് (12431) വൈകിട്ട് 7.15ന് പകരം ഉച്ചകഴിഞ്ഞ് 2.20നുമാണ് പുറപ്പെടുക.

ട്രെയിനുകളുടെ പുതുക്കിയ സമയക്രമം യാത്രയ്ക്ക് മുമ്പ് പരിശോധിക്കണമെന്ന് റെയിൽവേ അറിയിച്ചു. നാഷണൽ ട്രെയിൻ എൻക്വയറി സിസ്റ്റം (NTES) വഴി യാത്രക്കാർക്ക് ഏറ്റവും പുതിയ വിവരങ്ങൾ ലഭ്യമാകും.