ഹൈബ്രിഡ് യുഗത്തിലേക്ക് ഗിയർമാറ്റി മാരുതി; ഈ നാല് മോഡലുകൾ വിപണി പിളർത്തും, കാത്തിരുന്ന് കാണാം
ഇന്ത്യയിലെ ഒട്ടുമിക്ക വാഹന വിദഗ്ധരും വിശ്വസിക്കുന്നത് ഫോസിൽ ഇന്ധനങ്ങളിൽ ഓടുന്ന കാറുകൾക്ക് അധിക ആയുസില്ലെന്നാണ്. എന്നാൽ പകരം എന്ത് ? എന്ന ചോദ്യത്തിന് ഒന്നിലധികം ഉത്തരങ്ങളാണ് നമുക്ക് മുൻപിലുള്ളത്. ഭൂരിപക്ഷം പേരും അതിന് ഇലക്ട്രിക് വാഹനങ്ങളെ പകരക്കാരായി കാണുന്നു. എന്നാൽ ചുരുക്കം ചിലർ മറ്റൊരു അഭിപ്രായം മുന്നോട്ട് വയ്ക്കുന്നവരാണ്. അവർ പരമ്പരാഗത വാഹനങ്ങൾക്ക് പകരം ഹൈബ്രിഡ് കാറുകളുടെ വരവാണ് മുന്നിൽ കാണുന്നത്.
കാർബൺ പുറന്തള്ളൽ കുറവുള്ള സുസ്ഥിരമായ ഭാവിയിലേക്ക് നോക്കുമ്പോൾ ശക്തമായ ഹൈബ്രിഡ് വാഹനങ്ങൾ മികച്ച ഓപ്ഷനാണെന്ന് അവർ വിശ്വസിക്കുന്നു. ഇതിന് പുറമെ ഏതാനും വാഹന നിർമ്മാതാക്കളും ഇതേ നിലപാട് തന്നെ വച്ചുപുലർത്തുന്നവരാണ്. അവരിൽ ഏറ്റവും പ്രമുഖർ മാരുതി തന്നെയാണ്, അതെ ഇന്ത്യയിലെ ഏറ്റവും വലിയ കാർ നിർമ്മാതാക്കളിൽ ഒരാളായ മാരുതി സുസുക്കി ഇന്ത്യ ലിമിറ്റഡ് തന്നെ. അതിനെ അടിവരയിട്ട് കൊണ്ട് അവർ നാല് മോഡലുകൾ വൈകാതെ വിപണിയിൽ എത്തിക്കും.
മാരുതി സുസുക്കി സ്വിഫ്റ്റ് 2024
മാരുതി സുസുക്കി സ്വിഫ്റ്റിന്റെ പുതിയ നാലാം തലമുറ മോഡലാണ് 2024ലെ ഏറ്റവും പ്രതീക്ഷയോടെ കാത്തിരിക്കുന്ന ലോഞ്ചുകളിലൊന്ന്. ഇത്തവണ, കമ്പനി ഈ ജനപ്രിയ ഹാച്ച്ബാക്കിന് ഒരു പുതിയ എക്സ്റ്റീരിയറും ഇന്റീരിയർ ഡിസൈനും നൽകിയിട്ടുണ്ട്. എങ്കിലും ഏറ്റവും വലിയ ഹൈലൈറ്റ് അതിന്റെ പവർട്രെയിൻ തന്നെ ആയിരിക്കും. 2024 മാരുതി സുസുക്കി സ്വിഫ്റ്റിൽ പുതിയ 1.2 ലിറ്റർ നാച്ചുറലി ആസ്പിറേറ്റഡ് Z-സീരീസ് 3-സിലിണ്ടർ പെട്രോൾ എഞ്ചിൻ സജ്ജീകരിച്ചിരിക്കും. ഒപ്പം അതിനൊത്ത ഹൈബ്രിഡ് സംവിധാനവും ഇതിലുണ്ടാകും.
മാരുതി സുസുക്കി ഡിസയർ
പുതിയ നാലാം തലമുറ സ്വിഫ്റ്റ് പുറത്തിറക്കിയതിന് പിന്നാലെ, പുതിയ സ്വിഫ്റ്റിനെ അടിസ്ഥാനമാക്കിയുള്ള സബ് കോംപാക്റ്റ് സെഡാൻ ഡിസയറിനെയും കമ്പനി അവതരിപ്പിക്കും എന്നാണ് അറിയിച്ചിട്ടുള്ളത്. മിക്കവാറും, കമ്പനി അതേ 1.2-ലിറ്റർ നാച്ചുറലി ആസ്പിറേറ്റഡ് Z-സീരീസ് 3-സിലിണ്ടർ പെട്രോൾ എഞ്ചിൻ തന്നെ ഡിസയറിലും ഉപയോഗിക്കും. ഇതിന് സമാനമായ ശക്തമായ ഹൈബ്രിഡ് സംവിധാനവും ലഭിച്ചേക്കാം.
ഗ്രാൻഡ് വിറ്റാര 7 സീറ്റർ
മാരുതി സുസുക്കി അവരുടെ ദീർഘകാല പങ്കാളിയായ ടൊയോട്ടയ്ക്കൊപ്പം, അവരുടെ ജനപ്രിയ കോംപാക്റ്റ് എസ്യുവികളായ ഗ്രാൻഡ് വിറ്റാര, അർബൻ ക്രൂയിസർ ഹൈറൈഡർ എന്നിവയുടെ ഏഴ് സീറ്റർ പതിപ്പുകളുടെ വികസനത്തിനായി പ്രവർത്തിക്കുന്നു. മിക്കവാറും, മാരുതി സുസുക്കി ഗ്രാൻഡ് വിറ്റാര സെവൻ സീറ്റർ 2025ൽ പുറത്തിറക്കും. അത് ഔട്ട്ഗോയിംഗ് ഗ്രാൻഡ് വിറ്റാര പോലെയായിരിക്കുമെന്ന് വിശ്വസിക്കപ്പെടുന്നു, പക്ഷേ മൂന്ന് റോ സീറ്റുകൾക്ക് ഇടം നൽകാൻ അൽപംനീളമേറിയ ബോഡി ഇതിലുണ്ടാകും. പവർട്രെയിൻ വശത്തെ സംബന്ധിച്ചിടത്തോളം, ഔട്ട്ഗോയിംഗ് മോഡലിന്റെ അതേ ശക്തമായ ഹൈബ്രിഡ് ഡ്രൈവ്ട്രെയിൻ കമ്പനി ഇതിന് നൽകിയേക്കും.
മാരുതി സുസുക്കി ഫ്രോങ്സ്
മാരുതി സുസുക്കിയുടെ ഏറ്റവും സവിശേഷമായ മോഡലായ ഫ്രോങ്സിന് വരും വർഷത്തിൽ ശക്തമായ ഹൈബ്രിഡ് പവർട്രെയിൻ ലഭിക്കും. പുതിയ എച്ച്ഇവി സീരീസ് ഹൈബ്രിഡ് സിസ്റ്റം ഉപയോഗിച്ച് ഫ്രോങ്ക്സ് പുറത്തിറക്കാൻ കമ്പനി പദ്ധതിയിടുന്നതായി റിപ്പോർട്ടുണ്ട്, അതിൽ പുതിയ Z12E ത്രീ-സിലിണ്ടർ എഞ്ചിൻ ഒരു ജനറേറ്ററായി പ്രവർത്തിക്കുകയും 1.5-2 kWh ബാറ്ററി പാക്ക് ചാർജ് ചെയ്യുകയും ചെയ്യും. ഈ പുതിയ സീരീസ് ഹൈബ്രിഡ് സംവിധാനത്തിലൂടെ, സുഗമമായ ആക്സിലറേഷൻ, കുറഞ്ഞ മലിനീകരണം എന്നിവയാൽ മികച്ച ഡ്രൈവിംഗ് അനുഭവം നൽകാനാണ് കമ്പനി ലക്ഷ്യമിടുന്നത്.
Click it and Unblock the Notifications
Sign in with Google