അഞ്ച് കിലോ തൂക്കമുള്ള ലഡു ലേലത്തിൽ പോയത് 1.26 കോടി രൂപയ്ക്ക്; ചിത്രങ്ങൾ വൈറൽ

Updated: Monday, October 2, 2023, 17:14 [IST]

ഒരു ലഡു വാങ്ങാൻ എത്ര രൂപ ചെലവാകും? പത്ത് രൂപ പോലും ആവില്ല എന്നായിരിക്കും നിങ്ങളുടെ മറുപടി. എന്നാൽ 1.26 കോടി രൂപയ്ക്ക് ഒരു ലഡു വിറ്റു പോയി എന്ന് പറഞ്ഞാൽ വിശ്വസിക്കുമോ! ഹൈദരാബാദിലെ സൺസിറ്റിയിലുള്ള റിച്ച്മണ്ട് വില്ലാസിൽ ഈ വർഷം നടന്ന ലേലത്തിലാണ് ഈ ഭീമൻ ലഡു ഇത്രയും വിലയ്ക്ക് ലേലത്തിൽ പോയത്.

ഒരു കൂട്ടം വനിതകൾ ചേർന്നാണ് ഈ ലഡു സ്വന്തമാക്കിയത് എന്നാണ് റിപ്പോർട്ട്. ഗണേശോത്സവത്തിന്റെ പത്താം ദിവസം ആണ് ഈ ലഡുവിന് വേണ്ടിയുള്ള ലേലം നടന്നത്. മൂന്ന് മണിക്കൂർ ഈ ലേലം നീണ്ടുനിന്നു.

ഗണേശോത്സവ ആഘോഷത്തിന്റെ ഭാഗമായി എല്ലാ വർഷവും ലേലം നടക്കാറുണ്ട്. ഗണേശ നിമജ്ജനത്തിന്റെ തലേദിവസം ആണ് ലേലം നടക്കാറുള്ളത്. 2019 ൽ സൺ സിറ്റിയിൽ ആണ് ലേലം ആദ്യമായി ആരംഭിച്ചത്. പിന്നീട് എല്ലാവർഷവും മുടക്കം ഇല്ലാതെ ലേലം നടക്കാൻ തുടങ്ങി.

കഴിഞ്ഞ വർഷം ഏകദേശം 12 കിലോ ഭാരമുള്ള ഗണേഷ് ലഡ്ഡു 65 ലക്ഷം രൂപയ്ക്കാണ് വിറ്റത്. ഈ വർഷം ലേലത്തിൽ മുൻ വർഷങ്ങളിലേക്കാൾ ഇരട്ടിയിലധികം വർധവന് ആണ് ലേലത്തുകയിൽ ഉണ്ടായത്. ലേലത്തിൽ നിന്ന് ലഭിക്കുന്ന മുഴുവൻ തുകയും ജീവകാരുണ്യ പ്രവർത്തനങ്ങൾക്കാണ് ഉപയോഗിക്കുന്നത്. വിവിധ സ്കൂളുകൾക്കും ആരോഗ്യസേവനങ്ങൾക്കും സഹായം നൽകാറുണ്ട്. വിവിധ എൻ ജി ഒകൾക്ക് പചചരക്ക് സാധനങ്ങൾ വിതരണം ചെയ്യാറുണ്ട്.‌

ഹൈദരാബാദിന്റെ വിവിധ ഭാഗങ്ങളിൽ ഇത്തരത്തിലുള്ള ലേലം നടക്കാറുണ്ട്. ഗണേശോത്സവത്തിന്റെ അവസാന ദിവസമാണ് ലേലം നടക്കാറുള്ളത്. ഗണേശ ലഡു ലേലം ചെയ്യുന്ന രീതി 1994 ൽ കോലൻ മോഹൻ റെഡ്ഡി എന്ന പ്രാദേശിക കർഷകനാണ് അവതരിപ്പിക്കുന്നത്, 450 രൂപയ്ക്കാണ് അദ്ദേഹം അന്ന് ലഡു വാങ്ങുന്നത്. ലഡു പ്രസാദം വീട്ടുകാർക്കും ഗ്രാമവാസികൾക്കും വിതരണം ചെയ്തു.

ബാക്കി വന്ന ലഡു കൃഷിയിടത്തിൽ തളിച്ചു. അത്തവണ അദ്ദേഹത്തിന് നല്ല വിളവ് ലഭിച്ചെന്നാണ് പറയുന്നത്. അതിനാൽ ഈ ലഡു ലേലത്തിൽ പങ്കെടുക്കുന്നത് വീട്ടിൽ ഐശ്വര്യം കൊണ്ടുവരുമെന്നും സമ്പത്തും ഭാഗ്യവും ആരോഗ്യവുമൊക്കെ ഉണ്ടാവുമെന്നാണ് കരുതുന്നത്. അതുകൊണ്ട് ലഡു ലേലത്തിൽ പങ്കെടുക്കാൻ ആളുകൾ മുന്നിട്ട് വരാറുണ്ട്.