ഇന്ത്യയിലെ എഐ മേഖലയ്ക്ക് ഗൂഗിളിന്റെ കൈത്താങ്ങ്; വിവിധ വിഭാഗങ്ങളിലായി വമ്പൻ നിക്ഷേപം പ്രഖ്യാപിച്ചു

ഇന്ത്യയിലെ നിർമ്മിത ബുദ്ധി മേഖലയ്ക്ക് ഉത്തേജനം നൽകാനായി ഗൂഗിൾ പുതിയ നിക്ഷേപങ്ങളും ഗവേഷണ പദ്ധതികളും പ്രഖ്യാപിച്ചു. ആരോഗ്യ സംരക്ഷണം, കൃഷി, സുസ്ഥിരത, വിദ്യാഭ്യാസം, ഡിജിറ്റൽ പൊതു അടിസ്ഥാന സൗകര്യങ്ങൾ എന്നീ പ്രധാന മേഖലകളിലാണ് പുതിയ ഫണ്ടിംഗും പങ്കാളിത്തവും. "ഇന്ത്യ എഐ ഇംപാക്റ്റ്‌ സമ്മിറ്റ് 2026" വേദിയിൽ നടന്ന "ലാബ് ടു ഇംപാക്റ്റ്" പരിപാടിയിലാണ് ഗൂഗിൾ ഈ പ്രഖ്യാപനങ്ങൾ നടത്തിയത്.

ഗൂഗിളിന്റെ പദ്ധതികൾ ആരോഗ്യ സംരക്ഷണ ചിലവുകൾ കുറയ്ക്കാനും പ്രാദേശിക കണ്ടുപിടുത്തങ്ങളെ ശക്തിപ്പെടുത്താനും സഹായിക്കും. ഇന്ത്യൻ ഭാഷകളിലും വിവിധ മേഖലകളിലും എഐ ടൂളുകൾ വികസിപ്പിക്കുന്ന ഡെവലപ്പർമാർക്കും ഇത് പിന്തുണ നൽകും. ഗൂഗിളിന്റെ എഐ മോഡലുകളും അടിസ്ഥാന സൗകര്യങ്ങളും ക്ലീൻ എനർജി പങ്കാളിത്തങ്ങളും ഇന്ത്യയുടെ ദീർഘകാല ഡിജിറ്റൽ, കാലാവസ്ഥാ ലക്ഷ്യങ്ങൾക്ക് കരുത്തേകുമെന്ന് പരിപാടിയിൽ എടുത്തുപറഞ്ഞു.

ഇന്ത്യൻ സ്ഥാപനങ്ങൾക്കും സ്‌റ്റാർട്ടപ്പുകൾക്കും ലാഭേച്ഛയില്ലാത്ത സംഘടനകൾക്കുമായി ദശലക്ഷക്കണക്കിന് ഡോളറിന്റെ ധനസഹായം ഗൂഗിൾ പ്രഖ്യാപിച്ചു. എയിംസ്, ഐഐഎസ്‌സി എന്നിവയുമായി ചേർന്ന് ഹെൽത്ത് ഫൗണ്ടേഷൻ മോഡലിനായി 400,000 ഡോളറും, നാല് എഐ മികവിന്റെ കേന്ദ്രങ്ങൾക്കായി 8 ദശലക്ഷം ഡോളറും, ഐഐടി ബോംബെയിലെ പ്രാദേശിക ഭാഷാ സാങ്കേതിക ഗവേഷണ ഹബ്ബിനായി 2 ദശലക്ഷം ഡോളറുമാണ് അനുവദിച്ചത്. ഇന്ത്യൻ സ്‌റ്റാർട്ടപ്പുകളെയും ശുദ്ധ ഊർജ്ജ സംരംഭങ്ങളെയും കമ്പനി പിന്തുണയ്ക്കുന്നു.

ആരോഗ്യ സംരക്ഷണ ഗവേഷണത്തിലാണ് ഗൂഗിൾ വലിയ ശ്രദ്ധ കേന്ദ്രീകരിക്കുന്നത്. എയിംസ്, ഐഐഎസ്‌സി എന്നിവയുമായി സഹകരിച്ച് മെഡ്ജെമ്മ ഉപയോഗിച്ച് ഇന്ത്യയുടെ ഹെൽത്ത് ഫൗണ്ടേഷൻ മോഡൽ വികസിപ്പിക്കാൻ 400,000 ഡോളർ നൽകും. ഇത് ത്വക്ക് രോഗ ചികിത്സയിൽ ശ്രദ്ധ കേന്ദ്രീകരിക്കുകയും ആശുപത്രികളിലെ ഒപിഡി ട്രിയേജ് സംവിധാനം കാര്യക്ഷമമാക്കുകയും ക്ലിനിക്കൽ രേഖകളെ എഫ്എച്ച്ഐആർ ഫോർമാറ്റിലേക്ക് മാറ്റുകയും ചെയ്യും.

ഗൂഗിൾ മാപ്‌സിൽ 400,000-ൽ അധികം ആരോഗ്യ കേന്ദ്രങ്ങൾ രേഖപ്പെടുത്താനും പദ്ധതിയുണ്ട്. ഈ എഐ സംരംഭങ്ങളിലൂടെ പ്രതിവർഷം ഏകദേശം 390 ബില്ല്യൺ രൂപ ആരോഗ്യ ചിലവുകളിൽ ലാഭിക്കാൻ കഴിയുമെന്ന് ഗവേഷണ റിപ്പോർട്ടുകൾ പറയുന്നു. മെച്ചപ്പെട്ട രോഗനിർണയം, റെക്കോർഡുകൾ ഡിജിറ്റൈസ് ചെയ്യൽ, മാപ്പ് ചെയ്‌ത സൗകര്യങ്ങളിലേക്കുള്ള ലഭ്യത എന്നിവ പൊതു ആശുപത്രികളിൽ മികച്ച ചികിത്സാ ഫലങ്ങളും വേഗത്തിലുള്ള രോഗി പ്രതികരണ സമയങ്ങളും ഉറപ്പാക്കാൻ സഹായിക്കും.

അക്കാദമിക് രംഗത്തെ ഗൂഗിളിന്റെ നിക്ഷേപങ്ങൾ രാജ്യത്തെ പ്രമുഖ കാമ്പസുകളിൽ വ്യാപിച്ചിരിക്കുന്നു. ഐഐഎസ്‌സി ബാംഗ്ലൂർ, ഐഐടി കാൺപൂർ, ഐഐടി മദ്രാസ്, ഐഐടി റോപാർ എന്നിവിടങ്ങളിലെ നാല് എഐ മികവിന്റെ കേന്ദ്രങ്ങൾക്കായി 8 ദശലക്ഷം ഡോളറാണ് അനുവദിക്കുന്നത്. പകർച്ചവ്യാധി അല്ലാത്ത രോഗങ്ങൾ, നഗര ഭരണം, കാർഷിക ഉൽപ്പാദനക്ഷമത, വിദ്യാഭ്യാസത്തിലെ പഠന നിലവാരം മെച്ചപ്പെടുത്തൽ എന്നിവയുൾപ്പെടെയുള്ള മേഖലകളിൽ എഐ പ്രായോഗികമാക്കാനാണ് ഈ കേന്ദ്രങ്ങൾ ലക്ഷ്യമിടുന്നത്.

ഭാഷാ ഗവേഷണങ്ങൾക്കായി, ഐഐടി ബോംബെയിൽ ഇൻഡിക് ലാംഗ്വേജ് ടെക്നോളജീസ് റിസർച്ച് ഹബ്ബ് സ്ഥാപിക്കുന്നതിന് ഗൂഗിൾ 2 ദശലക്ഷം ഡോളർ അനുവദിച്ചു. ഇന്ത്യൻ ഭാഷകളിലെ വിവർത്തനം, സംഭാഷണ തിരിച്ചറിയൽ, ഡിജിറ്റൽ ലഭ്യത എന്നിവ മെച്ചപ്പെടുത്തുന്ന നൂതന ഉപകരണങ്ങൾ വികസിപ്പിക്കാനാണ് ഈ ഹബ്ബ് ലക്ഷ്യമിടുന്നത്.

ഇന്ത്യൻ സ്‌റ്റാർട്ടപ്പുകൾക്ക് പിന്തുണ നൽകുന്നതും ഗൂഗിളിന്റെ ഈ പദ്ധതിയുടെ ഒരു പ്രധാന ഭാഗമാണ്. പ്രാദേശിക ഭാഷാ ഐ മോഡലുകൾ നിർമ്മിക്കുന്നതിനായി Gnani.AI, CoRover.AI, BharatGen എന്നീ സ്‌റ്റാർട്ടപ്പുകൾക്ക് ഓരോന്നിനും 50,000 ഡോളർ വീതം ഗൂഗിൾ ധനസഹായം നൽകും. ഇത് തദ്ദേശീയ എഐ സാങ്കേതികവിദ്യയുടെ വളർച്ചയ്ക്ക് വലിയ സഹായകമാകും.

English summary

Google's support for India's AI sector; announces huge investments in various sectors.