വിവാഹാഭ്യര്‍ത്ഥന നിരസിച്ചു; സ്‌കൂള്‍ ടീച്ചറെ ജീവനോടെ കത്തിച്ചു

ഇസ്ലാമാബാദ്: വിവാഹാഭ്യര്‍ത്ഥന നിരസിച്ച സ്‌കൂള്‍ ടീച്ചറെ ജീവനോടെ പെട്രോള്‍ ഒഴിച്ച് തീ കൊളുത്തികൊന്നു. പാകിസ്താന്റെ തലസ്ഥാനമായ ഇസ്ലാമാബാദിലാണ് സംഭവം. പതിനെട്ടുകാരിയായ മരിയ അബ്ബാസിയാണ് മരിച്ചത്.

85 ശതമാനം പൊള്ളലേറ്റ മരിയ ആശുപത്രിയില്‍ വെച്ചാണ് മരിച്ചത്. സംഭവവുമായി ബന്ധപ്പെട്ട് മൂന്ന് യുവാക്കളെ പോലീസ് അറസ്റ്റ് ചെയ്തിട്ടുണ്ട്. മരിയയുടെ വീട്ടിലെത്തിയ ഒരു സംഘം യുവാക്കള്‍ പെട്രോള്‍ ഒഴിച്ച ശേഷം ജീവനോടെ കത്തിക്കുകയായിരുന്നു.

ഈ സമയം മരിയയുടെ മാതാപിതാക്കള്‍ പുറത്തു പോയിരുന്നു. അഞ്ച് മാസം പ്രായമുള്ള സഹോദരി മാത്രമായിരുന്നു വീട്ടിലുണ്ടായിരുന്നത്. വീട്ടിലേക്ക് തിരിച്ചെത്തിയ മാതാപിതാക്കള്‍ പൊള്ളലേറ്റ മരിയയെയാണ് കണ്ടത്. ഉടന്‍ തന്നെ ആശുപത്രിയില്‍ പ്രവേശിപ്പിച്ചെങ്കിലും മരിക്കുകയായിരുന്നു.

മരിയ ജോലിചെയ്യുന്ന സ്‌കൂളിന്റെ ഉടമസ്ഥന്റെ മകന്‍ മരിയയോട് വിവാഹാഭ്യര്‍ത്ഥന നടത്തിയെങ്കിലും മരിയ അത് നിരസിക്കുകയായിരുന്നു. തുടര്‍ന്ന് യുവാവും സുഹൃത്തും വീട്ടില്‍ ചെന്ന് ഭീഷണിപെടുത്തി. എന്നിട്ടും വിവാഹത്തിന് സമ്മതിക്കാതിരുന്നപ്പോഴാണ് ആരുമില്ലാത്ത സമയം നോക്കി യുവാക്കള്‍ മരിയയെ ജീവനോടെ കത്തിച്ചത്.

English summary

A Pakistani woman set on fire for refusing a marriage proposal from a man twice her age has died. Maria Sadaqat, 19, a teacher, was attacked by a group of men Sunday at her home near the town of Murree, according to media reports. She died Wednesday in an Islamabad hospital.