'എഐ തൊഴിൽ വിപണിയിൽ ഒരു സുനാമി പോലെ ആഞ്ഞടിക്കും'; യുവാക്കൾക്ക് മുന്നറിയിപ്പുമായി ഐഎംഎഫ് ഡയറക്‌ടർ

ഡാവോസ്: സ്വിറ്റ്‌സർലൻഡിലെ ഡാവോസിൽ നടക്കുന്ന ലോക സാമ്പത്തിക ഫോറത്തിൽ വെച്ച് അന്താരാഷ്ട്ര നാണയ നിധി മാനേജിംഗ് ഡയറക്‌ടർ ക്രിസ്‌റ്റലീന ജോർജിയേവ ഒരു മുന്നറിയിപ്പ് നൽകിയിരിക്കുകയാണ്: ആർട്ടിഫിഷ്യൽ ഇന്റലിജൻസ് (എഐ) ആഗോള തൊഴിൽ വിപണിയിൽ വലിയ പ്രത്യാഘാതങ്ങൾ സൃഷ്‌ടിക്കും എന്നാണ് അവർ പറയുന്നത്. മാത്രമല്ല ഇത് യുവ തൊഴിലാളികളെയും പ്രാരംഭ തലത്തിലുള്ള ജോലികളെയും ഇത് കാര്യമായി ബാധിക്കും.

എഎംഎഫ് ഗവേഷണം ഉദ്ധരിച്ച്, എഐയുടെ വ്യാപനം വൈദഗ്ധ്യത്തിനുള്ള ആവശ്യം മാറ്റുമെന്ന് ജോർജിയേവ പറഞ്ഞു. വികസിത സമ്പദ്‌വ്യവസ്ഥകളിലെ 60 ശതമാനം ജോലികൾ മെച്ചപ്പെടുത്തപ്പെടുകയോ, മാറിക്കപ്പെടുകയോ, ഇല്ലാതാവുകയോ ചെയ്യാം. ആഗോളതലത്തിൽ ഇത് 40 ശതമാനം ആണ്. "ഇതൊരു സുനാമി പോലെ തൊഴിൽ വിപണിയിൽ ആഞ്ഞുവീശുകയാണ്," അവർ പ്രതിനിധികളോട് വ്യക്തമാക്കി.

എഐ ചില തൊഴിലാളികളുടെ ഉൽപ്പാദനക്ഷമതയും ശമ്പളവും വർധിപ്പിച്ചു എന്നും അവർ പറയുന്നുണ്ട് (വികസിത സമ്പദ്‌വ്യവസ്ഥകളിൽ പത്തിൽ ഒരു ജോലി ഈ സാങ്കേതികവിദ്യയാൽ മെച്ചപ്പെട്ടു). എന്നാൽ ഈ നേട്ടങ്ങൾ തുല്യമല്ല. യുവ തൊഴിലാളികൾ ചെയ്യുന്ന പല ജോലികളും ഏറ്റവും ദുർബലമായവയാണെന്ന് ജോർജിയേവ മുന്നറിയിപ്പ് നൽകി.

'ഇല്ലാതാകുന്ന ജോലികൾ പലപ്പോഴും പ്രാരംഭ തലത്തിലുള്ളവയാണ്' അവർ പറഞ്ഞു. തൊഴിൽ മേഖലയിലേക്ക് വരുന്ന യുവജനങ്ങൾക്ക് നല്ല ജോലികൾ കണ്ടെത്താൻ പ്രയാസമായേക്കാം. AI നേരിട്ട് മെച്ചപ്പെടുത്താത്ത ജോലികളിലുള്ളവർക്ക് വേതനം കുറയാനുള്ള സാധ്യതയുണ്ട്. മാത്രമല്ല ഇതിൽ മധ്യവർഗം അനിവാര്യമായി ബാധിക്കപ്പെടുമെന്നും അവർ പറയുന്നു.

എഐയുടെ അമിതവേഗതയും നിയന്ത്രണമില്ലായ്‌മമാണ് ജോർജിയേവ ഉന്നയിക്കുന്ന പ്രധാന ആശങ്ക. സുരക്ഷ, എല്ലാവരെയും ഉൾക്കൊള്ളൽ, ഭരണം എന്നിവ ചോദ്യങ്ങളാകുന്നു. 'ഇത് അതിവേഗം മുന്നോട്ട് പോകുന്നു, എങ്ങനെ സുരക്ഷിതമോ ഉൾക്കൊള്ളുന്നതോ ആക്കണമെന്ന് നമുക്കറിയില്ല' അവർ പറഞ്ഞു. 'നമ്മൾ പിന്തുടരുന്നതിലും വേഗത്തിൽ എഐ ലോകത്തെ മാറ്റുന്നു' ജോർജിയേവ പറഞ്ഞു.

ഡാവോസ് അജണ്ടയിൽ ഭൗമരാഷ്ട്രീയ പിരിമുറുക്കങ്ങളും വ്യാപാര അനിശ്ചിതത്വങ്ങളുമായിരുന്നു പ്രധാനമെങ്കിലും, എഐയുടെ സാമ്പത്തിക, സാമൂഹിക സ്വാധീനം ഒരു കേന്ദ്ര വിഷയമായി മാറിയിരുന്നു. ആഗോള തലത്തിൽ തന്നെ എഐയെ കുറിച്ചുള്ള ആശങ്കകൾ വലിയ തോതിൽ വർധിക്കുന്ന സമയത്ത് കൂടിയാണ് ഇതെന്ന് ഓർക്കണം.

English summary

IMF director warns youth, says AI will hit the job market like a tsunami.