സ്‌കാനിംഗ് വേണ്ട, ഇസിജിയും വേണ്ട; ഈ എഐ സ്‌റ്റെതസ്കോപ് ഉണ്ടെങ്കിൽ ഹൃദ്രോഗം പെട്ടെന്ന് തിരിച്ചറിയും!

എഐ എല്ലാ മേഖലകളിലും വരവറിയിച്ചുകഴിഞ്ഞു. ഇന്നത്തെ മാറിയ പരിതസ്ഥിതിയിൽ നിർമ്മിത ബുദ്ധി കരുത്തേകുന്ന ഒരുപാട് മേഖലകളും വിഭാഗങ്ങളും ഉണ്ട്. അവയിൽ പലതും മനുഷ്യരുടെ അധ്വാനം കുറയ്ക്കാനും കൂടുതൽ മെച്ചപ്പെട്ട ഫലങ്ങളും നൽകാനുമാണ് ഉപയോഗിച്ച് പോരുന്നത്. അത്തരത്തിൽ മെഡിക്കൽ രംഗത്തും എഐ ശക്തമായ സാന്നിധ്യമായി മാറുകയാണ്. ഇത് വലിയൊരു മാറ്റത്തിലേക്ക് വഴിയൊരുക്കുകയാണ് എന്ന റിപ്പോർട്ടുകൾ ശരി വയ്ക്കുന്നതാണ് പുതിയ കണ്ടുപിടിത്തങ്ങൾ.

അത്തരത്തിൽ നിർണായകമായ ഒരു കണ്ടുപിടുത്തം നടത്തിയിരിക്കുകയാണ് ഒരുകൂട്ടം ഗവേഷകർ. 15 സെക്കൻഡിനുള്ളിൽ മൂന്ന് ഹൃദയ അവസ്ഥകൾ കണ്ടെത്താൻ കഴിയുന്ന ഒരു കൃത്രിമബുദ്ധി സ്‌റ്റെതസ്കോപ്പ് ഡോക്‌ടർമാർ വിജയകരമായി വികസിപ്പിച്ചെടുത്തിട്ടുണ്ട്. 1816-ൽ കണ്ടുപിടിച്ച, പരമ്പരാഗത സ്റ്റെതസ്കോപ്പ്, രണ്ട് നൂറ്റാണ്ടിലേറെയായി എല്ലാ ഡോക്‌ടർമാരുടെയും ടൂൾകിറ്റിന്റെ ഒരു പ്രധാന ഭാഗമാണ്.

ഹൃദയസ്‌തംഭനം, ഹൃദയ വാൽവ് രോഗം, അസാധാരണമായ ഹൃദയ താളം എന്നിവ തൽക്ഷണം നിർണ്ണയിക്കാൻ കഴിയുന്ന എഐ കഴിവുകളുള്ള ഒരു ഹൈടെക് അപ്‌ഗ്രേഡ് ഇപ്പോൾ ഒരു സംഘം രൂപകൽപ്പന ചെയ്‌തിട്ടുണ്ട്‌ എന്നതാണ് ആശ്വാസകരമായ കാര്യം. ഇതിലൂടെ വളരെ പെട്ടെന്ന് തന്നെ ഹൃദ്രോഗ വിദഗ്‌ദ്ധർക്ക് രോഗ നിർണയം സാധ്യമാവും.

ലണ്ടനിലെ ഇംപീരിയൽ കോളേജിലെയും ഇംപീരിയൽ കോളേജ് ഹെൽത്ത്കെയർ എൻഎച്ച്എസ് ട്രസ്‌റ്റിലെയും ഗവേഷകർ വികസിപ്പിച്ചെടുത്ത പുതിയ സ്‌റ്റെതസ്കോപ്പിന് ഹൃദയമിടിപ്പിലെയും രക്തപ്രവാഹത്തിലെയും ചെറിയ വ്യത്യാസങ്ങൾ വിശകലനം ചെയ്യാനും മനുഷ്യന്റെ ചെവിക്ക് തിരിച്ചറിയാൻ കഴിയാത്തവിധം വേഗത്തിലുള്ള ഫലങ്ങൾ അറിയാനും സാധിക്കും.

ലോകത്തിലെ ഏറ്റവും വലിയ ആരോഗ്യ സമ്മേളനമായ മാഡ്രിഡിൽ നടന്ന യൂറോപ്യൻ സൊസൈറ്റി ഓഫ് കാർഡിയോളജി വാർഷിക കോൺഗ്രസിൽ ആയിരക്കണക്കിന് ഡോക്‌ടർമാർക്ക് മുന്നിൽ, മൂന്ന് അവസ്ഥകളുടെയും പ്രാരംഭ രോഗനിർണ്ണയം വർധിപ്പിക്കാൻ കഴിയുന്ന ഈ മുന്നേറ്റത്തിന്റെ വിശദാംശങ്ങൾ ഗവേഷകർ പങ്കുവച്ചിരുന്നു.

നേരത്തെയുള്ള രോഗനിർണയം ഹൃദ്രോഗത്തിൽ അത്യന്താപേക്ഷിതമാണ്, ഇത് ജീവൻ രക്ഷിക്കുന്ന മരുന്നുകൾ ആവശ്യമുള്ളവരെ അപകടകരമായി അസുഖം മാറുന്നതിന് മുമ്പ് എത്രയും വേഗം കണ്ടെത്തുന്നതിന് സഹായിക്കുന്നു. ഇതിലേക്ക് വഴിയൊരുക്കുന്നതാണ് ഗവേഷകരുടെ ഈ പുതിയ കണ്ടുപിടിത്തം.

യുകെയിലെ 200 ശസ്ത്രക്രിയകളിൽ നിന്നുള്ള ഏകദേശം 12,000 രോഗികളെ ഉൾപ്പെടുത്തി എഐ സ്‌റ്റെതസ്കോപ്പ് പരീക്ഷിച്ചു കൊണ്ടുള്ള ഒരു പഠനം, ശ്വാസതടസം അല്ലെങ്കിൽ ക്ഷീണം പോലുള്ള ലക്ഷണങ്ങളുള്ളവരെ പരിശോധിച്ചു. തുടർന്നാണ് ഈ ഗവേഷണം ഫലം കണ്ടെത്തിയത്. എന്തായാലും ഭാവിയിലെ ചികിത്സാ കാര്യങ്ങളിൽ വലിയ മുന്നേറ്റമുണ്ടാക്കാൻ സഹായിക്കുന്നതാണ് ഈ പഠനമെന്ന കാര്യം ഉറപ്പാണ്.

English summary

No scanning, no ECG; this AI stethoscope can quickly identify heart disease.