ജിംനിക്ക് ഒന്നും വയ്യേ? വിൽപന കൂട്ടാനായി വില കുറച്ച് മാരുതി, ഗ്രാൻഡ് വിറ്റാരയ്ക്കും വന്നോ ഈ ഗതികേട്
ഇന്ത്യൻ വാഹന വിപണിയിലെ ഏറ്റവും ജനപ്രിയ കമ്പനിയും, ഏറ്റവും വലിയ നിർമ്മാതാക്കളും ഒക്കെയാണ് മാരുതി സുസുക്കി. അതുകൊണ്ട് തന്നെ ഓരോ ഇടവേളയ്ക്ക് ശേഷവും ഉപഭോക്താക്കളെ ആകർഷിക്കാനുള്ള വിലക്കുറവും, ഡിസ്കൗണ്ടും ഉൾപ്പെടെയുള്ള ഓഫറുകളുമായി അവർ രംഗത്ത് വരാറുണ്ട്. ഇപ്പോഴിതാ വാഹനപ്രേമികളുടെ സ്വന്തം മാരുതി ഉഗ്രൻ ഓഫറുമായി ഈ മാർച്ച് മാസവും രംഗത്ത് വന്നിരിക്കുകയാണ്.
കമ്പനിയുടെ ജനപ്രിയ മോഡലുകൾക്ക് ആകർഷകമായ കിഴിവുകൾ പ്രഖ്യാപിച്ചു കൊണ്ടാണ് ഇക്കുറി അവർ എല്ലാവരെയും അത്ഭുതപ്പെടുത്തുന്നത്. ഈ ഓഫറുകൾ വാഹനങ്ങളുടെ വിൽപ്പന വർദ്ധിപ്പിക്കാനും ഇന്ത്യൻ വിപണിയിൽ ബ്രാൻഡിന്റെ മത്സരാധിഷ്ഠിത നിലനിർത്താനും ലക്ഷ്യമിടുന്നതാണ്. 4,000 രൂപ മുതൽ 1.5 ലക്ഷം രൂപ വരെയാണ് കിഴിവുകൾ ലഭ്യമാവുക. അറീന, നെക്സ ഷോറൂമുകളിലെ വിവിധ മോഡലുകൾക്ക് ഇത് ബാധകമാണ്. ഏതൊക്കെ മോഡലുകൾക്ക് ഓഫർ ലഭ്യമാവും എന്ന് നോക്കാം.
മാരുതി സുസുക്കി ജിംനി
മാരുതിയുടെ ഐക്കോണിക് മുഖമായ ജിംനി ഈ മാസത്തെ ഏറ്റവും ഉയർന്ന കിഴിവുകളോടെ ലഭ്യമാവും, എന്നാൽ അത് ഓരോയിടത്തും വ്യത്യസ്തമായിരിക്കും എന്ന് മാത്രം. മുംബൈയിലെയും രത്നഗിരിയിലെയും ഡീലർഷിപ്പുകൾ 1.5 ലക്ഷം രൂപ വരെ ആനുകൂല്യങ്ങൾ വാഗ്ദാനം ചെയ്യുമ്പോൾ, ഗോവയിലെ വാങ്ങുന്നവർക്ക് 50,000 രൂപ വരെ കുറഞ്ഞ കിഴിവാണ് ലഭിക്കുന്നത്. എന്തായാലും ഈ വാഹനത്തിന് എല്ലായിടത്തും കിഴിവുകൾ ലഭ്യമാണ്.
ഗ്രാൻഡ് വിറ്റാര
തിരഞ്ഞെടുക്കുന്ന പവർട്രെയിനിനെ ആശ്രയിച്ച് ഗ്രാൻഡ് വിറ്റാര ഡിസ്കൗണ്ടുകളിൽ കാര്യമായ വ്യത്യാസങ്ങൾ കാണുന്നു. സിഎൻജി വേരിയന്റിന് 4,000 രൂപ വരെ ആനുകൂല്യങ്ങൾ ലഭിക്കുന്നു, ജനപ്രിയ മൈൽഡ്-ഹൈബ്രിഡ് ഓപ്ഷൻ ഉൾപ്പെടെയുള്ള മറ്റ് വേരിയന്റുകൾക്ക് 59,000 രൂപ വരെ കിഴിവും ലഭിക്കും. ഈ ശ്രേണിയിലെ ഏറ്റവും വലിയ കിഴിവ് ഗ്രാൻഡ് വിറ്റാര ഹൈബ്രിഡ് വേരിയൻ്റിന്റിനാണ്, 79,000 രൂപ വരെ ലാഭിക്കാം.
മാരുതി സുസുക്കി ഫ്രോങ്ക്സ്
നെക്സ പോർട്ട്ഫോളിയോയിലെ സമീപകാല കൂട്ടിച്ചേർക്കലായ ഫ്രോങ്ക്സ് തിരഞ്ഞെടുത്ത എഞ്ചിനെ അടിസ്ഥാനമാക്കി വ്യത്യസ്തഡിസ്കൗണ്ട് ഘടനകളോടെയാണ് വരുന്നത്. 1.2 ലിറ്റർ പെട്രോൾ വേരിയൻ്റിന് 20,000 രൂപ വരെ ആനുകൂല്യങ്ങൾ ലഭിക്കും, അതേസമയം കൂടുതൽ ശക്തമായ 1.0 ലിറ്റർ ടർബോ-പെട്രോൾ വേരിയന്റിന് 55,000 രൂപ വരെ കിഴിവും ലഭിക്കും. എസ്യുവി വിഭാഗത്തിൽ മാരുതി മികച്ച മോഡലുകളിൽ ഒന്നായ ഫ്രോങ്ക്സ് വിൽപ്പന ഇതിലൂടെ ഉയർത്താമെന്നാണ് മാരുതി കണക്കുകൂട്ടുന്നത്.
മാരുതി സുസുക്കി സിയാസ്, എക്സ്എൽ6
സിയാസ് സെഡാൻ, പ്രീമിയം എംപിവിയായ എക്സ്എൽ6 എന്നിവയ്ക്കും ഡിസ്കൗണ്ട് ആനുകൂല്യങ്ങൾ ലഭ്യമാണ്. സിയാസ് 53,000 രൂപ വരെ കിഴിവോടെ വാഗ്ദാനം ചെയ്യുന്നു. അതേസമയം എക്സ്എൽ6ന് 20,000 രൂപ വരെ ആനുകൂല്യങ്ങൾ ലഭിക്കും. ഈ കിഴിവുകൾ ഈ കരുത്തുറ്റ വാഹനങ്ങൾ വാങ്ങാൻ താൽപര്യപ്പെടുന്ന ഉപഭോക്താക്കളെ ആകർഷിക്കും എന്നാണ് വിലയിരുത്തൽ.
മാരുതി സുസുക്കി ഇഗ്നിസ്, ബലേനോ
മാരുതിയുടെ ഹാച്ച്ബാക്ക് സെഗ്മെന്റിന് കാര്യമായ ലാഭമാണ് ഇക്കുറി പ്രഖ്യാപിച്ചിരിക്കുന്നത്. മാനുവൽ, ഓട്ടോമാറ്റിക് ട്രാൻസ്മിഷൻ ഓപ്ഷനുകളിൽ ലഭ്യമായ രണ്ട് കാറുകൾക്കും ഇഗ്നിസിന് 79,000 രൂപ വരെയും ബലേനോയുടെ പെട്രോൾ വേരിയന്റുകൾക്ക് 48,000 രൂപ വരെയും കിഴിവുണ്ട്. കൂടാതെ, ബലേനോയുടെ സിഎൻജി വേരിയൻ്റിന് 33,000 രൂപ വരെയുള്ള കിഴിവുകൾ ലഭിക്കും.
Click it and Unblock the Notifications
Sign in with Google