വെള്ളച്ചാട്ടങ്ങളും പശ്ചിമഘട്ട മലനിരകളും, അതിമനോഹരങ്ങളായ വന്ദേ ഭാരത് റൂട്ടുകൾ ഇതാ

നമ്മുടെ രാജ്യത്തിന്റെ സൌന്ദര്യം ഏറ്റവും കൂടുതൽ ആസ്വദിച്ച് അറിയാൻ സാധിക്കുന്ന സമയമാണ് മഴക്കാലം. സുന്ദരമായ കാഴ്ചകൾ സമ്മാനിക്കുന്ന നിരവധി ട്രെയിൻ റൂട്ടുകൾ ഇന്ത്യയിലുണ്ട്.

വെള്ളച്ചാട്ടങ്ങളും നദികളും പശ്ചിമഘട്ട മലനിരകളും കണ്ട് ആസ്വദിച്ച് വന്ദേഭാരതിലൊരു യാത്ര ആയാലോ? മറക്കാനാവാത്ത മഴക്കാല യാത്രാനുഭവം സമ്മാനിക്കുന്ന ആറ് വന്ദേ ഭാരത് റൂട്ടുകൾ താഴെ പറയുന്നവയാണ്.

മുംബൈ - ഗോവ വന്ദേ ഭാരത്

ഇന്ത്യയിലെ ഏറ്റവും മികച്ച മഴക്കാല ട്രെയിൻ യാത്രകളിലൊന്നാണ് മുംബൈ-ഗോവ റൂട്ട്. മഴക്കാലത്തെ കൊങ്കൺ റെയിൽവേയുടെ ഭംഗി വാക്കുകൾക്ക് അതീതമാണ്. പശ്ചിമഘട്ടത്തിലൂടെ കടന്നുപോകുന്ന ഈ ട്രെയിൻ നൂറുകണക്കിന് പാലങ്ങളും തുരങ്കങ്ങളും താണ്ടിയാണ് സഞ്ചരിക്കുന്നത്. യാത്രയിലുടനീളം പച്ചപ്പുനിറഞ്ഞ താഴ്‌വരകളും, വെള്ളച്ചാട്ടങ്ങളും, അറബിക്കടലിന്റെ ഭംഗിയും ആസ്വദിക്കാനാകും.

ഡൽഹി - ഡെറാഡൂൺ വന്ദേ ഭാരത്

നഗരജീവിതത്തിൽ നിന്ന് മാറി ഹിമാലയത്തിന്റെ ഭംഗി ആസ്വദിക്കാൻ ആഗ്രഹിക്കുന്നവർക്ക് പറ്റിയ റൂട്ടാണിത്. വടക്കേ ഇന്ത്യയിലെ ഏറ്റവും മനോഹരമായ മഴക്കാല റൂട്ടുകളിലൊന്നാണിത്. യാത്ര പുരോഗമിക്കുമ്പോൾ നഗരക്കാഴ്ചകൾ മാറി പച്ചപ്പ നിറഞ്ഞ പാടങ്ങളും, വനപ്രദേശങ്ങളും, ശിവാലിക് മലനിരകളുടെ കാഴ്ചകളും കാണാം.

മുംബൈ - പൂനെ വന്ദേ ഭാരത്

മുംബൈയ്ക്കും പൂനെയ്ക്കും ഇടയിൽ സർവീസ് നടത്തുന്ന ഈ വന്ദേ ഭാരത്, ഇന്ത്യയിലെ തന്നെ ഏറ്റവും മനോഹരമായ റെയിൽവേ പാതകളായ കർജാത്, ഖണ്ടാല, ലോണാവാല വഴിയാണ് കടന്നുപോകുന്നത്. പശ്ചിമഘട്ടത്തിലൂടെ ട്രെയിൻ കുതിച്ചുപായുമ്പോൾ, പാറക്കെട്ടുകളിൽ നിന്ന് താഴേക്ക് പതിക്കുന്ന വലിയ വെള്ളച്ചാട്ടങ്ങളും കാടുകളും യാത്രക്കാർക്ക് കാണാം. മഞ്ഞുമൂടിയ താഴ്‌വരകളുടെയും മലനിരകളുടെയും കാഴ്ചകൾ അതിമനോഹരമാണ്.

അഹമ്മദാബാദ് - ഏകതാ നഗർ വന്ദേ ഭാരത്

മഴക്കാലത്ത് യാത്ര ചെയ്യാൻ പറ്റിയ മറ്റൊരു മികച്ച റൂട്ടാണിത്. പച്ചപ്പുനിറഞ്ഞ പാടശേഖരങ്ങളിലൂടെ കടന്നുപോകുന്ന ട്രെയിൻ അവസാനിക്കുന്നത് ലോകത്തിലെ ഏറ്റവും ഉയരം കൂടിയ പ്രതിമയായ സ്റ്റാച്യു ഓഫ് യൂണിറ്റി സ്ഥിതി ചെയ്യുന്ന ഏകതാ നഗറിലാണ്. മഴ പെയ്യുന്നതോടെ ചുറ്റുമുള്ള നർമ്മദ താഴ്‌വര കൂടുതൽ മനോഹരമാകും. വെള്ളച്ചാട്ടങ്ങളും തോട്ടങ്ങളും കുന്നുകളും നിറഞ്ഞതാണ് ഈ പ്രദേശം.

ചെന്നൈ - മധുരൈ വന്ദേ ഭാരത്

മഴക്കാലത്ത് ദക്ഷിണേന്ത്യൻ ഗ്രാമങ്ങളുടെ ഭംഗി ഇരട്ടിക്കും. ദക്ഷിണേന്ത്യയുടെ ഈ സൗന്ദര്യം ആസ്വദിക്കാൻ ചെന്നൈ-മധുരൈ വന്ദേ ഭാരത് തിരഞ്ഞെടുക്കാം. വലിയ മലനിരകൾക്ക് പകരം തമിഴ്‌നാട്ടിലെ ഈന്തപ്പനകൾ നിറഞ്ഞ ഗ്രാമങ്ങളും, മനോഹരമായ തടാകങ്ങളും, മഴവെള്ളം നിറഞ്ഞ കൃഷിയിടങ്ങളുമാണ് ഈ യാത്രയിൽ കാണാൻ കഴിയുക.

റാഞ്ചി - ഹൗറ വന്ദേ ഭാരത്

ആളുകൾ പലപ്പോഴും ശ്രദ്ധിക്കാതെ പോകുന്ന കിഴക്കൻ ഇന്ത്യയുടെ യഥാർത്ഥ ഭംഗിയും ഈ യാത്രയിൽ കാണാം. കിഴക്കൻ ഇന്ത്യയുടെ ശാന്തവും മനോഹരവുമായ വശമാണ് ഈ റൂട്ട് സമ്മാനിക്കുന്നത്. ജാർഖണ്ഡിലെ വനങ്ങളിലൂടെയും, മലഞ്ചെരുവുകളിലൂടെയും, നദികളിലൂടെയും, മഴക്കാലത്ത് കൂടുതൽ സജീവമാകുന്ന കൃഷിയിടങ്ങളിലൂടെയുമാണ് ഈ ട്രെയിൻ കടന്നുപോകുന്നത്.